Azərbaycanda əlillik statusunun müəyyən edilməsinin "ASAN xidmət"ə verilməsi təklif olunur. Trend-in məlumatına görə, bu təkliflə Milli Məclis sədrinin birinci müavini Ziyafət Əsgərov parlementin bu gün keçirilən iclasında çıxış edib.
Onun sözlərinə görə, uzun illərdir ki, əlilliyin verilməsi ilə bağlı mübahisələr davam edir: “Əgər "ASAN xidmət"in texniki imkanları çatırsa, qoy bu məsələni öz üzərinə götürsün və müvafiq problemlər də həllini tapsın. Hesab edirəm ki, bu, həm dövlətimiz, həm də vətəndaşlarımız üçün faydalı olar. Bu bir təklifdir, bunun üzərində düşünmək lazımdır”.
“İllərdir ki, əlilliyin müəyyən edilməsi ilə bağlı atılan addımlar parlamentdə müzakirə olunub. Hesab edirəm ki, hazırda buna yeni prizmadan baxmalıyıq. Əlillik dərəcəsinin verilməsi ədalət prinsiplərinə əsaslanmalıdır”. Bunu is’ Milli Məclisin deputatı Siyavuş Novruzov deyib.
Onun sözlərinə görə, elə şəxslər var ki, onların haqqı çatmasa da, əlillik dərəcəsi ala bilir: “Elələri də var ki, haqqı çatır, amma ala bilmir. Azərbaycanda əlillərin sayı dünya ölkələri ilə müqayisədə yüksəkdir. Ayrı-ayrı strukturlar tərəfindən əlillik dərəcələri düzgün şəkildə verilməyib. Əgər bu say düzgün olarsa, o zaman onların pensiya və məvaciblərinin artırılması məsələsi də gündəmə gələ bilər”.
S.Novruzov qeyd edib: "Elə əlillər də var ki, onlar işləyə bilərlər. Əlilləri cəmiyyətdən təcrid etmək deyil, onları cəmiyyətin aktiv bir üzvü kimi fəaliyyətə cəlb etmək olar. Elə əlillər var ki, onlar oturaq şəkildə çalışa bilərlər”.
Millət vəkili deyib ki, Azərbaycan qanunvericiliyinə görə, hər hansı təşkilat bağlandıqda orada ən son əlillər, müharibə veteranları işdən uzaqlaşdırılmalıdır: "Bu insanların iş axtarması digərlərindən daha çətindir. Bu məqam qanunda təsdiq olunsa da, bəzi strukturlar buna nəzarət etmirlər. Bu məsələ ciddi nəzarətdə olmalıdır. Deputat həmkarlarıma kifayət qədər şikayətlər gəlir. Aidiyyəti strukturlar buna ciddi nəzarət etməlidirlər ki, bu cür insanların hüquqları daim qorunsun”.
