Şəmsəddin Əliyev: “Bu onların səmərəli fəaliyyətinə stimul yaradacaq”
“Son 15 ildə Azərbaycanda polis əməkdaşlarının rütbə və vəzifə maaşları 16 dəfə artıb”. Bunu "Azərbaycan" qəzetinə müsahibəsində daxili işlər naziri, general-polkovnik Ramil Usubov deyib.
O qeyd edib ki, bu müddət ərzində maaşların artırılması ilə bağlı 14 sərəncam imzalanıb: “Prezident İlham Əliyevin daxili işlər orqanlarına böyük dəstəyi, himayədarlığı bizə xidməti fəaliyyətimizdə əsaslı dəstək, yüksək mənəvi stimul verir. Son 15 ildə bəzilərinin təməlqoyma və ya açılış mərasimlərində Prezidentin şəxsən iştirak etdiyi yüzlərlə obyektin tikintisi və ya yenidən qurulması başa çatdırılıb, minlərlə nəqliyyat vasitəsi, xüsusi texnika alınıb. Sahə polis məntəqələrindən baş idarələrədək bütün inzibati xidmət müəssisələri yenilənib, maddi-texniki təminatı yüksəldilib, informasiya texnologiyaları ilə təchizatı yüksək səviyyəyə çatıb. Bu müddətdə vəzifə və rütbəyə görə maaşların artırılması ilə bağlı 14 sərəncam imzalanıb və nəticədə əməkhaqları orta hesabla 16 dəfə artıb".
Nazir qeyd edib ki, şəxsi heyətin gərgin əməyi və fədakar xidməti dövlət başçısı İlham Əliyev tərəfindən yüksək qiymətləndirilərək, ötən 15 ildə 626 əməkdaş dövlət mükafatları ilə təltif olunub, 44 rəhbər vəzifəli şəxs ali xüsusi rütbələrə layiq görülüb".
Bəllidir ki, polislər ölkənin ictimai asayişini qoruyurlar. Olduqca ağır iş rejimində çalışan polis əməkdaşlarının əməkhaqlarının artırılmasına ehtiyac var.
“Polisə Dəstək” İctimai Birliyinin rəhbəri Şəmsəddin Əliyev “Bakı-Xəbər”ə açıqlamasında qeyd etdi ki, bu il həm Azərbaycan Xalq Cumhuriyyətinin və polisinin 100 illiyi qeyd olunacaq: “Məlumat üçün bildirim ki, Cumhuriyyətin vaxtında ilk olaraq Üzeyir Hacıbəyov parlamentə müraciət etmişdi ki, polis əməkdaşlarının əməkhaqlarının artırılmasına zərurət var. Onun müraciətində qeyd olunurdu ki, polisin problemləri həll olunmasa, o, cinayətkarlıqla mübarizədə səmərəli fəaliyyət göstərməkdə çətinlik çəkəcək. Doğrudan da polisin sosial qayğıları öz həllini tapmasa, bu hal cinayətlərin qısa müddətdə “isti izlərlə” açılmasına öz təsirini göstərə bilər”.
Həmsöhbətimizin sözlərinə görə, bəzən polisin şəxsi heyətinin sayının yüksək olduğunu səbəb gətirərək onların əməkhaqqının artırılmasına tərəddüd edirlər: “Polis əməkdaşlarının əməkhaqqının artılmasına ehtiyac var. Hətta mərhum prezident Heydər Əliyev də çıxışında bildirmişdi ki, o polisin əməkhaqqını kifayət qədər artıracaq ki, onların gözü kiminsə əlində və cibində olmasın. Nəzərə almaq lazımdır ki, ölkədə kifayət qədər güclü islahatlar keçirilir. Cinayətkarlıqla mübarizə siyasətinin həyata keçirilməsində yetərli sayda polis səfərbər olunub. Polisin istirahəti yoxdur. Cinayət baş verirsə, polis əməkdaşı istirahət etmədən öz işini layiqincə icra edir. Bu səbəbdən hesab edirəm ki, polisin əməkhaqqının artırılmasına zərurət var. Artım onların səmərəli fəaliyyətinə stimul yaradacaq”.
Günel CƏLİLOVA
