Körpə gülüşü, uşaq saflığı və ülviliyi dünyanı gözəlləşdirir, paklaşdırır. Hər bir uşaq sevinməli, həyatını firavan yaşamalıdır. Uşaqları ovutmaq, sevindirmək, göz yaşlarını gülüşə, sevincə çevirməkdən gözəl nə var ki... Heç nə. Uşaq gülürsə, bütün kainat gülür, bütün aləm işıq selinə qərq olur. Uşaqlarımız bizə bir dünyanı bağışlayırlar. Biz böyüklər isə uşaqlarımıza, birgünlük də olsa, bayram ovqatlı dünyanı hədiyyə edirik.
1 iyun Uşaqların Beynəlxalq Müdafiəsi Günüdür. Hər il olduğu kimi, bu il də “Bakı-Xəbər” qəzeti öz ənənəsinə sadiq qalaraq bu tarixdə əziz balaları təbrik edir.
“Bakı-Xəbər” ailəsi günü-gündən böyüyür, bu ailədə yeni körpələr dünyaya gəlir. Hər körpənin qədəmi sayalı olsun.
1 iyun - Uşaqların Beynəlxalq Müdafiəsi Günü münasibətilə təbrik etdiyimiz ağıllı-kamallı balarımız çoxdur, onlar arasında “Bakı-Xəbər” oxucularının, dostlarının da övladları, nəvələri var.
Gəlmiş güllə-çiçəklə, Uşaqların bayramı. Bizim bu uşaqları Təbrik eləyir hamı.
Qəzetimizin baş redaktoru, Mətbuat Şurasının idarə heyətinin üzvü Aydın Quliyevin nəvələri Nurman, Dərya və Emili bayram günü münasibətilə təbrik edirik.
Nurman nurdan yaranıb, İşıqdır başdan-başa. Çat bütün arzulara, Həmişə xoşbəxt yaşa.
Dərya kimi saf, təmiz, Günəş kimi işıqlı. Özü gözəldir ay tək, Dəryamız yaraşıqlı.
Emil igid olacaq, Cəsur oğlandır özü. Həm şirindi, həm qoçaq, Dillərdədir hər sözü.
Qəzetimizin baş redaktor müavini Tahir Tağıyevin qızı Şəhla balanı da təbrik edirik.
Böyüyüb Şəhla qızım, Çiçək kimi gözəldi. Nəğməyə bənzər özü, Atasıçün özəldi.
Qəzetimizin baş redaktorunun müavini Samirə Səfərovanın nəvələri Leyla və Kənanı da təbrik edirik.
Leyla nazlı-qəmzəli, Bir gözəldir siz bilin. İndi kitab oxuyur, Ay nənəsi, sevinin.
Kənan gəlib Bakıya, Sevinir baba-nənə. Tanrı xoş günlər versin, Kənanım, hər an sənə.
Qəzetimizin əməkdaşı İradə Sarıyevanın gözünün ağı-qarası bircə balası Əsgəri də bayram münasibətilə təbrik edirik.
Əsgər sevir idmanı, Çempiondu bu oğlan. Vətənə gərəkdi o, Böyüyür xoşbəxt, sağlam.
Əməkdaşımız Ülviyyə Nağıyevanın doğması Fəridə balanı da təbrik edirik.
Çiçəklərdən gözəldi Şirin, şıltaq Fəridə. Sevinsin ömrü boyu, İmkan verməsin dərdə.
Qəzetimizin dizayneri Saleh Mehdiyevin qızları Ayan və Aişə balanı da səmimi qəlbdən təbrik edirik.
Ayan şıltaq mələkdi, Atasının ürəyi. Xoşbəxt ol, gözəl bala, Anasının mələyi.
Şən kəpənəkdi Bizim Aişə. Günəşə bənzər, Gülür həmişə.
Əməkdaşımız Günel Cəlilovanın qardaşı qızı Nərgiz balanı da ürəkdən təbrik edirik.
Yeni gəlib dünyaya, İşıq saçıb hər yana. Tez böyü, arzuna çat, Gözəllik saç cahana.
Qəzetimizin əməkdaşı Vidadi Ordahallının şirin-şəkər qızları Nuray və Nihal, sizin də bayramınız mübarək!
Nuray nurdan yaranıb, Çox ağıllı qızdı o. Atasının könlündə Həm bahar, həm yazdı o.
Nihal Allahın payı, Çox şirindi, inanın. Allah onu qorusun, Ay anası, sevinin.
Qəzetimizin əməkdaşı Məhəmmədəli Qəriblinin qızı Banuçiçək balanı da ürəkdən təbrik edirik.
Adı Oğuzdan gəlir, Özü günəşdi, aydı. Banuçiçək gözəldi, Ulduzlar ona taydı.
Respublika “Xatirə kitabı” redaksiyasının baş redaktoru, qəzetimizin yaxın dostu Nəzakət Məmmədovanın da nəvələri Fəxrini, Şərqiyyəni, Rəşidi, Nəzakəti və Nərminəni də ürəkdən təbrik edirik.
Nənəsinin qüruru Fəxridir Fəxri bala. Sevincisən atanın. Sənsən alınmaz qala.
Şərqiyyə bir şərqidi, Könüllərdə oxunar. Nazı, sözü bir aləm, Çiçəklərlə oyanar.
Rəşid artıq böyüyüb, Əsgər olacaq özü. İgidlərin igidi, Ancaq “Vətəndir” sözü.
Nəzakət başqa bir qız, Bənzəməz bir kimsəyə. Çox ağıllı qızdı o, Dəyər bütün dünyaya.
Nərminə, gözəl qızsan, Təbəssümün bir işıq. Xoşbəxt böyü həyatda, Ol dünyaya yaraşıq.
Qəzetimizin baş redaktor müavini Tahir Tağıyevin qardaşı uşaqları Zöhrə və Ərkinazı da ürəkdən təbrik edirik.
Bir ulduzdu Zöhrəmiz Könül kəhkəşanında. Tanrı köməyi olsun Ömrün hər bir anında
Ərkinaz nazlı qızdı Hər ədası bir aləm Körpə könlü sevinsin Gülsün taleyi müdam.
Qəzetimizin əməkdaşı İradə Sarıyevanın qardaşı uşaqları Şəlalə və Əlini də ürəkdən təbrik edirik.
Şəlalə, rəssam qızım, Dan üzündə ulduzum!
Əli igid pəhlivan, Yurdumuzu qoruyar.
Əziz uşaqlar, biz sizi Nurmanın, Dəryanın, Kənanın, Leylanın, Emilin, Şəhlanın, Zöhrənin, Ərkinazın, Nurayın, Nihalın, Əsgərin, Nərgizin, Fəridənin, Ayanın, Aişənin, Əlinin, Şəlalənin, Banuçiçəyin, Fəxrinin, Rəşidin, Nərminənin, Şərqiyyənin, Nəzakətin timsalında təbrik edirik. Sizə uğurlar, can sağlığı, müharibəsiz illər, sülh və firəvanlıq arzulayırıq. Qoy Tanrı hər birinizə öz ata-ananızın, əzizlərinizin yanında böyüyüb, boya-başa çatmağı nəsib etsin!
İradə SARIYEVA Günel CƏLİLOVA
