Müsfiq Ələsgərli: “... bu hal uşaqların təlim-tərbiyəsinə çox ciddi fəsad vurur”
Uşaqların zərərli informasiyalardan qorunması ictimaiyyəti narahat edən əsas məsələlərdən biridir. Bu problem Milli Məclisin ötən plenar iclaslarında “Uşaqların zərərli informasiyadan qorunması haqqında” qanun layihəsinin müzakirəsi zamanı qaldırılıb. Müzakirə zamanı sənədlə Azərbaycanda uşaqlar arasında dövriyyəsi qadağan edilən informasiyanın növləri müəyyənləşib. Parlament layihəni qəbul edərsə, 2020-ci il yanvarın 1-də qüvvəyə minəcək, çünki bu qanun tam işlək hala gətirilməlidir.
Qanun layihəsində uşaqlar üçün zərərli informasiyanın növləri müəyyənləşib. Uşaqlar arasında dövriyyəsi qadağan edilən informasiyaya zorakılığı və qəddarlığı təbliğ edən, cəmiyyət əleyhinə və hüquqazidd hərəkətləri, o cümlədən cinayətləri təbliğ edən, uşaqların həyat və təhlükəsizliyinə potensial təhlükə yaradan əməlləri təbliğ edən, ailə institutunu nüfuzdan salan, əxlaqdan kənar leksik (söyüş) məzmunlu, pornoqrafik xarakterli, qorxu məzmunlu, erotik məzmunlu informasiyalar aiddir. Uşaqlar arasında dövriyyəsi qadağan edilən informasiya məhsullarının uşaqların ola biləcəyi yerlərdə inzibati, texniki proqram və avadanlıq vasitələrinin tətbiq edilmədən yayılmasına yol verilmir.
Milli Məclis (MM) sədrinin müavini, İnsan hüquqları komitəsinin sədri Bahar Muradova media nümayəndələrinə açıqlamasında qeyd edib ki, “Uşaqların zərərli informasiyadan qorunması haqqında” qanun layihəsi uşaqların sağlamlığına mənfi təsir göstərən, o cümlədən onların mənəvi, psixi, fiziki və sosial inkişafına ziyan vuran informasiyalardan qorunmasını nəzərdə tutur: “Azərbaycanda mövcud qanunvericilik uşaq hüquqlarının qorunması məsələlərini özündə əks etdirir. 1998-ci ildə qəbul olunmuş “Uşaq hüquqları haqqında” Qanunun 15-ci maddəsində haqqında söhbət gedən məsələ əks etdirilir. Son zamanlar bu maddənin ikinci hissəsinə edilən dəyişikliklə əlaqədar olaraq belə bir qərar verilib ki, bu məsələ ayrıca bir qanunla tənzimlənsin, yeni bir qanun layihəsi hazırlansın. Qanun layihəsinin məqsədi uşaqların sağlamlığına mənfi təsir göstərən, o cümlədən onların mənəvi, psixi, fiziki və sosial inkişafına ziyan vuran informasiyalardan qorunmasını nəzərdə tutur. Bununla əlaqədar olaraq qanun layihəsi bir sıra istiqamətləri tənzimləyir. Uşaqlar üçün zərərli informasiya nədir, onların dairəsi müəyyənləşdirilir”.
“Uşaqların zərərli informasiyadan qorunması haqqında” qanun layihəsinə fikir bildirən Mətbuat Şurasının sədr müavini, Jurnalistlərin Həmkarlar İttifaqının sədri Müşfiq Ələsgərli “Bakı-Xəbər”ə açıqlamasında qeyd etdi ki, kifayət qədər zərurət olan qanundur: “İnternetin inkişafı ilə bağlı olaraq hazırda informasiyalarda müəyyən standartların pozulması kütləvi hal alıb. Barəsində məhdudiyyət qoyulan bütün informasiya kateqoriyaları internet üzərində yayılan məlumatlarda pozulur. O cümlədən, bu hal uşaqların təlim-tərbiyəsinə çox ciddi fəsad vurur. Bu baxımdan uşaqların zərərli informasiyadan qorunması üçün müəyyən tənzimləyici qanunlar olmalıdır. Bu səbəbdən qeyd olunan qanun layihəsinin hazırlanması təqdirəlayiqdir. Uşaqların zərərli informasiyadan qorunması haqqında qanun nə qədər tez qəbul olunarsa, daha tez müsbət nəticə əldə olunar”.
Günel CƏLİLOVA
