Azərbaycanda doğulanlar arasında oğlan uşaqlarına üstünlük verilməsinin növbəti illərdə də davam etmə ehtimalını nəzərə alsaq, gələcəkdə doğumun tələb olunacaq səviyyədə təmin edilməsi üçün qadın çatışmazlığı təhlükəsi yarana bilər. Trend-in məlumatına görə, bunu Əmək və Əhalinin Sosial Müdafiəsi Nazirliyinin Məşğulluq siyasəti və demoqrafiya şöbəsinin müdiri Elnur Süleymanov "Azərbaycanda qız övladlarının dəyərinin təbliğ edilməsi üçün gənclərin maarifləndirilməsi" adlı pilot layihənin yekun konfransında çıxışı zamanı deyib.
O qeyd edib ki, gələcəkdə doğumun tələb olunacaq səviyyədə təmin edilməsi üçün qadın çatışmazlığı təhlükəsi davamlı demoqrafik inkişafa öz mənfi təsirini göstərə bilər: "Hesab edirik ki, doğulanlar arasında cins nisbətinin pozulmasının aradan qaldırılması məqsədilə qeyd olunan istiqamət üzrə ölkə üçün fəaliyyət planının hazırlanması, geniş maarifləndirmə tədbirlərinin həyata keçirilməsi vacibdir".
Şöbə müdiri deyib ki, son 12 il ərzində ölkə əhalisinin sayı 15 faiz artaraq 2018-ci il 1 mart tarixinə 9911 min nəfər, əhalinin təbii artım göstəricisi isə əhalinin hər 1000 nəfəri üçün 8,1 nəfər səviyyəsində təşkil edib: "Doğulanların sayı hər 1000 nəfər arasında 17,5 nəfərdən 14,7 nəfərədək azalıb, ölənlərin sayı isə 6,2-dən 6,6-dək artıb. Bununla yanaşı, demoqrafik təhlillər göstərir ki, ölkədə diri doğulanların cins strukturunda oğlan uşaqlarının artımı müşahidə olunur. Hazırda 100 doğulan qıza 114 oğlan düşür. Məsələn, Çində isə bu göstərici 115,9 təşkil edir".
E.Süleymanov əlavə edib ki, doğulanların cins nisbətinin pozulması ümumi əhalinin cins strukturunu da dəyişir: "1989-cu ildə hər 1000 kişiyə 1051, 1999-cu ildə 1048, 2009-cu ildə 1021 qadın düşüb. Bu gün isə ölkədə hər 1000 kişiyə 1004 qadın düşür".
ƏƏSMN rəsmisi bildirib ki, Azərbaycan Prezidentinin fərmanı ilə təsdiqlənmiş "Azərbaycan 2020: Gələcəyə baxış" İnkişaf Konsepsiyasına əsaslanaraq "Azərbaycanda Respublikasında əhali sakinliyi və demoqrafik inkişaf sahəsində Dövlət Proqramı" layihəsi hazırlanıb və Nazirlər Kabinetinə təqdim olunub: "Dövlət proqramının layihəsinə əsasən, proqramın 2030-cu ilədək əhatə edəcəyi dövr ərzində ana və uşaqların mühafizəsi sahəsində kompleks tədbirlərin həyata keçirilməsi nəzərdə tutulur. Proqram layihəsində doğulanlar arasında cins nisbətinin aradan qaldırılması məsələsi də yer alıb".
"Əksər ölkələrdə olduğu kimi, Azərbaycanda da gender bərabərliyi sahəsində bir sıra problemlər qalmaqdadır. Bu gün Azərbaycanda doğulan uşaqlar arasında cins nisbətinin ciddi şəkildə pozulması bu baxımdan xüsusi diqqət tələb edir". Bunu isıə BMT-nin Əhali Fondunun baş müşaviri Fərid Babayev deyib.
Onun sözlərinə görə, bu fonemenlə bağlı apardıqları son araşdırma zamanı məlum olub ki, bu vəziyyət gələcəkdə əhalinin ümumi strukturu və dinamikası baxımdan xoşagəlməz nəticələrə səbəb ola bilər: "Kişilərin sayının həddindən artıq çoxalması onların ailə qurmaq üçün partnyor tapa bilməməsinə, eyni zamanda, ölkədə zorakı davranış hallarının geniş yayılmasına, ümumi kriminogen durumun daha da ağırlaşmasına, gəlinqaçırma, erkən nikah, insan alveri və s.-yə səbəb ola bilər. Bu fenomenin qarşısının alınması artıq neçə illərdir ki, BMT-nin Əhali Fondunun əsas fəaliyyət prioritetlərindəndir. Bu istiqamət üzrə Azərbaycan hökuməti ilə sıx əməkdaşlıq şəraitində müxtəlif layihələr həyata keçiririk".
