Bakının Sahil qəsəbəsində yaşayan Güllü Mirhəsən qızı Hüseynova səhiyyə naziri Oqtay Şirəliyevə, ATU-nun Cərrahiyyə Klinikasının baş həkimi Rauf Ağayevə, cərrah-ginekoloq Nigar Axundovaya yazdığı açıq məktubu redaksiyamıza təqdim edib.
G.Hüseynova səyiyyə sistemində savadlı və qaykeş, xəstələrə həssaslıqla yanaşan həkimlər olduğu üçün O.Şirəliyevə minnətdarlıq edir. “Belə savadlı həkimlərinizin olduğu üçün Sizə təşəkkür edirəm. Həkimləriniz həm xəstələrin sağlamlığının qeydinə qalır, həm də onlarla xoş ünsiyyət qurmağı bacarır. Bəzən xəstələr çox dözülməz olur, həkimlər isə onların qayğısını çəkir. Bunda Sizin xüsusi əməyiniz var. Çünki onlar Sizin yetirmələrinizdir. Belə həkimlərdən biri də ginekoloq, cərrah, 26 illik həkimlik təcrübəsinə malik olan savadlı, həssas Nigar xanım Namiq qızı Axundovadır. Nigar Axundova sonsuzluq problemi ilə bağlı namizədlik dissertasiyası müdafiə edib və hazırda isə ginekologiyada endostopik cərrahiyyə mövzusunda doktorluq işinin müdafiəsinə hazırlaşır.
N.Axundova 1996-cı ildə Topçubaşov adına xəstəxanada uroginekologiya şöbəsinə rəhbərlik edib. Sonra Mərkəzi Klinik Xəstəxanada, son 13 ili isə Akuşerlik və Ginekologiya Elmi-Tədqiqat İnstitutuna rəhbərlik edib. Eyni zamanda 1 saylı Doğum Evində, Kaspian Hospitalında işləyib. Buradan isə ATU-nun Cərrahiyyə Klinkasına dəvət olunub və hazırda orada işləyir”.
Qızının xəstəliyi ilə bağlı N.Axundovanın yanına getdiyini və ondan sonsuz qayğı gördüyünü qeyd edən üç oğul övladını itirmiş ana həkimin xeyirxah əməllərinin unudulmaz olduğunu vurğulayır.
O həmçinin yazır ki, N.Axundova ekstrokorpal dölləndirmənin yeni konsepsiyası və sonsuzluğun müalicəsi üzrə daim ölkə hüdudlarından kənarda təkminləşdirmə kursları keçib. “Mən üç oğul övladımı itirmişəm. Qızımın problemi ilə bağlı onun qəbuluna getdik. Nigar həkim bizim faciəmiz və maddi vəziyyətimiz haqqında eşitdikdə çox mütəəssir oldu. Operativ şəkildə analiz etdirərək qızımı heç bir ödənişsiz əməliyyata götürdü. Əməliyyat çox uğurlu keçdi. Mən onun bu yaxşlığını heç zaman unutmayacağam.
G.Hüseynova məktubunu “Sonda Nigar xanıma və ailəsinə ən xoş arzularımı bildirirəm” sözlərilə bitirir.
Xəbər Xidməti
