Adil Qeybulla: “… serebral iflic, xromosom anomaliyası və digər xəstəliklərin səbəbləri araşdırılar və mümkün profilaktik tədbirlərin görülməsi əlil uşaqların dünyaya gəlişinin qarşısını alar”
Məlum olduğu kimi, Prezident İlham Əliyev “Uşaqlıq dövrünə xas olan əlilliyin erkən profilaktikası və müalicəsi üzrə 2018–2020-ci illər üçün Milli Fəaliyyət Planı”nın təsdiq edilməsi haqqında Sərəncam imzalayıb. Səhiyyə Nazirliyinə sərəncamın 1-ci hissəsi ilə təsdiq edilən Milli Fəaliyyət Planında nəzərdə tutulmuş tədbirlərin icrasını əlaqələndirmək, nəzərdə tutulmuş tədbirlərin icrasının gedişi barədə ildə bir dəfə Azərbaycan Respublikasının Prezidentinə məlumat vermək tapşırılıb.
“Uşaqlıq dövrünə xas olan əlilliyin erkən profilaktikası və müalicəsi üzrə 2018–2020-ci illər üçün Milli Fəaliyyət Planı”nın təsdiq edilməsi barədə Sərəncamın imzalanmasına münasibət bildirən professor, tibb sahəsi üzrə ekspert Adil Qeybulla “Bakı-Xəbər”ə açıqlamasında qeyd etdi ki, uşaqlıq dövrünə xas olan əlilliyin erkən profilaktikası sosial müdafiənin mühüm elementlərindən biridir: “Qeyd olunan sərəncamın imzalanması əlil uşaqlara cəmiyyətdə qayğının göstərilməsində xüsusi əhəmiyyət kəsb edir. Hesab edirəm ki, bu tip xəstələrin himayəyə götürülməsi və onların erkən profilaktikasına başlanması ən azı onların sosial, fiziki reabilitasiyası baxımından xeyli nailiyyət deməkdir”.
A.Qeybullanın sözlərinə görə, Milli Fəaliyyət Planının təsdiq edilməsi haqqında sərəncam imzalanması təqdirəlayiqdir. Sadəcə, bu qərarın həyata keçirilməsi və onun real nəticəsinin olması arzuolunandır: “Fəaliyyət Planının işlək mexanizmini qurmaq lazımdır. Xatırladım ki, 25 il öncə Travmatologiya İnstitutunda ana bətnində olan skelet anomaliyalarla bağlı xeyli iş aparıldı. Təcrübə göstərdi ki, bir çox uşaqda skelet anomaliyaları var. Bu hal gələcəkdə çox ciddi əlilliyə də səbəb ola bilər. Qeyd edim ki, uşaqlarda döş qəfəsinin deformasiyaya uğraması, skolioz kimi xəstəliklər, serebral iflic, xromosom anomaliyası və digər xəstəliklər vaxtında qeydə alınır. Bu və digər xəstəliklərin səbəbləri araşdırılar və mümkün profilaktik tədbirlərin görülməsi ilə əlil uşaqların dünyaya gəlişinin qarşısı alınar. Doğularsa belə, onun vaxtında reabilitasiya olunması da mümkün olar. Bu baxımdan sərəncamın işlək mexanizmi qurularsa, əhali ondan fayda görər”.
Günel CƏLİLOVA
