Aynur Əliyeva: “Süni qida ilə qidalanan uşaqlarda xəstələnmə və ölüm hallarına ana südü ilə qidalanan uşaqlara nisbətən 4 dəfə daha çox rast gəlinir”
Azərbaycanda 1 yaşadək uşaqların əsas ölüm səbəbləri açıqlanıb. Açıqlanan statistik rəqəmlərə əsasən, 2017-cı ildə Azərbaycanda 1 yaşadək 1700 uşaq dünyasını dəyişib ki, onların 993-ü oğlan, 707-si qızdır. 2016-cı ildə ölkədə 999-u oğlan, 667-si qız olmaqla 1666 uşaq, 2015-ci ildə isə 1220-si oğlan, 813-ü qız olmaqla ümumilikdə 2033 nəfər 1 yaşadək uşaq dünyasını dəyişib. 1 yaşadək uşaqların ölümünün ilk səbəbi perinatal dövrdə meydana çıxan bəzi hallardır. Ötən il bu hallardan 1028 nəfər (2016-cı ildə 1090) körpə dünyasını dəyişib. Körpə ölümlərinin səbəbləri arasında sonrakı yerləri tənəffüs sistemi xəstəlikləri tutur ki, bu səbəbdən ötən il 235 (2016-cı ildə 173 körpə) ölüb.
Ötən il anadangəlmə anomaliyalar (inkişaf qüsurları), deformasiyalar və xromosom pozuntularından 155 (2016-cı ildə 151 körpə), travmalar, zəhərlənmələr və xarici səbəblərin təsirinin digər nəticələrindən 12 (2016-cı ildə 7) körpə ölüb.
1 yaşadək uşaqların əsas ölüm səbəbini araşdırmaq üçün ekspertə müraciət etdik.
Pediatr Aynur Əliyeva bizimlə söhbətində bildirdi ki, uşaq ölümü içərisində daha vacibi körpə ölümü göstəricisi, yəni uşaq doğulandan 1 yaşadək olan ölüm göstəricisidir: “Uşaq ölümü əsasən rayonlarda qeydə alınır. Qadınlar hamiləlik dönəmində həkim qəbulunda olmadıqları üçün gələcəkdə uşağın səhhətində yaranacaq hər hansı fəsaddan xəbər tutmurlar”.
Həmsöhbətimiz onu da qeyd etdi ki, 1 yaşına qədər olan uşaqların bəzisi ana südü ilə qidalanmadığı üçün onların səhhətində müəyyən problemlər yaranır: “Süni qida ilə qidalanan uşaqlarda xəstələnmə və ölüm hallarına ana südü ilə qidalanan uşaqlara nisbətən 4 dəfə daha çox rast gəlinir. Bu uşaqlarda ishala, diareyaya 17,3 dəfə çox rast gəlinir. Dünyada ana südü qədər ehtiyacları təmin edə bilən ikinci qida yoxdur".
Uşaq ölümlərinin artması səbəblərindən biri kimi pediatr Azərbaycanda 2015-ci il yanvarın 1-dən diridoğulmanın yeni meyarlarının tətbiq edilməsini dilə gətirdi: “Bu meyarlar qüvvəyə minənədək diridoğulma hamiləliyin 28-ci həftəsindən doğulanlara, bədən kütləsi 1 kq-dan çox olanlara aid edilirdi. 28-ci həftədən əvvəl doğulanlar isə "gecikmiş düşük" hesab olunurdu və uşaq kimi qeydiyyata alınmırdı. 2015-ci il yanvarın 1-dən diridoğulmanın yeni meyarlarının tətbiqi ilə əlaqədar hamiləliyin 22-28 həftəsində baş verən ölüm hadisələrini də artıq uşaq ölümlərinə əlavə edirik. Buna görə də yeni meyarlara keçdikdən sonra ölkədə uşaq ölümü göstəricisi artıb".
Günel CƏLİLOVA
