Möhübbət Həsən oğlu Məhərrəmov keçdiyi şərəfli ömür yolu ilə bizim üçün əsl həyat məktəbi qoymaqla özü ölməzliyə, əbədiyyətə qovuşdu. Vətən məhəbbəti onun iç dünyasından, mənəvi aləmindən qaynaqlanırdı. Bütün arzularının başında doğma Azərbaycanı azad, bütöv və firavan görmək istəyi dururdu. Məhz elə buna görə də ona qurban getməklə şəhidlik zirvəsinə ucaldı. Və zaman-zaman yaşamaq, yaşatmaq üçün nəcib həyat amalı vətənə sevgi dastanı olub dillərə düşdü.
Dağlar diyarı Lerikdə Veri- Əliabadı adında bir kənd var. Bu qədim yurd yeri özünün el təəssübünü çəkən, halallığı sevən, çörəkli, mərd kişiləri sayəsində ad qoyub. Kəndin adamları ata-babadan yaxşılıq etməyi özlərinə insanlıq borcu bilir. Möhübbət 1974-cü ildə hər ocağından od götürməli, qeyrət içməli olan bu kənddə dünyaya gəlmişdi.
Halal elin yetirməsi Möhübbət Məhərrəmov orta məktəbdən sonra sovxoz texnikumuna daxil olur. Texnikumun birinci kursunu hələ bitirməmiş, vətənə oğulluq borcunu vermək üçün həqiqi hərbi xidmətə gedir. İlk döyüş yolu Ağdam rayonu, Güneybəyli kəndindən başlanır. Əlinə silah alıb erməni dığalarına qənim kəsilir. Bir neçə ağır, qanlı döyüşdə əsl igidlik göstərir, qorxu nə olduğunu bilmir. Həmişə öndə gedir, cəsarəti, vətənpərvərliyi ilə əsgər yoldaşlarına sanki döyüşdən-döyüşə qol-qanad verir. Bacarığı, əzmkarlığı, təbiətindəki halallıq, düzlük, səmimi münasibət qurmaq qabiliyyəti hərbi hissədə onu hamıya sevdirir. Mərdlikdə, qeyrətdə nümunə olur Möhübbət.
Möhübbət düşmənlə növbəti haqq savaşların birində özünü qoruya bilmir, cavan ömrü vaxtsız qırılır. Amma bu qısa ömür öz şərəf və qüruru ilə bitməz olur. Ucqar bir kənd yerində boya-başa çatan Möhübbət torpaq uğrunda göstərdiyi misilsiz qəhrəmanlığı sayəsində canından əziz sandığı Böyük Azərbaycandan şərəfli oğul adını qazanır.
Bəli, Möhübbət ömrü sağlığında qazanılan müqəddəs əməllərdə vətənə, millətə sədaqət simvolu olaraq davam edir. İndi onun əbədi yeri milyon-milyon insan ürəyidir. Qərinələr keçsə də, həyat dəyişsə də, odu-alovu milyonları isidə bilən saf hisslər, duyğular ocağına çevrilərək xatirəsi həmişə yaşayacaq.
Zəfər ORUCOĞLU, Azərbaycan Jurnalistlər Birliyinin üzvü
