Şəmsəddin Əliyev: “Hesab edirəm ki, təhsil sahəsində çalışan pedaqoji kollektiv bununla bağlı ciddi düşünməlidir”
“Azərbaycanda çox vaxt yetkinlik yaşına çatmayanlarla bağlı cinayətlərin sayı şişirdilir”. Sözügedən məsələ ilə bağlı yayılan məlumata görə, bunu Milli Məclisdə keçirilən “dəyirmi masa”da Daxili İşlər Nazirliyi Baş İctimai Təhlükəsizlik İdarəsinin şöbə rəisi Adıgözəl Adıgözəlov bildirib.
O bununla bağlı açıqlamasında qeyd edib ki, son 5 ildə yetkinlik yaşına çatmayan uşaqlara qarşı cinayətlərin sayında artım yoxdur: “Çox təəssüf ki, bu faktlar mediada şişirdilir”.
DİN rəsmisi yetkinlik yaşına çatmayanlara qarşı cinsi zorakılıqla bağlı faktların da şişirdildiyini bildirib. Onun sözlərinə görə, son 5 ildə bu statistikada artım yoxdur: “Təbii ki, dünyada cinayətlər var və Azərbaycan da dünyanın bir hissəsidir. İndiki zamanda hamımıza məlumdur ki, internet çox geniş yayılıb və hər bir uşaq internetdən rahat istifadə edir. Bəzən o fəsadlar da internet vasitəsilə yayılır”.
DİN rəsmisi onu da bildirib ki, son vaxtlar Azərbaycanda uşaqlar arasında aqressiya, psixoloji gərginliyin artmasına səbəb xaricdən daxil olan internet oyunları, o cümlədən digər vasitələrdir: “Bu artıq ciddi narahatlıq doğuran fakta çevrilib”.
Göründüyü kimi, sözügedən problemlə bağlı səslənən fikirlər indiki dövrdə yetərincə aktualdır. Çünki bir sıra xarici amillər yetkinlik yaşına çatmayan uşaqların psixologiyasına təsir göstərir. Bütün bunların fonunda, yetkinlik yaşına çatmayanlarla bağlı cinayətlərin sayının şişirdilməsi nədən irəli gəlir?
Məsələyə münasibət bildirən “Polisə Dəstək” İctimai Birliyinin rəhbəri Şəmsəddin Əliyevin sözlərinə görə, bəzi qeyri-peşəkar media orqanları belə hallara yol verirlər: “Yəni görürsən ki, səhvən statistik məlumatları qarışdırırlar. Ona görə də ola bilər ki, bəzi qeyri-peşəkar media orqanları bununla bağlı yayılan hesabata ciddi yanaşmırlar. Həddi-büluğa çatmamış şəxslər tərəfindən törədilən cinayətlərin statistik rəqəmlərinə diqqətsiz yanaşıb onu artım kimi göstərə bilərlər. Hesab edirəm ki, bu mümkün olan haldır. Peşəkar media bu məsələdə diqqətlidir. Hüquqşünas olaraq hesab edirəm ki, bununla bağlı hansısa artım varsa, bu, cəmiyyət və dövlət orqanları üçün narahatlıq doğuran haldır. Deməli, bunların ictimai münasibətlərə zidd addım atmasına təsir edən faktorlar, amillər var. Həmin faktorları araşdırıb tapmaq, aşkar etmək zərurəti yaranır. Ancaq bunu da tapmaq çox çətindir. Məsələn, həddi-büluğa çatmamış şəxslər narkotik maddələrin aludəçiləri sırasına daxil olurlarsa, bu, cəmiyyət üçün bir həyəcan siqnalıdır. Belələri müəyyən təsir dairəsinə düşəndən sonra bu kimi xoşagəlməz hallara yol verirlər. Hesab edirəm ki, təhsil sahəsində çalışan pedaqoji kollektiv bununla bağlı ciddi düşünməlidir. Ailə başçıları uşaqların tərbiyəsi ilə ciddi maraqlanmalıdırlar. Bütün bunlar bir-birilə sıx bağlı olan məsələlərdir. Bəzi saytlar bütün bunların fərqinə varmadan görürsən ki, yanlışlığa yol verirlər. Azərbaycan xalqının, hər bir cəmiyyətin gələcəyi bu yeniyetmələrdən ibarətdir. DİN-in Baş İctimai Təhlükəsizlik İdarəsi bu kimi hallara nəzarət edən qurumdur. O baxımdan hesab edirəm ki, şöbə rəisi Adıgözəl Adıgözəlovun bununla bağlı narahatlığında bir əsas var. O üzdən, bütün cəmiyyət bu məsələdə üzərinə düşən vəzifəni yerinə yetirməlidir”.
Vidadi ORDAHALLI
