Polislər məktəbə gələndə şagirdlərin onlara yaxınlaşıb salam vermələri diqqətimdən yayınmadı. Düzü, həm də marağıma səbəb oldu. Axı çoxumuz uşaqlar səs salanda, nadinclik edəndə onları polislə, həkimlə, bir sözlə, ən məsuliyyətli peşə sahibləri ilə qorxutmuşuq. İstəmişik ki, qulağımız dinc olsun. Beləcə, kiçik yaşlarından övladlarımızı gözü qıpıq böyüdürük. Sonra da onlardan tələb edirik ki, həyatın sınaqlarından üzü ağ çıxsınlar, bərkdən-boşdan qorxmasınlar. Təzaddır vallah…
O, yenə adəti üzrə aşağı sınif şagirdləri ilə görüşmək üçün sinif otaqlarından birinin qapısını ehmalca döydü. Fizika dərsiydi. Müəllimin icazəsi ilə şagirdlərlə polis arasındakı dialoqda səslənən ilk sual belə oldu: “Kim müəllim olmaq istəyir?”. Hiss etdim ki, bu sualdan sonra müəllimin çöhrəsindəki təbəssüm uzun illər şagrdlərin yaddaşında qalacaq.
Müəllim olmaq istəyənlərin cavabı belə oldu: “Ona görə müəllim olmaq istəyirik ki, bizim də gələcəkdə şagirdlərimiz olsun, biz də müəllimlərimizin davamçısı olub Vətənimizin adını ucaldan şagirdlər yetişdirək”.
Cavab yaşlarından böyük idi. Rəisin riyaziyyatdan, cəbrdən, həndəsəndən onları sınağa çəkməsi, hətta məktəb illərindən bu günə kimi yaddaşında qalanları bölüşməsi hər kəsin üzündə təbəssüm oyatdı.
Və ayrılanda: “Biz hər birimiz müəllim çörəyi yeyirik” fikri hiss etdik ki, müəllimin gözlərini yaşartdı…
Akt zalında əksəriyyəti 9, 10 və 11-sinif şagirdləri idi. “Xətai Rayon Polis İdarəsinin rəhbərlyinin və əməkdaşlarının yolu rayondakı digər məktəblər kimi elə bizim də məktəbdən mütəmadi düşür”, - deyərək tədbiri giriş sözü ilə açan 260 nömrəli məktəbin direktoru Qiyas Quliyev narkomaniya ilə mübarizəyə həsr olunmuş növbəti maarifləndirmə tədbirini açıq elan edib qonaqları təqdim etdi. Dedi ki, bir çox dövlət strukturları ilə yanaşı, hüquq-mühafizə orqanlarının, xüsusilə də polisin bu istiqamətdə həyata keçirdiyi maarifləndirmə tədbirləri istimaiyyət tərəfindən bəyənilir və təqdir olunur. Çünki keçirilən tədbirlərdə şagirdlərlə, yeniyetmələrlə yanaşı, onların valideynlərinin iştirakı hədəfimizə çatmağa kömək edir. Yəni məqsəd ailədə pis vərdişlərə, narkomaniyaya düçar olmuşların elə valideynlər tərəfindən vaxtında aşkar olunmasına kömək etməkdir.
Yeri gəmişkən, bu tədbirdə də valideynlər çoxluq təşkil edirdi. Polis polkovniki Muradəli Babayev qeyd etdi ki, narkomaniya ilə mübarizə aparmaq o qədər də asan məsələ deyil. Narkotik maddə alverçiləri bir növ "ölüm kabusları"dır. Onlar əsasən uşaqların və gənclərin cəmləşdiyi yerlərdə olur, pul qazanmaq xatirinə həmin məhsulları təklif etməklə, onları ölümə aparan bu pis vərdişə alışdırmağa çalışırlar. Pulunu da əvvəlcədən yox, çox vaxt onları bu ağır xəstəliyə düçar etdikdən sonra istəyirlər. Təzə narkoman da maddi cəhətdən imkansız olduğundan xərci ödəmək və yeni narkotik maddə almaq üçün oğurluq etmək, hətta daha təhlükəli cinayət törətmək məcburiyyətində qalır.
Ölkəmizdə narkomaniya ilə mübarizə tədbirləri gücləndikcə narkotacirlər çirkin niyyətlərini həyata keçirmək üçün müxtəlif yollara əl atır, ən çox da gələcəyimiz olan uşaqları, yeniyetmləri bu bəlaya düçar etməkdən ötrü dəridən-qabıqdan çıxırlar. Bəli, keçirilən maarifləndirmə tədbirləri öz bəhrəsini verməkdədir. Ailə, məktəb və polis vəhdəti təkcə “ağ ölüm”lə mübarizədə deyil, şagirdlərin, yeniyetmələrin sağlam, savadlı, vətənpərvər böyüməsinə də təkan verəcəkdir.
Vurğulandı ki, günü-gündən qarışan dünyamızda ölkəmizdəki sabitliyi gözügötürməyənlər narkomaniya adlı bəlaya gənclərimizi düçar etməklə burada kriminogün durumu dəyişməyə, cinayətkar əməllərin çoxalmasına çalışırlar. Lakin onlar heç də həmişə istəklərinə çata bilmirlər, çünki qarşılarında torpağını, millətini, gəncliyini və gələcəyini sevən Azərbaycan Polisini görürlər.
“Böyük Fransız təbibi Fransua Moriakın dediyi kimi, "Narkomaniya insanın öz ölümündən həzz almasıdır". Həyat adlı nemətdən zövq almaqdan məhrum olanları heç vaxt xatırlamırlar və onlara yalnız acizanə ölüm qismət olur. Bu fikirləri narkoloq həkim Qalib Məmmədov söylədi.
Hər tədbirdə olduğu kimi bu dəfə də RPİ-nin rəhbərliyi bir ilkə imza atmışdı. İdarə rəisinin “Evləriniz mühafizə olunurmu sualına” cavab olaraq zalda bir nəfərin əlini qaldırması vəziyyətin qənaətbəxş olmadığından xəbər verirdi.
Elə Xətai Rayon Mühafizə İdarəsinin rəis müavini, polis polkovnik-leytenantı İlham Rzayevin tədbirdə iştirakı yeni bir təbliğatın, maarifləndirmə işinin başlanğıcı demək idi.
Polis polkovnik-leytenantı İ.Rzayev bildirdi ki, bu gün DİN Baş Mühafizə İdarəsinin, paytaxtda və yerlərdə olan idarə və şöbələrinin əsas vəzifəsi müqavilələr əsasında obyekt və mənzillərin ən müasir siqnalizasiya sistemi vasitələri ilə etibarlı qorunması ilə yanaşı, əhalinin təhlükəsizliyinə xidmət edir, bu həm də cinayətkarlığa və ictimai qaydanı pozanlara qarşı fəal mübarizədir.
Qeyd olundu ki, polisin mühafizəsi özəl mühafizə xidmətlərindən fərqlənir. Belə ki, baş verə biləcək hadisə nəticəsində mülkiyyətçiyə dəymiş maddi ziyanın ödənilməsinə təminat verilir.
Bu gün mühafizəyə götürülən mənzillərin texniki vasitələrlə təmin olunması üçün ilkin ödənişin ləğv olunması da vətəndaş mənunluğuna xidmət edir.
Narkomaniya ilə yanaşı bu gün cəmiyyətimizi narahat edən yol-nəqliyyat hadisələri, erkən nikahlar və dini radikalizm də tədbirin müzakirə mövzusu oldu.
Sonda tədbirə yekun vuran idarə rəisi, polis polkovniki Muradəli Babayev dedi kən qanlı müharibələrdən daha dəhşətli olan, evlərə bədbəxtlik və göz yaşı gətirən, ən munis arzuları məhv edən narkomaniyadan və digər bəlalardan gələcəyimizi qorumaq üçün bütün mümkün vasitələrdən istifadə etməliyik ki, sabah gecdir deməyək.
Hafiz TƏMİROV polis mayoru
