Məhərrəm Zülfüqarlı: “Bu, neqativ halların aradan qaldırılmasına müsbət təsir göstərəcək”
Uşaqların I sinfə qəbulu zamanı qoyulan yaş məhdudiyyəti aradan qaldırılır. Belə ki, Azərbaycanda 6 yaşı təqvim ili ərzində (uşağın məktəbə getməli olduğu il) tamam olmayan uşaqların I sinfə qəbulu zamanı qoyulan yaş məhdudiyyəti ortadan götürülür.
Mlli Məclisin Elm və təhsil komitəsinin sədri İsa Həbibbəyli mətbuata açıqlamasında bildirib ki, ilin hansı ayında anadan olmasından asılı olmayaraq, təqvim ili ərzində 6 yaşı tamam olan bütün uşaqlar həmin ildə I sinfə qəbul olunacaq. Bununla bağlı “Təhsil haqqında” Qanuna yeni əlavələr edilir.
İ.Həbibbəyli qeyd edib ki, 6 yaşı təqvim ilinin sentyabr ayının 15-dək tamam olmayan uşaqların I sinfə qəbulu zamanı müəyyən bürokratik əngəllər olurdu: “Bəzən deyirdilər ki, uşağın I sinfə qəbulu üçün 5-6 ay çatmır, gərək uşağın 6 yaşı tamam olsun. Bu da narazılığa yol açırdı”.
İ.Həbibbəyli bildirib ki, əvvəllər ölkədə məktəbəhazırlıq qruplarının sayı kifayət qədər olmadığından, 6 yaşı tamam olmamış uşaqların I sinfə vaxtından əvvəl qəbulu üçün valideynlər xüsusi qaydada müraciət edirdilər. Bu müraciət əsasında uşaqlar xüsusi komissiyaların razılığı əsasında I sinfə cəlb edilirdilər.
Komitə sədri qeyd edib ki, qanuna edilən yeni dəyişiklik 5 yaşlıların hamısının məktəbəhazırlıq qruplarına cəlbinə imkan yaratmaqla yanaşı, 6 yaşı təqvim ilinin sonuna qədər tamam olan bütün uşaqların I sinfə qəbuluna imkan yaradacaq: “Belə olan halda, vaxtından əvvəl I sinfə qəbul üçün 6 yaşı tamam olmayan uşaqların istedadlarının xüsusi komissiyalar tərəfindən yoxlanılmasına lüzum qalmayacaq. Çünki, bütün hallarda, 5-6 yaşlıların hamısı maneəsiz təhsilə cəlb oluna biliəcək”.
Həqiqətən də əvvəllər bununla bağlı bəzi məhdudiyyətlər müəyyən neqativ hallara yol açırdı. Bu baxımdan sözügedən məhdudiyyətin aradan qaldırılmasına ekspertlər necə yanaşırlar? Məsələyə münasibət bildirən təhsil sahəsi üzrə ekspert Məhərrəm Zülfüqarlı sözügedən yeniliyi alqışladığını bildirdi. O bunu bir sıra amillərlə əlaqələndirdi: “Əvvəla sözügedən dəyişikliyi alqışlayıram. Məsələ ondadır ki, uşaqların I sinfə qəbulu ilə bağlı tətbiq olunan yaş məhdudiyyəti müəyyən neqativ hallara yol açırdı. Belə ki, bir-iki ay çatmayanda deyirdilər olmaz, başqa “məsələlər” işə qarışanda deyirdilər olar. Bu da, istər-istəməz, cəmiyyətdə yaxşı qarşılanmırdı. Eyni zamanda, şagird qəbulunda neqativ hallara yol açırdı. Təbii ki, bütün bunların aradan qaldırılması normaldır. Bu bizim körpə balaların oxumağına yaşıl işıq yandırır. O üzdən, buna ancaq sevinmək lazımdır. Təhsil nöqteyi-nəzərindən bunun bir sıra əhəmiyyəti var. Məsələn, görürsən ki, 6 yaşı tamam olmayıb, amma bağçada yüksək səviyyədə şeir deyir, yazıb-oxumağı bacarır. Belələrinin birinci sinfə getməsi təhsilin inkişafına müsbət təsir göstərir. Ona görə də qanunvericilikdə bununla bağlı edilən yeniliklərə müsbət baxıram. Biz maksimum çalışmalıyıq ki, bu kimi yersiz məhdudiyyətləri qanunvericilikdən çıxaraq. Ona görə ki, məhz belə məhdudiyyətlər neqativ hallara zəmin yaradır. Təhsilin inkişaf etdirilməsi çox önəmli məsələdir. Çünki cəmiyyətin inkişafı, əldə olunan elmi nailiyyətlər məhz təhsillə bağlıdır. O baxımdan hesab edirəm ki, bənzər məsələlər daim diqqət mərkəzində saxlanmalıdır”.
Vidadi ORDAHALLI
