Mayın 8-də Azərbaycan Həmkarlar İttifaqları Konfederasiyasının sədri, Milli Məclisin üzvü, Beynəlxalq Həmkarlar İttifaqları Konfederasiyasının vitse-prezidenti Səttar Möhbalıyev mayın 7-8-də Bakıda «Təhsildə gender bərabərliyinin gücləndirilməsi» mövzusunda keçirilmiş plenar iclasın təşkilatçısı olan Təhsil üzrə Avropa Həmkarlar İttifaqları Komitəsinin direktoru Susan Flokeni və qurumun bürosunun üzvü Mike Jenningsi qəbul edib.
Səttar Möhbalıyev əvvəlcə qonaqlara iclası yüksək səviyyədə keçirdiklərinə görə təşəkkürünü bildirib. Deyib ki, düşünürəm Azərbaycanda belə tədbirlərin davamı olacaq. Ola bilsin ki, növbəti tədbir ekspertlər səviyyəsində keçirilsin. Biz həmişə sizə dəstək verməyə hazırıq.
S.Floken deyib ki, bu iclas da əvvəlkilər kimi uğurlu keçdi. Gözlənilən nəticəyə nail olundu:”Şəxsən Sizin dəstəyiniz tədbirin sanbalını qat-qat artırdı. AHİK sədri kimi ölkə ictimaiyyəti arasında qazandığınız hörmətin nəticəsidir ki, iclasda həmkarlar ittifaqı liderləri, fəalları ilə yanaşı hökumət nümayəndələri də iştirak edirdi.
Biz iclasda sizinlə günümüzün çox mühüm, aktual problemlərini gündəmə gətirdik və birlikdə çıxış yolu axtardıq. Təhsildə hər iki cinsin nümayəndələri üçün eyni şəraitin yaradılması, müəllimlərin daimi iş yerləri ilə təminatı, şagirdlərin təhsili və sair məsələlər ətrafında fikir mübadiləsi aparıldı. Hörmətli Səttar Möhbalıyev, mən də güman edirəm ki, bu tədbir gələcək müştərək layihələrimizin başlanğıcıdır”.
Avropa Həmkarlar İttifaqları Komitəsinin büro üzvü Mike Jennings isə Bakıda olduğu qısa müddətdə aldığı təəssüratları bölüşüb. Deyib ki, «səmimi», «dostcasına qarşılama» ifadələri Avropa ölkələrində də işlədilir. Amma orada bu sözlər protokol xarakteri daşıyır. “Biz Sizin təşkilatınızın simasında həqiqi dostluq və səmimiyyət gördük. Bu hisslər xalqınızın xislətindən irəli gəlir”.
Görüşdə qitə ölkələri həmkarlar ittifaqlarında gedən proseslərə də toxunulub. Susan Floken bəzi MDB ölkələrində həmkarlar ittifaqı mərkəzlərinin beynəlxalq normalara əməl etmədiyini, demokratiya prinsiplərini pozduğunu deyib. Həmin təşkilatların fəaliyyətlərini demokratik əsaslar üzərində qurmasında, regionun ən nüfuzlu təşkilatı kimi, AHİK-in köməyinə böyük ehtiyac duyulduğunu diqqətə çatdırıb: «Hörmətli sədr, Siz böyük təcrübəyə maliksiniz, dünya, Avropa həmkarlar ittifaqı hərəkatının aparıcı simalarındansınız. Rəhbərlik etdiyiniz AHİK bütün beynəlxalq qurumlar tərəfindən demokratiyanın bayraqdarlarından biri kimi tanınır. Güman edirik ki, region həmkarlar ittifaqları mərkəzləri üçün Sizin m əsələhətləriniz həlledici rol oynayar. Siz onları öz təşkilatınızın nümunəsi əsasında demokratiyanın faydasına inandıra bilərsiniz» - deyə S.Floken Səttar Möhbalıyevə müraciət edib.
S.Möhbalıyev böyük məmnuniyyətlə bölgə həmkarlar ittifaqlarında demokratiyanın həlledici amilə çevrilməsi işində öz qüvvəsini sərf etməyə hazır olduğunu bildirərək deyib ki, istər Qazaxıstanda, istərsə də digər ölkələrdə həmkarlar ittifaqı liderləri ilə ikitərəfli danışıqlar aparacaq, dünya həmkarlar ittifaqı hərəkatından təcrid olunmağın fəsadlarını diqqətə çatdıracaq.
“Amma beynəlxalq qurumlar, o cümlədən Sizin təşkilat milli həmkarlar ittifaqı mərkəzlərinə yanaşmada dəyişikliklər etməlidir. Üzvlüyə qəbul məsələsinə yenidən baxılmalıdır. Bildiyiniz kimi, MDB ölkələri həmkarlar ittifaqı keçmiş SSRİ-nin şinelindən çıxıb. Onların birdən-birə Avropa demokratiyasına yiyələnməsi reallıq baxımından qeyri-mümkündür. Beynəlxalq təşkilatlar bu amili nəzərə almalıdır. Milli mərkəzləri sıralarına cəlb etməlidirlər ki, onları beynəlxalq hüquq əsasında fəaliyyət göstərməyə yönəltmək imkanı əldə etsinlər.
Səttar Möhbalıyev deyib ki, müstəqilliyimizin ilk illərində biz də təzyiqlərlə üzləşdik:”Müstəqil fəaliyyət göstərməyimizə imkan vermirdilər. Biz isə diqtə altında işləmək istəmirdik. Struktur dəyişikliyi apardıq. Konfederasiya formasında yenidən birləşdik. Köhnə, sovet təfəkkürlü kadrlar müasir təfəkkürlü gənclərlə əvəzləndi. Beynəlxalq qurumlara üzv olduq. Gənc kadrları beynəlxalq təşkilatların tədbirlərinə göndərdik. Həmin tədbirlərdən mənimsənilən təcrübə təşkilatımızın işində tətbiq olundu. Beləliklə, dünya həmkarlar ittifaqı hərəkatının tərkib hissəsinə çevrildik”.
Tədbirdə digər məsələlər barədə də müzakirələr aparılıb.
