Ərşad Hüseynov: “... bunlar müxtəlif tip nəqliyyat vasitələrinin fərqli kateqoriyalarının idarə edilməsi hüququnu dəqiqləşdirməyə yönəlib”
Azərbaycanda sürücülük vəsiqəsi kateqoriyaları dəyişdirilir. Bu, "Yol hərəkəti haqqında” Qanuna əlavə və dəyişikliklərdə yer alıb. Qanuna əlavə və dəyişiklik Azərbaycan Prezidenti tərəfindən irəli sürülüb. Layihəyə əsasən, qanunun 33-cü (Nəqliyyat vasitələrini idarəetmə hüququ) maddəsinin 3-cü bəndinə edilən əlavəyə görə, “A”, “B” və “C” kateqoriyaları ilə yanaşı, “B1” və “C1” altkateqoriyaları müəyyənləşir. Bu altkateqoriyaya aid olan nəqliyyat vasitələrini idarəetmə hüququ 18 yaşdan etibarən verilir.
4-cü bəndə edilən əlavəyə görə, “BE” kateqoriyası ilə yanaşı, “C1E” altkateqoriyası müəyyənləşdirilir. Bu altkateqoriyaya aid olan nəqliyyat vasitələrini idarəetmə hüququ 19 yaşdan etibarən verilir.
6-cı bəndə edilən əlavə və dəyişikliyə görə isə “D” kateqoriyası ilə yanaşı, “D1” altkateqoriyası müəyyənləşdirilir. Bu altkateqoriyaya aid olan nəqliyyat vasitələrini idarəetmə hüququ 23 yaşdan etibarən verilir.
Layihəyə görə “D1E” altkateqoriyası da müəyyənləşir və bu altkateqoriyaya aid nəqliyyat vasitələrini yaşı 25-dən 65-dək olan şəxslər idarə edə bilər. Eyni zamanda bu altkateqoriya “D” kateqoriyasına və ya “D1” altkateqoriyasına daxil olan nəqliyyat vasitələrini idarə etmək sahəsində təcrübə 2 ildən az olmamaq şərti ilə verilir.
Qeyd edək ki, layihə Milli Məclisin Hüquq siyasəti və dövlət quruculuğu komitəsinin növbəti iclasında müzakirəyə çıxarılacaq.
Sürücülük vəsiqəsi kateqoriyalarına ediləcək dəyişikliklə bağlı fikir bildirən nəqliyyat sahəsi üzrə ekspert Ərşad Hüseynov “Bakı-Xəbər”ə açıqlamasında qeyd etdi ki, sürücülük vəsiqələri beynəlxalq konvensiyaya uyğunlaşdırılmalıdır: “Sürücülük vəsiqəsinə ediləcək bütün dəyişikliklər bununla bağlıdır. Hazırda istifadə olunan sürücülük vəsiqəsində müəyyən uyğunsuzluqlar var. Sürücülük vəsiqəsində onun sahibinin şəxsiyyət vəsiqəsindəki fin kodu göstəriləcək. Bu, şəxsiyyətin eyniləşdirmə nömrəsi adlanır. Kiminsə gözündə problem varsa və o şəxs avtomobili eynəklə sürəcəksə, bu hal vəsiqədə göstəriləcək. Eynilə sürücülük vəsiqəsində əlil tanınma nişanı da olacaq.
Həmçinin, vəsiqədəki məlumatlarda latın əlifbasında olmayan hərflərin (ə, ı, ö, ü, ğ, ç, ş) transliterasiya edilməməsi məsələsi var. Bu layihə həmin problemi həll edir. Layihə qəbul edilib qüvvəyə mindikdən sonra sürücülük vəsiqələrimiz beynəlxalq səviyyədə tanınacaq”.
Həmsöhbətimiz altkateqoriyalarla bağlı bildirdi ki, konvensiyaya uyğun olaraq, sürücülük kateqoriyalarına B1, C1, D1, C1E, D1E əlavə olunacaq: “Bunlar müxtəlif tip nəqliyyat vasitələrinin fərqli kateqoriyalarının idarə edilməsi hüququnu dəqiqləşdirməyə yönəlib. B1 altkateqoriyası hazırda dünyada geniş yayılan kvadrisiklləri, D1 16 yaşadək sərnişin yeri olan mikroavtobusları idarə etmək üçündür”.
Ə.Hüseynov onu da bildirdi ki, sürücülük vəsiqəsinə ediləcək dəyişikliklər hazırda sürücülük vəsiqəsinə sahib olanlar üçün heç bir problem yaratmayacaq: “Kimsə sürücülük vəsiqəsi alarsa və ya onun istifadə müddəti bitərsə, o zaman həmin şəxsə yeni sürücülük vəsiqəsi veriləcək”.
Günel CƏLİLOVA
