İnsanın mənəvi tərbiyəsinin özülü uşaqlıqdan qoyulur. Belə demək mümkündürsə, uşaq bir fidandır, onu elə inkişaf etdirmək lazımdır ki, düzgün formada böyüsün. Əgər o fidanı lazımi səviyyədə inkişaf etdirməsək, əyri bitəcək və ondan heç kəs fayda görməyəcək.
Uşaqların fiziki və mənəvi inkişafında təlim-tərbiyə əsas komponentdir. Xalqımızın əzəmətli oğlu, müstəqil Azərbaycan dövlətinin memarı Heydər Əliyevin uşaq və gənclərin fiziki tərbiyəsi ilə bağlı söylədiyi fikirlər bu gün də öz siqlətini qoruyur: “İdman hər bir insanın sağlamlığıdır. Ona görə də biz idmana çox böyük yol açmışıq. Gənclər gərək fiziki cəhətdən sağlam olsunlar, həm də yüksək biliyə, əxlaqa, tərbiyəyə, yüksək elmə malik olsunlar”. Bu dəyərli və qiymətli fikirlər Azərbaycan uşağının, gəncinin yoluna saçılan bir işıqdır. Onlar o işığı tutub daha böyük uğurlara imza atmaqdadırlar.
Ölkəmizdə zaman-zaman uşaq və gənclərin fiziki və mənəvi inkişafı diqqət mərkəzində olub. Müstəqillik əldə edildikdən sonra isə bu sahəyə daha böyük diqqət, qayğı göstərilib. Azərbaycan uşağı, gənci həm fiziki, həm də mənəvi baxımdan inkişaf edir. Bu inkişaf sağlam təməllər üzərində qurulduğu üçün, özünü ən yüksək səviyyədə təsdiqləyə bilir.
Bu gün uşaq və gənclərimizin fiziki və mənəvi inkişafını şərtləndirən yüzlərlə hadisə, uğurlar var. Uşaqların fiziki tərbiyəsinin inkişaf etdirilməsi sahəsində dövlət tərəfindən müxtəlif tədbirlər həyata keçirilir. Orta ümumtəhsil məktəblərində həyata keçirilən hərbi-vətənpərvərlik oyunları, müxtəlif idman yarışları uşaqların fiziki sağlamlığının rəhninə çevrilib. Bu gün orta ümumtəhsil müəssisələrində uşaq və yeniyetmələrin vətənpərvər ruhda, dövlətimizə, xalqımıza məhəbbətlə böyümələri üçün müxtəlif işlərin görüldüyünün şahidiyik. Məlumdur ki, son bir neçə ildə orta ümumtəhsil məktəbləri şagirdləri arasında keçirilən “Şahin” hərbi-vətənpərvərlik oyunları şagirdlərdə mənəvi, fiziki tərbiyənin formalaşmasında önəmli rol oynayır.
Elə bir neçə gün əvvəl Bakı Şəhəri üzrə Təhsil İdarəsinin tabeliyindəki ümumtəhsil müəssisələrində Azərbaycan Xalq Cümhuriyyətinin 100 illik yubileyi ilə əlaqədar hərbi idman bayramı keçirilib.
Onu da vurğulayaq ki, Təlimə Dəstək Mərkəzinin təşkilatçılığı ilə keçirilən hərbi idman bayramının əsas məqsədi hərbi-fiziki hərəkət və oyunları tədqiq etmək, onların müxtəlif növlərinin mahiyyətini və məzmununu açmaqla gənc nəslin hərbi-fiziki tərbiyəsinin inkişafına nail olmaq, yeniyetmə və gəncləri maarifləndirmək, vətənpərvərlik tərbiyəsi işinin keyfiyyətini yüksəltməkdir.
Sözsüz ki, hər bir şagird gələcəkdə Vətənə layiqli əsgər və yetkin vətəndaş olmalıdır. Belə tədbirlər bugünkü uşaq və gənclərin gələcəyinin formalaşmasında mühüm rol oynayır.
Uşaq və gənclərin fiziki və mənəvi inkişafının yüksək şəkildə həyata keçirilməsi üçün respublikamızda dövlət başçısı tərəfindən hər cür şərait yaradılıb. Bu gün respublikamızın paytaxtı da daxil olmaqla Azərbaycanın hər bir rayonunda, qəsəbəsində uşaq idman məktəbləri, fiziki tərbiyə mərkəzləri, idman klubları fəaliyyət göstərirlər. Bu da uşaq və gənclərin asudə vaxtlarını səmərəli keçirməsi üçün böyük əhəmiyyət daşıyır. Uşaq və gənclər bu idman məkanlarında idmanın ən müxtəlif sahələri ilə məşğul olurlar. Onu da vurğulayaq ki, idman klubları arasında keçirilən açıq birinciliklər, eləcə də yoldaşlıq görüşləri uşaq idmançıların həyatında mühüm rol oynayır, onların gələcəkdə peşəkar idmançı olmasına şərait yaradır.
Qeyd edək ki, Prezident İlham Əliyev uşaq və gənclərimizin fiziki və mənəvi cəhətdən inkiaf etməsinə, onların sağlam ruhlu tərbiyə olunmasına böyük dəstək verir. Prezident İlham Əliyev çıxışlarından birində “Bizim siyasətimizin mərkəzində Azərbaycan vətəndaşı dayanır” fikrini söyləməklə ölkədə həyata keçirilən yüksək siyasətin qayəsini hər kəsə bəlli edib. Prezident respublikamızda uşaqlara dövlət qayğısının gücləndirilməsi, uşaq problemlərinə vətəndaş cəmiyyəti qurumlarının diqqətinin artırılması və ölkənin uşaqlarla bağlı demoqrafik perspektivlərinin müəyyənləşdirilməsi məqsədilə mütəmadi olaraq dövlət proqramlarının həyata keçirilməsi istiqamətində sərəncamlar imzalayır, bu kontekstdə mühüm tədbirlər görülür. Bununla yanaşı, ölkəmizdə uşaq və gənclərin fiziki və mənəvi inkişafı üçün mühüm addımlar atılır.
Onu da bildirək ki, uşaq və gənclərin milli vətənpərvərlik hissinin formalaşdırılması istiqamətində həyata keçirilən işlər sırasında olan, ölkə başçısının tapşırığı ilə reallaşdırılan “Ölkəmizi tanıyaq” tur-aksiyası böyük əhəmiyyədə malikdir. Bu barədə tanınmış təhsil eksperti, tarixçi-alim Kamran Əsədov çox yüksək fikirlər bildirib: “İlk növbədə qeyd edim ki, Azərbaycan Prezidenti İlham Əliyevin tövsiyəsinə əsasən, “Ölkəmizi tanıyaq” devizi ilə keçirilən maarifləndirici tur-aksiyanın çərçivəsində məktəblilərin respublikamızın müxtəlif bölgələrinə, tarixi məkanlara ekskursiyaları təşkil edilir. Hesab edirəm ki, bu layihə həqiqətən də respublikamızın ictimai və mədəni həyatında çox mühüm hadisədir və məktəblilərin dünyagörüşünün daha da zənginləşməsinə, gənclərin vətənpərvərlik və azərbaycançılıq prinsipləri əsasında tarixi-mədəni irsimizə hörmət ruhunda tərbiyə olunmasına çox böyük töhfələr verir”.
Onu da vurğulayaq ki, uşaqlarda dövrün tələbinə uyğun əxlaqi keyfiyyətlərin inkişafı üçün cəmiyyətin şüurlu, məqsədyönlü fəaliyyəti getdikcə güclənir. Müsbət əxlaqi keyfiyyətlərin mahiyyəti, məqsədi, məzmunu və əhəmiyyətini düzgün dərk etmək üçün əxlaqın necə yarandığını bilmək zəruridir.
Azərbaycan Respublikasında uğurlu gənclər siyasətinin əsası Heydər Əliyev tərəfindən qoyulub və ondan miras qalan siyasət Prezident İlham Əliyev tərəfindən layiqincə davam etdirilir. Ölkə başçısı son 10 ildə Azərbaycanda gənclərlə işin inkişaf etdirilməsi ilə bağlı bir sıra göstərişlər, sərəncamlar verib və bu da onu deməyə əsas verir ki, gənclər, onların təhsili, tərbiyəsi, mənəvi və fiziki inkişafı, fəaliyyəti daim ölkə başçısının diqqətindədir. Onu da vurğulayaq ki, paytaxtımızın 2014-cü il bədii gimnastika üzrə Avropa çempionatı, 2015-ci il Birinci Avropa Oyunları, 2016-cı il şahmat üzrə Dünya çempionatı, 2017-ci il İslam Həmrəyliyi Oyunları kimi beynəlxalq tədbirlərə evsahibliyi etməsi ölkədə bu sahədə aparılan dinamik işin təzahürü və həm də gənclər siyasətinin uğurlu davamıdır.
Onu da qeyd edək ki, bu gün gənclərmiz mədəniyyət, incəsənət, idman, elm, təhsil, texnologiya və başqa sahələrdə öz istedadlarını və qazandıqları uğurları bütün dünyaya fəxrlə nümayiş etdirirlər. Bu gün yüzlərlə istedadlı gənc Prezidentin qayğısını öz üzərində hiss edir və qazandıqları uğurları doğma vətənimizə ithaf edirlər. Onu da vurğulayaq ki, ölkə başçısının müvafiq sərəncamı ilə mədəniyyət, incəsənət, idman, elm, təhsil, texnologiya və başqa sahələrdə fəaliyyət göstərən gənclər mükafatlara layiq görülür, təqaüdlər alırlar. Bu da onların yaradıcılığına, fəaliyyətinə güclü təkan verir. Bu da faktdır ki, Azərbaycan gənclərinin dünyanın tanınmış ali məktəblərində dövlət dəstəyi ilə təhsil alması, ixtisaslı kadrlar kimi ölkə iqtisadiyyatının qüdrətlənməsində fəaliyyət göstərməsi dövlətin bu sektora etibarının nəticəsidir. Gənclərimizi xarici ölkələrin ali təhsil müəssisələrinə göndərməklə Azərbaycanın ölkə sərhədlərindən kənarda tanınması və təbliği üçün zəmin yaradan ulu öndərin ənənəsi bu gün Prezident İlham Əliyev tərəfindən həyata keçirilir.
Onu da qeyd edək ki, gənclərin mənəvi-fiziki inkişafı ilə bağlı indiyə qədər bir sıra sənədlər qəbul edilib. Onlardan biri 2005-2009-cu illəri əhatə edən gənclərlə bağlı Dövlət Proqramıdır. Proqram çərçivəsində görülən işlər gənclərin potensialından ölkənin mənafeyi naminə tam və düzgün istifadə olunması, onların faydalı məşğulluğunun təmin edilməsi dövlət idarəçiliyi sistemində iştirakının gerçəkləşdirilməsi yönündə ciddi irəliləyişə gətirib çıxardı. Prezident İlham Əliyevin bu sahəyə olan diqqəti özünü ayrıca bir ilin - 2007-ci ilin “Gənclər ili” elan edilməsində də göstərdi. 2007-ci ildə Azərbaycan Respublikasının Prezidenti İlham Əliyev “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramının təsdiq edilməsi” barədə Sərəncam imzaladı. Proqram çərçivəsində 5 mindən artıq gəncin dünyanın nüfuzlu ali məktəblərində təhsil almağa göndərilməsi ilə bağlı tədbirlər texnoloji inkişaf, innovativ düşüncə əsrində Azərbaycanın inamlı gələcəyinə verilən ən böyük töhfələrdən oldu.
Sevindirici haldır ki, bu gün respublikanın gənclər təşkilatları BMT, Avropa Şurası, İƏT, GUAM, MDB və digər beynəlxalq təşkilatlarla əlaqə yaradır, birgə layihələr həyata keçirirlər. Bütün bunlar intellektual Azərbaycan gəncliyinin formalaşmasını sübut edir. Bundan başqa, Azərbaycan gəncləri beynəlxalq səviyyəli bilik, intellekt yarışlarında da öz bilik və bacarıqları, istedadları ilə fərqlənirlər.
Bu gün Azərbaycan gənci həm bir vətəndaş, həm də bir vətən əsgəri, zabiti kimi ölkəmizin suverenliyinin, müstəqilliyinin, ərazi bütövlüyünün qorunması sahəsində fədakarlıq göstərir. Azərbaycanda uşaq və gənclərin fiziki və mənəvi tərbiyəsinin inkişafına böyük qayğı və diqqət olmasaydı, təbii ki, biz xalq olaraq öz gələcəyimizdən nigaran qalardıq. Ancaq dövlətin həyata keçirdiyi uğurlu uşaq və gənclər siyasəti nəticəsində ölkəmizdə milli düşüncəli, fiziki və mənəvi baxımdan sağlam nəsil formalaşır. Azərbaycan uşaq və gənclərinin sabahımıza daha ümidlə getməyə yolları açıqdır. Uşaq və gənclərimizin yolu hər zaman açıq olsun!
İradə SARIYEVA
Yazı Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun keçirdiyi müsabiqəyə təqdim edilir.
