Sevinc Seyidova: “Mehriban Əliyevanın Azərbaycanın milli dəyərlərinin yaşadılması, dünyaya tanıdılması istiqamətində göstərdiyi misilsiz xidmətlər Azərbaycan qadınının milli-mənəvi dəyərlərimizə nə dərəcədə bağlı olduğunun gözəl nümunəsidir”
Mayın 30-da Bakı Konqres Mərkəzində Azərbaycan qadınına seçki hüququnun verilməsinin 100 illiyinə həsr edilmiş Qadınların V Forumu keçirilib. Azərbaycan Prezidenti İlham Əliyev Qadınların V Forumunun iştirakçılarına təbrik məktubu ünvanlayıb.
Məktubu Azərbaycan Prezident Administrasiyasının Humanitar siyasət məsələləri şöbəsinin müdiri Fərəh Əliyeva oxuyub. Məktubda qeyd olunur: “Azərbaycan Müsəlman Şərqində qadınlara seçib-seçilmək hüququ verən ilk respublika olub. Azərbaycan qadınları ötən dövr ərzində təhsil, səhiyyə, mədəniyyətin müasir əsaslar üzərində qurulmasında əzmkarlıqla çalışıblar. Azərbaycan dövlət müstəqilliyini elan etdikdən sonra da qadınlar öz aktivliyi ilə seçiliblər. Onlar çoxəsrlik milli-mənəvi dəyərlərimizi bu gün də yaşadırlar. Azərbaycanda qadınlara qarşı ayrıseçkilik aradan qaldırılıb, onlara bərabər hüquqlar verilib”.
Prezident qeyd edib ki, Azərbaycan qadınları çoxəsrlik milli-mənəvi dəyərlərimizi bu gün də yaşadırlar.
Azərbaycan qadınlarının milli-mənəvi dəyərlərin təbliğ olunmasında rolunun böyük olduğunu müsahibimiz də təsdiqlədi.
“Həftə içi” qəzetinin baş redaktoru Sevinc Seyidova “Bakı-Xəbər”ə açıqlamasında qeyd etdi ki, bu gün Azərbaycan cəmiyyətində milli dəyərlərimizi, adət-ənənələrimizi davam etdirən, bu irsə sahib çıxan əsas qüvvə məhz qadınlardır: “Birinci vitse-prezident, Heydər Əliyev Fondunun rəhbəri Mehriban Əliyevanın Azərbaycanın milli dəyərlərinin yaşadılması, dünyaya tanıdılması istiqamətində göstərdiyi misilsiz xidmətlər Azərbaycan qadınının milli-mənəvi dəyərlərimizə nə dərəcədə bağlı olduğunun gözəl nümunəsidir. Unudulmaqda olan Azərbaycan muğamına yeni nəfəs verilməsi, keçmişimizin yadigarları olan yüzlərlə tarixi abidəmizin bərpası, bir çoxlarının UNESCO-nun mədəni irs siyahısına daxil edilməsi bu xidmətlərin cüzi bir hissəsidir”.
S.Seyidovanın sözlərinə görə, bu gün Azərbaycan cəmiyyətində təhsil, səhiyyə, media, mədəniyyət, ictimai-siyasi təşkilatlar və s. sahələrdə qadınlarımızın fəallığı çox yüksəkdir. Bu amilin özü milli dəyərlərimizin əsas daşıyıcıları olan qadınların iradəsinə yüksək hörmət və diqqətin olduğunu göstərir.
Xanım baş redaktor onu da bildirdi ki, qadının ailədəki rolu danılmazdır: “Gələcək nəslin sağlam ruhda, milli adətlərinə, dəyərlərinə bağlı olaraq yetişdirilməsi işində qadınları heç bir kəs əvəz edə bilməz. Qadın anadır, qadın tərbiyəçidir, müəllimdir, həkimdir, vəkildir. Qadın böyük qüvvədir. Bu səbəblərdən bizim səsimiz eşidildikcə, fəallığımız daha da artdıqca, cəmiyyətimizdə milli adət-ənənələrə, dəyərlərə göstərilən hörmətin səviyyəsi də daim yüksək olacaq”.
Günel CƏLİLOVA
