Torpaq və millət yolunda öz istəyi ilə şirin canından keçən vətənin igid övladlarından biri də Natiq Kərbəlayi Şirəli oğlu Aslanovdur. O, az yaşda böyük, mənalarla dolu ömür qazandı. Bütöv Azərbaycanın qəhrəmanlıq salnaməsinə qoyduğu imzası bu, müdirik xalq yaşadıqca silinməz, unudulmaz olacaq.
Haqqında danışmaq istədiyim Natiq Aslanov Lənkəran rayonu, Ləj kəndində işıqlı dünyaya göz açmışdı. Onu deyim ki, ərənlərin yuva saldığı yerdə doğma yurda bağlılıq, öz halal torpağına məhəbbət göstərib onunla ucalmaq ululardan qalma ən müqəddəs adətdir. Natiq də bu nəcib məqsədlərə tapınmaqla comərd, istiqanlı böyüyür. Yetkinlik cağına çatanda erməni dığalarının Azərbaycan torpaqlarına başlayan hərbi təcavüzü hər bir qeyrətli vətən oğlu kimi, onu da hədsiz narahat edir. Köksündə çırpınan ürəyi ağır gündə torpağa sipər olmaq eşqi ilə alışır, yanır.
1992-ciilin iyununda Natiqin çox arzuladığı gün gəlib çatır. O, həqiqi hərbi xidmətə çağırılır. Bakı Hərbi Polis Alayının tərkibində ön cəbhəyə- düşmənlə haqq savaşına yola düşür. Laçın və Ağdam uğrunda qorxmadan, ölümün gözünə dik baxmaqla qarşı tərəfin üstünə gedir. Necə mərd, vətənpərvər olduğunu torpaq naminə bu döyüşdə yaxşı da sübut edir. Həm də xarakterindəki əsl döyüşçüyə xas olan müsbət keyfiyyətləri, daxildən gələn mənəvi saflığı onu dostlarının gözündə ucaldır.
Vətən oğlu 1993-cü ildə Füzuli rayonu, Bəhmənli kəndində gedən döyüşlərdə fərqlənir. Dostları ilə birgə düşmənə sarsıdıcı zərbələr vurur, ermənilərin çoxlu sayda əsgəri məhv edilir. Taleyində olan şəhidlik şərəfi də elə bu döyüşdə onu əlçatmaz, ünyetməz uca zirvəyə qaldırır. Beləcə adı dillərdə dastan, gələcək nəsillərə örnək olmaqla Natiqin ömür yolu tarixin qəhrəmanlıq səhifəsinə yazılır.
İndi bu 45 yaşlı qəhrəmanla bütün Lənkəran torpağı fəxr edir. Harada bir Günəş müqəddəsliyi var, Natiqin sorağı oradan gəlir. Adı şirin nəğməyə dönərək dillərdən düşmür. Oxuduğu məktəb onun adını daşıyır. Məktəb qarşısında büstü qoyulmuş, xatirə guşəsi yaradılibdır. Natiq ürəklərdə vətənə sədaqət rəmzinə çevrilərək ölməzdir.
Zəfər ORUCOĞLU
Azərbaycan Jurnalistlər Birliyinin üzvü.
