Mais Ağayev: “Ciddi zərurət yaranarsa, daşıyıcılara kondisionerin qoşulması ilə bağlı göstəriş veriləcək” Azər Allahverənov: “Bir qayda olaraq, avtobuslarda isti havalarda kondisionerlərdən istifadə edilməlidir”
Havalar isindikcə, ictimai nəqliyyatdan istifadə edənləri narahat edən başlıca problem avtobuslarda kondisioner sisteminin işləyib-işləməməsidir. Avtobuslarda sərnişinlər sıx olduğu zaman problem daha da böyüyür. Sərnişinlə sürücü arasında yaranan mübahisəyə səbəb avtobusda kondisionerin işlək vəziyyətə gətirilməməsidir.
Bununla yanaşı, bəzi nəqliyyat vasitələrinin pəncərələri tam açılmadığı üçün, avtobusun içərisinə az hava daxil olur. İçəridə təmiz hava azaldığından, sərnişinlər buna narazılıq edir.
Sərnişinlər sürücülərdən kondisioneri işlək vəziyyətə gətirməməsinin səbəbini soruşduqda onlara icazənin verilmədiyini bildirirlər.
Aidiyyəti qurumlar isə avtobuslarda kondisionerin iyunun 1-dən qoşulacağını bildirirlər.
Maraqlıdır, o vaxta qədər havanın temperaturu daha da yüksələrsə, o zaman da kondisionerlər qoşulmayacaq?
Bakı Nəqliyyat Agentliyinin mətbuat xidmətinin rəhbəri Mais Ağayev “Bakı-Xəbər”ə açıqlamasında qeyd etdi ki, ciddi zərurət yaranarsa, daşıyıcılara kondisionerin qoşulması ilə bağlı göstəriş veriləcək. Bəllidir ki, hələ yay rejiminə keçid olmayıb. Ancaq yay rejiminə keçiddən öncə hava daha da istiləşərsə, o zaman avtobuslarda kondisionerlər işlək vəziyyətə salınacaq”.
Ekspert Azər Allahverənovun sözlərinə görə, bir qayda olaraq, avtobuslar isti havalarda kondisionerlərdən istifadə etməlidir: “İkincisi, elə avtobuslar var ki, orada kondisionerlər nasaz vəziyyətdədir və ya ümumiyyətlə, yoxdur. Belə olduğu halda, həmin avtobuslarda kondisionerin təmir-təchiz olunması ilə bağlı zəruri addımlar atılmalıdır. Bu, xüsusi nəzarət altına götürülməli məsələdir”.
Həmsöhbətimiz qeyd etdi ki, avtobuslarda mövcud olan nöqsanlara görə cərimələrin tətbiq olunması nəzərdə tutulmayıb: “Məlumat üçün bildirim ki, avtobuslarda lisenziya məsələsi var. Avtobuslara lisenziya verilən zaman avtobusun texniki konstruksiyasında nəzərdə tutulan tələblərə diqqət yetirilir. Əgər həmin tələblərlə bağlı hər hansı çatışmazlıq varsa, onun aradan qaldırılması tövsiyə olunur. Yalnız bundan sonra lisenziya verilir. O ki qaldı cərimə sanksiyalarına, oturacaqların çıxarılması və digər məsələlər, bu, avtobusun konstruksiyasına müdaxilə kimi dəyərləndirilir. Ona görə də inzibati xəta hesab olunur və onun dərəcəsindən asılı olaraq, həmin avtobusun mənsub olduğu hüquqi və ya fiziki şəxs cərimə sansksiyasına məruz qalır. Avtobusa müdaxilə olub kondisioner çıxarılıbsa, buna görə cərimə düşür, amma işləmirsə, yoxdursa, cərimə olunmur”.
Günel CƏLİLOVA
