Tahir Əmiraslanov: “Hətta bəyanat vermişik ki, bizim o proqramlarla heç bir əlaqəmiz yoxdur”
Azərbaycan televiziyalarında kulinariya verilişlərinə böyük üstünlük verilir. Hətta elə televiziya kanalı var ki, bir yox, bir neçə mətbəx proqramı təqdim edir. O proqramların səviyyəsi isə mütəxəssisləri qətiyyən qane etmir. Peşəkar kulinarlar hesab edirlər ki, TV-lərdə nümayiş olunan kulinariya verilişləri standartlara cavab vermir və bu proqramlar lisenziyasız yayımlanır.
Milli Kulinariya Mərkəzinin rəhbəri, Əməkdar mədəniyyət işçisi Tahir Əmiraslanov isə müsahibələrindən birində qeyd edib ki, mərkəz tərəfindən cəmi 2 kulinariya verilişinə lisenziya verilib, qalan verilişlər isə standartlara cavab vermədiyi üçün qurum tərəfindən onlara lisenziya verilməyib.
Bu gün Milli Kulinariya Mərkəzinin məsləhəti, icazəsi olmadan efirə çıxan kulinariya, mətbəx verilişləri ictimaiyyət tərəfindən geniş müzakirə edilir. Orada təqdim edilən xörəklər, bişmişlər, onları bişirən, hazırlayan kulinarlar mütəxəssisləri qane etmir.
Milli Kulinariya Mərkəzi TV-lərdə fəaliyyət göstərən kulinariya verilişlərinə lisenziyanı hansı şərtlər daxilində verir? TV proqramları mərkəzdən fəaliyyət lisenziyası almağa hansı səbəbdən cəhd göstərmirlər?
Milli Kulinariya Mərkəzinin prezidenti Tahir Əmiraslanov “Bakı-Xəbər”ə bildirdi ki, bu gün telekanallarda təqdim edilən kulinariya verilişləri milli kulinariya standartlarına cavab vermədiyi üçün onlar lisenziya ilə təmin olunmayıblar. T.Əmiraslanovun sözlərinə görə, mərkəz mütəmadi olaraq bu proqramları izləyir və standartlara cavab verən proqram varsa, onların özlərinin də xəbəri olmadan lisenziya təqdim edilir: “Biz iki proqrama lisenziya vermişik. O biri proqramlar bizə lisenziya üçün müraciət etməyiblər, etsələr belə, bilirlər ki, onlar lisenziya ala bilməzlər. Çünki onların təqdim etdiyi verilişin səviyyəsi çox aşağıdır. “Xəzər” televiziyasında yayımlanan “Ləziz səyahət” və “Nuş olsun” proqramlarına tanınma seritifikatı vermişik. Deyim ki, sertifikat almaq üçün heç o proqramlar özləri bizə müraciət etməmişdilər. Biz özümüz o verilişləri izlədik və səviyyəsi bizi qane etdiyi üçün, onlara tanınma sertifikatı, lisenziya verdik. Əgər hansısa bir verilişin seritifikatı yoxdursa, demək, tamaşaçı ona baxmağa vaxt sərf etməməlidir. Seritifikat üçün pul, vəsait tələb olunmur. Biz bu məsələdə heç bir maddi maraq güdmürük. Biz indi S.Xankişiyevin “Lider” kanalında təqdim etdiyi “Azərbaycan mətbəxi” proqramına lisenziya, tanınma sertifikatı verməyi planlaşdırırıq. Milli Kulinariya Mərkəzi o proqramı dəstəkləyir, bəyənir. İnternetdə də olan bəzi mətbəx verilişlərini bəyənirik, dəstəkləyirik. Ancaq bununla belə, bu sahədə ciddi problemlər mövcuddur. Özünə “usta” adı verib efirə çıxıb və xoşagəlməz işlərlə məşğul olan şəxslərə hər hansı bir dəstək vermirik. Belələri efirdə ağızlarına gələni danışır və sonra bundan ermənilər bizə qarşı istifadə edirlər. Televiziyalarda və internetdə yayımlanan bir çox veriliş ziyanlı fəaliyyətlə məşğuldur. Ziyanlı işlər görən kulinariya proqramlarına heç vaxt tanınma sertifikatı, lisenziya verə bilmərik. Bilirsiniz, bütün bu neqativ hallar cəmiyyəti çox ciddi narahat edir, biz də o proqramlara qarşı etirazımızı bildirmişik. Hətta mərkəz adından bəyanat vermişik ki, bizim o proqramlarla heç bir əlaqəmiz yoxdur. Onu da deyim ki, nə mən, nə də mənim mütəxəssislərim o proqramlara qatılmır. Bəzi işsiz-gücsüz, kulinariyaya aidiyyəti olmayan adamlar xaricdən veriliş adı oğurlayıb efirə çıxır, ziyanlı işlər görürlər. Yadınıza gəlirsə, cənab Prezident də dedi ki, kulinariya verilişlərinin səviyyəsi məni narahat edir. Amma, görünür, bir çox televiziya rəhbəri Prezidentin nə dediyini anlamayıb. O, açıq şəkildə dedi ki, bu proqramlar məni incidir və onlar mənim xoşuma gəlmir. Prezidentin sözü bütöv bir xalqın sözüdür, yeganə şəxsdir ki, ona bütün xalq səs verib. Bəzi televiziya rəhbərləri bundan nəticə çıxarmadı. Bu halda bəs biz nə edək? Biz bəzi proqramların yayımının qarşısını məhkəmə yolu ilə ala bildik, bəziləri ilə bağlı bəyanat verdik, ondan sonra fəaliyyətlərini dayandırdılar. Düzdür, televiziyalar bizə qarşı müəyyən qara təbliğat apardılar, ancaq ondan razı qaldıq ki, ermənilərin əlinə fakt verən bəzi proqramlar qapadıldı. Küçədən keçən adamları efirə çıxaranda, aşpaz kimi təqdim edəndə vəziyyət belə pis olacaq. Televiziyalar istəyir ki, heç bir pul ödəmədən kulinarları efirə dəvət etsinlər. Yaxşı aşpazın isə gündə televiziyada nə işi var? Çünki o hardasa işləyir, heç vaxt işini buraxıb verilişə gəlməz. Televiziyalar peşəkarlarla işləməlidirlər. “Xəzər” TV-də gedən “Ləzzət ovçusu” proqramına qarşı etiraz bəyanatı yaydıq və bu bəyanatı televiziyaya təqdim etdik. Təəssüf ki, onlar buna reaksiya vermədilər. Ancaq “Xəzər”də yayımlanan iki proqrama tanınma sertifikatı verdik. Sözümün canı odur ki, televiziyalar sertifikat üçün bizə müraciət etməsələr belə, biz keyfiyyətli verilişlərə özümüz qiymət veririk”.
T.Əmiraslanov qeyd etdi ki, televiziyaların kulinariya proqramları ilə bağlı xüsusi standartların qəbul edilməsi vacibdir. O, hesab edir ki, bu standartların qəbul edilməsi zəruridir, lakin televiziyalar bu işə dəstək olmurlar.
Milli Kulinariya Mərkəzinin televiziyalara təsir gücünün zəif olduğunu deyən T.Əmiraslanovun bildirdiyinə görə, mərkəz tərəfindən dəfələrlə televiziyalardakı neqativ kulinariya proqramları ilə bağlı Milli Televiziya və Radio Şurasına müraciət edilsə də, nəticəsi olmayıb: “Şura deyir ki, televiziyalar müstəqildir və biz onlara təsir edə bilmirik. Ancaq biz onları məhkəməyə verəndə istəyimizə nail oluruq. Qanunvericiliyə görə, istehlakçıların hüquqları qorunmalıdır və eyni zamanda da hər bir kəsin doğru-dürüst informasiya almaq hüququ var. Bu proqramlar bizim illərlə qurub yaratdıqlarımızı yerlə-yeksan edirlər. Özlərini mətbəx biliciləri kimi təqdim edənlər, əslində, çox ziyanlı işlərlə məşğul olurlar”.
İradə SARIYEVA
