Həyatı dərk etdiyi gündən doğma torpağa, vətənə bağlanan Elxan Həsənağa oğlu Fərəcov cəllad xislətli erməni dığaların nankorluğunu görəndə qəzəbdən özünə yer tapa bilmirdi. 1993-cü ildə 18 yaşı tamam olanda müdrik keçmişi ilə dünyaya səs salan vətəni Azərbaycan ən ağır günlərini yaşayırdı.
Ən əsası Elxan Milli Ordu Sıralarına çağırılan zaman müqəddəs vətən torpağında döyüşlərin qızğın çağı idi. Torpağın başına nələr gəlmirdi ? O, ər oğlundan imdad diləyirdi. Odur ki, vətəni üçün doğulan bütün oğullar tək Elxan da, qısa döyüş hazırlığı keçəndən sonra, birbaşa ön cəbhəyə yollanır. Kəlbəcər rayonunda keçirilən döyüş əməliyyatında mənfur düşmənə sarsıdıcı zərbələr vurmaqla özünü qorxmaz bir igid kimi göstərir.
Vətən sevdalısı Elxan Fərəcov bir müddət sonra eyni məhəbbətlə Tərtər rayonunda xidmətini davam edir. Ön xəttə olmaqla şərəf duyur və vətənin çətin günündə onun bütövlüyünü qoruması naminə səngərdə ləyaqətlə dayanır. Yurdun mərd igidi hər dəfə döyüşə girəndə onun şücaəti, qüdrəti qarşısında düşmən sarsılır. Vətən məhəbbəti, yurd təəssübkeşliyi döyüşdən-döyüşə ona yeni bir güc, qüvvə verir.
Canını vətənin azadlığı naminə qurban qoyan E. Fərəcovun axırıncı döyüş yeri Murov olur. Son nəfəsədək düşmənlə mübarizə aparır. Erməni dığaları qarşısında məğlub olmağı şəninə sığışdırmır. Ölümün gözünə dik baxmaqla neçə-neçə erməni faşisti gəbərdir. Torpaq naminə özü qəhrəmancasına şəhid olsa da, düşməni məğlub edir...
Haqqında danışdığım Elxan Fərəcov dağlar diyarı Lerik rayonunun Qışlaq kəndində mayası halallıqdan tutulmuş, ləyaqətli bir ailə də boya-başa çatmışdı. O, xalqı, vətəni yaşatmaq üçün özü elə bu şərəfli ölüm yolunu seçmişdi. İndi 24 ildir cismən aramızda görünmür. Qaldı ki, o, yen də yaşayır. Özü də əbədiyaşar sevgidən pay tutmuş haqq boylanan bir pak varlıq kimi. Belə bir ucalığı nail olanlar vətən durduqca dururlar.
Bəli, Elxanın ömür yolu qısa olsa da, amma tarixin salnaməsində bitməzdir. Elxan onu vətənə qurban verib. Qışlaq camaatı öz igid oğlunu tez-tez yad edir, gənc nəslə nümunə göstərir.
Zəfər ORUCOĞLU, Azərbaycan Jurnalistlər Birliyinin üzvü
