Nəsimi rayonunda Xalq Cumhuriyyətinin 100 illiyinə həsr olunmuş tədbir keçirilib.
Nəsimi rayon İcra hakimiyyətindən “Bakı Xəbər”ə verilən məlumata görə, “Möhkəm təməllər üzərində sağlam ailə mühitinin formalaşması” mövzusunda keçirilən dəyirmi masada gənclər, yeni ailə qurmuş cütlüklər, 40-50 il birgə ömür sürmüş nümunəvi ailələr iştirak edib.
Dəyirmi masanı giriş sözü ilə açan Nəsimi rayon İcra Hakimiyyəti başçısının birinci müavini Gülarə Verdiyeva Azərbaycan Xalq Cumhuriyyətinin 100 illiyi münasibətilə rayonda keçirilən silsilə tədbirlər barədə məlumat verərək bildirib ki, milli-mənəvi dəyərlərimizin qorunması istiqamətində aparılan işlər dövlətiin prioritet vəzifələrindən biridir. Bu istiqamətdə görülən çoxşaxəli tədbirlər, Prezident tərəfindən imzalanan Sərəncamlar sırasında gənc ailələrin mənzillə təminatı istiqamətində gerçəkləşdirilən layihələr isə gənc Azərbaycan ailələrinin möhkəmləndirilməsinə böyük tövhə verəcək.
Daha sonra Ədliyyə Nazirliyinin Vətəndaşlıq Vəziyyəti Aktlarının Reyestr Xidmətinin rəisi Reyhanə Kərimova çıxış edərək bildirib ki, bü yöndə keçirilən tədbirlərin gənc ailələrin möhkəmlənməsində xüsusi əhəmiyyəti var:”Azərbaycanda ailə institutunun sütunları böyüyə hörmət, ailə başçısına sədaqət , qarşılıqlı sevgi və digər dəyərlərə söykənir. Amma dəyişən zaman, müasir inkişaf, qloballaşma, heç şübhəsiz, kiçik dövlət modeli sayıla biləcək Azərbaycan ailələrinə də öz təsirini göstərib. Bir həqiqət var ki,bu gün bütün dünyada boşanmaların sayı çoxalıb. Bunun əsas səbəblərindən biri də gənc cütlüklərin əsl ailə barədə biliklərinin olmamasıdır. Həmçinin ailələrin dağılmasına səbəb olan amillərin biri də gənc ailələrə kənar müdaxilələrin olmasıdır. Sosial dayağımız olan gənc ailələrin qorunması üçün hər birimiz üzərimizə düşən vəzifələri layiqincə yerinə yetirməliyik”.
Tədbirdə Azərbaycan Respublikası Vəkillər Kollegiyasının Rəyasət Heyətinin üzvü Sima Yaqubova da çıxış edərək bildirib ki, ailə dövlətin özəyidirvə ailədə formalaşan münasibətlərlə cəmiyyətdəki münasibətlər arasında dialektik bağlılıq var.
Ədliyyə Nazirliyi tərəfindən Qeydiyyat şöbələrinə cəlb olunmuş psixoloq Yeganə Özçələbi Azərbaycan ailələrinin dağılmasının səbəbləri barədə fikir bildirib. 20 saylı şəhər Poliklinikasının baş həkiminin müavini Nəzakət Həsənova isə diqqəti 2015-ci ildən başlayaraq Prezident İlham Əliyevin tapşırığı ilə gənclərin nikah öncəsi tibbi müayinədən keçirilməsinə başlanmasına çəkib. Bildirib ki, ailə həyatı qurmuş çütlüklərdən dünyaya gələn uşaqların sağlam doğulmasında bu tibbi müayinələrin əhəmiyyəti böyükdür.
Tədbir rayon ərazisində yaşayan ahıl yaşlı cütlüklərin həyat təcrübələri barədə danışıqlarla davam edib.
