Çingiz İsmayılov: “İnteraktiv turizm təbliğat xarakterlidir, turisti cəlb etmək məqsədilə bəzən bu tip turlardan istifadə olunur” Bahadur Bilalov: “Azərbaycanın toxuculuq sənəti barədə virtual aləmdə məlumat əldə edən turist bununla əyani şəkildə tanış olmaq istəyəcək”
Turizm sektorunu inkişaf etdirmək üçün Azərbaycanda turistlərə maraqlı turizm növü öyrədilir. Azərbaycanda interaktiv turizm növünə həm yerli, həm də xarici turistlər maraq göstərirlər. Qala Dövlət Tarix Etnoqrafiya Qoruğunun direktoru Məlahət Fərəcova yerli mediaya açıqlamasında bildirib ki, hazırda interaktiv turlar xalçaçılıq, dulusçuluq, nalbənd, mətbəxdə yuxa yayma üzrə təşkil edilir.
İnteraktiv turların daha çox əvvəldən sifariş edildiyini deyən M.Fərəcova əlavə edib ki, bu turlar zamanı qoruğu ziyarət edən turistlərə ustadlar tərəfindən Azərbaycanın qədim sənətkarlığının sirləri öyrədilir: "Məsələn, dulusçu yanına gedən turist orada saxsıdan nəsə düzəldir, xalçaçının yanına gedən turistə xalça toxumaq öyrədilir. Mətbəxə gedən turist ustanın köməyi ilə mətbəxdə lavaş yayır və onu sac üzərində bişirir. Dəmirçi yanına gedən turistə qədim vaxtlarda dəmirin necə döyüldüyü göstərilir. "Qala"ya gələn əcnəbi turistlər daha çox dulusçuluq və yayma sənəti ilə maraqlanırlar. Çin turistləri isə xalçaçılığa daha çox maraq göstərirlər. Ümumilikdə, qoruğu ziyarət edən turistlərin sayı artıb. Qoruğa gələn turistlər yeni interaktiv turizm xidmətlərinin yaradılmasını da təklif edirlər. Hazırda yeni interaktiv turların hazırlanması üzərində iş aparılır”.
Ekspertlərin fikrincə, interaktiv turizm bu sektorun inkişafına daha da müsbət təsir göstərəcək.
Turizm sahəsi üzrə ekspert Çingiz İsmayılov bizimlə söhbətində bildirdi ki, interaktiv turizm təbliğat xarakterlidir: “Turisti cəlb etmək məqsədilə bəzən bu tip turlardan istifadə olunur. İnteraktiv turizm növünə tək yerli turistlər deyil, eyni zamanda xaricilər də maraq göstərirlər. Turizmi təbliğ etməyin müxtəlif üsulları var. Onlardan biri də interaktiv turizmdir”.
Həmsöhbətimizin sözlərinə görə, bir qisim turist ölkəni gəzməklə yanaşı, həmin bölgəyə məxsus nəsə öyrənmək istəyir: “Belə olan halda, turist həm vəsait xərcləyir, həm də ölkənin tanıdılmasında özü təşəbbüs göstərir. Öyrəndiyi sahə ilə bağlı öz ölkəsində yaxınlarına məlumat verir. Beləliklə, ölkəyə gələn turistlərin sayı artır”.
Turizm sahəsi üzrə ekspert Bahadur Bilalov “Bakı-Xəbər”ə açıqlamasında dedi ki, turizmin inkişafı istiqamətində atılan hər bir addım ölkəyə maraq oyadır. Bu səbəbdən də hesab edirəm ki, interaktiv turizm reklamın bir formasıdır: “Hesab edirəm ki, Azərbaycanın toxuculuq sənəti barədə virtual aləmdə məlumat əldə edən turist bununla əyani şəkildə tanış olmaq istəyəcək. Söhbət tək toxuculuq və ya xalçaçılıq sənətindən getmir, istənilən interaktiv turizm əcnəbilərin diqqətinə səbəb olur. Mütləq şəkildə həmin şəxs Azərbaycana səfər edəcək. Hesab edirəm ki, bu tip tədbir ölkəyə gələn turistlərin sayına da təsir göstərəcək”.
Günel CƏLİLOVA
