Leyla Əliverdiyeva: “Bir də görürsən ki, naşı adamın əli ilə edilən botoks müştəriyə faciələr yaşadır” Aynurə Həsənova: “Hansısa bir insanın xəstəliyi varsa və müayinə nəticəsində o xəstəliklər təsdiq olunarsa, onlara botoks edilməməlidir”
Yaşından asılı olmayaraq, hər bir qadın gözəl görünmək istəyir. Bu tamamilə təbii qəbul edilməlidir. Qadınlar üz dərilərini cavan, təravətli saxlamaq üçün bütün vasitələrdən istifadə edirlər. Əvvəllər daha çox təbii maskalara üstünlük verirdilərsə, estetik əməliyyat etdirirdilərsə, bu gün daha çox botoks etdirirlər.
Hazırda botoks etdirənlərin sayı estetik əməliyyat keçirənlərin sayını kölgədə qoyur desək yanılmarıq. Çünki hazırda 25-30 yaşdan başlayaraq qadınlar, qızlar, hətta kişilər, oğlanlar da botoks etdirirlər. O da gizlin deyil ki, öncəki illər daha çox səhnə adamları bundan istifadə edirdilərsə, bu gün evdar qadınlar da bu məsələdə üstünlük təşkil edirlər. Sadə ev qadınları müxtəlif gözəllik salonlarında, mərkəzlərdə botoks etdirərək daha gözəl görünməyə çalışırlar.
Hazırda cəmiyyətimizdə botoks etdirənlərin səviyyəsi yüksələn xətt üzrədir. Bir sıra yerli və xarici mütəxəssislər bildirirlər ki, botoksun xeyri ilə yanaşı, ziyanlı tərəfləri də çoxdur. Ekspertlər qeyd edirlər ki, Azərbaycandan fərqli olaraq, dünya ölkələrində botoks etdirmək istəyən şəxslər ciddi şəkildə tibbi müayinədən keçirilir və əgər botoks etdirməyə onların sağlamlığı yol verirsə, həmin şəxslər bu xidmətdən yararlana bilir, əks halda, müraciət edənlərə mənfi cavab verirlər. Azərbaycanda isə bu xidmət əsasən gözəllik studiyalarında, salonlarda həyata keçirildiyi üçün, müraciət edənlər heç bir tibbi müayinədən keçirilmir. Bu da sözsüz ki, müxtəlif problemlərin yaranmasına səbəb olur. Sanki bəzi insanlar öz sağlamlığını risqə ataraq botoks etdirirlər. Botoks etdirmə prosesi çox zaman həkim-kosmetoloqların nəzarətindən kənarda həyata keçirildiyi üçün, müəyyən xəstəliklərin yaranmasına səbəb olur.
Həkim-kosmetoloq Leyla Əliverdiyeva bizimlə söhbətində bildirdi ki, botoks qadınların üzünü qırışdan azad edir, onların yaşlarından bir neçə qat gənc görünməsinə səbəb olur. O hesab edir ki, bu iş həkim nəzarəti olmadan gözəllik salonlarında həyata keçirilirsə, fəsadları qaçılmazdır.
L.Əliverdiyeva bildirdi ki, son illər elm və texnologiyanın inkişafı, bütün sahələrdə olduğu kimi, kosmetologiyada da özünü göstərir. “Bu gün insanların bir çoxu kosmetologiyanın yeniliklərindən istifadə edir. Ancaq bu yeniliklərin müsbət tərəfləri ilə yanaşı, fəsadları ilə qarşılaşanlar da var. Əhalinin üstünlük verdiyi kosmetik proseslərdən biri də botoksdur ki, əsasən yaşlı və orta yaşlı qadınlar buna üstünlük verirlər.
Məlum olduğu kimi, bu gün botoksun kosmetologiyada tətbiqi daha geniş yayılıb. Kosmetoloqlar ondan istifadəni təbii ki, hər kəsə məsləhət görmürlər. Məlumdur ki, bu gün tibbi kosmetologiyanın son nailiyyətləri kimi insanların gəncləşməsində, qırışların ləğv olunmasında çoxlu çeşiddə iynədən istifadə olunur. Ancaq bu taktikanı seçənlər həm kosmetologiyanı çox ciddi bilməlidirlər, həm də təcrübələri olmalıdır.
Hər bir yeniliyin xeyri ilə yanaşı, ziyanını da yaxşı bilməlidirlər və ola bilsin ki, bu elə bir yenilikdir ki, onun 95 faiz ziyanı var, amma haradasa 5 faiz istifadə oluna bilər. Belə yeniliklərə üzdə istifadə olunan gel, silikon, dəri altına yeridilən implantlar, eləcə də botoks daxildir”.
O qeyd etdi ki, botoksla mezoterapiya fərqlidir. Onun sözlərinə görə, bunlar lazım olan polivitaminlərdir və ustalıqla istifadə edilərsə, çox xeyri var: “Botoksun kosmetologiyada tətbiqini qadınlar vacib sayır. Çünki insanların üzündə bəzi qırışlar var ki, onlar bunun qarşısını ala bilmirlər. Buna xüsusilə emosional, güclü hissiyyatlı, aqressiv insanlarda rast gəlinir. Əgər digər müalicələr kömək etmirsə, bu zaman botoksdan istifadə edilir. Bir də bu qrupa aktyorlar daxildirlər ki, onlar emosionaldırlar, səhnədən çıxdıqdan sonra rolu öz ürəklərində yaşadırlar, alınlarının ortasında, göz ətrafında qırışlar, iki qaşın ortasında düyünlər əmələ gəlir”.
Müsahibimiz qeyd etdi ki, bəzi sənət sahələrində çalışan insanlarda üz qırışması hallarına daha çox təsadüf edilir. Həkim-kosmetoloqa görə, bu onların fəaliyyəti ilə bağlıdır. “Belə adamlar, xüsusilə də aktyorlar qırışlarla bacarmayanda, çox nadir hallarda botoksdan istifadə etmək olar. Ancaq bu işi peşəkarlar görməlidirlər ki, başqa bir fəsad yaranmasın.
Kosmetoloq mütləq dəri həkimi olmalıdır, indi 5-6 günlük kurslarla kosmetoloq olurlar. Son 15-20 ildir dünyada botoksdan istifadə edilir” - deyə bildirən həkim-kosmetoloqun sözlərinə görə, botoks edən insan dəri haqqında məlumata malik olmalıdır. Bu gün kosmetoloqların çox olduğunu deyən müsahibimiz bildirdi ki, onların da çoxunun mükəmməl təhsili və təcrübəsi yoxdur: “Sovet dövründə olan, seçilən kosmetoloqlar indi çox azdır. Bu gün peşəkar həkim-kosmetoloqlar dərslər keçir, gənclər o dərslərdə iştirak etməlidirlər ki, öyrənə bilsinlər. Botoksun kosmetologiyada yeri çox azdır, bunu da bilmək lazımdır”.
L.Əliverdiyeva təəssüflə bildirdi ki, bu gün bu sahəni bilən də, bilməyən də gözəllik studiyaları açar və xidmət göstərir. “Gizlin deyil ki, bu studiyalar biznes və gəlir əldə etmək məqsədi daşıyır. Belə olmalı deyil. Bu işlə məşğul olan studiyalar çalışmalıdırlar ki, bura peşəkarları dəvət etsinlər. Peşəkarlar isə heç vaxt müştəriyə zərər vurmurlar. Bilmək lazımdır ki, insan dərisi çox həssasdır. Xüsusən də üz dərisinə yanaşma həssaslıq tələb edir. Bir də görürsən ki, naşı adamın əli ilə edilən botoks müştəriyə faciələr yaşadır. Müştərinin üzü pis vəziyyətə düşür, əsəbləri korlanır, aylarla həkimlərdə qalır. Elə hallar olur ki, səhv edilən botoks insanlarda xərcəng, əsəb gərginliyi və digər xəstəliklər yaradır” - deyə bildirən müsahibimiz dedi ki, uğursuz botoks insanlarda ən çox narahatlıq, əsəb gərginliyi yaradır.
Müsahibimiz qeyd etdi ki, botoks yanlış tətbiq edilərsə, bu, iflic və digər xəstəliklərə də səbəb ola bilər: “Görürsünüz, bəzən botoks etdirən insanlar gülə bilmirlər, yaxud güləndə göz qapaqları örtülmür. Bu da ondan irəli gəlir ki, göz ətrafı düzgün botoks edilmir. Eləcə də insanın baxışında dəyişiklik olur. Əgər təkrar-təkrar 6-7 aydan bir iynə vurulursa, sonralar həmin insanda sürətlə qocalma prosesi gedir. Baxın, bu probelmlər də var. Botoksu peşəkar etməlidir ki, insanları heç bir fəsad, xəstəlik, problem təhdid etməsin”.
Məlumatlara görə, botoks xüsusi flakonlarda gəlir və onların daşınma şərtləri var. Bəzi həkim-kosmetoloqlar bildirirlər ki, onlar müəyyən mənfi dərəcədə konteynerlərdə gəlməlidirlər. Biri açıldıqda bir neçə insana vurulur və 2-3 saat içində həll olunmalıdır, hamısı vurulmalıdır. Kosmetoloqlar 30 nəfəri bir yerdə haradan tapırlar ki, hamısını istifadə etsinlər? Demək, soyuducuda saxlayırlar. Bu özü bir qüsurdur.
Həkim-kosmetoloqlar onu da qeyd edirlər ki, botoksun tətbiqi zamanı həyati vacib bir orqana toxunularsa, mənfi təsiri ola bilər
Onu da vurğulayaq ki, botoksdan əsasən nevroloji və kosmetoloji sahədə istifadə edilir. Elmi-tədqiqat Tibbi Bərpa İnstitutunun klinik nevrofizioloji laboratoriyasının direktoru, tibb elmləri doktoru Sədaqət Hüseynova mətbuata bildirib ki, botoks preparatının nevroloji sahədə istifadəsi zamanı ümumi qan dövranına düşmür və digər orqanlarda dəyişiklik əmələ gətirmir. Ancaq onun tətbiqi zamanı həyati vacib bir orqana toxunularsa, mənfi təsiri ola bilər. O, həmçinin, deyib ki, bundan başqa, ümumi təsirləri, yəni hər bir preparata olduğu kimi, ona qarşı da allergiya ola bilər. Direktorun sözlərinə görə, botoksun istifadəsi çox sadə olduğu üçün, bu gün o elə bir həddə çatıb ki, hər bir kosmetoloq onu rahat istifadə edə bilər: “Bu preparat Səhiyyə Nazirliyi tərəfindən qeydiyyatdan keçib. Onu ölkəyə gətirən distribüterlərin həm özləri, həm də preparatları SN də qeydiyyatdadırlar. Bu preparat xüsusilə də uşaq nevrologiyasında, ifliclərdə bir çox ölkələrin müalicə proqramına daxil edili. Mənfi təsiri isə əsasən dərmanın dozası düzgün seçilməyəndə və tətbiqi düzgün aparılmayanda ola bilər”.
Trixoloq-həkim Aynurə Həsənova “Bakı-Xəbər”ə açıqlamasında bildirdi ki, bu gün botoks etdirənlərin sayı az deyil. A.Həsənovanın bildirdiyinə görə, bu gün Azərbaycanda botoksla bağlı maarifləndirmə işi zəifdir. Onun dediyinə görə, hazırda insanların botoks haqqında məlumatı elə də çox deyil: “Bu gün, əslində, botoks haqqında bilgilər çox azdır. İnsanlar məlumatları olmadığı şeylərdən qorxub çəkinirlər. Botoks bizə xaricdən gəlib. Mən Almaniyada təhsil aldığım üçün, Almaniyada botoksa yanaşma haqda bir-iki kəlmə demək istəyirəm. Orada düşünürlər ki, botoksun insanlara xeyri daha çoxdur. Ümumiyyətlə, botoksun tətbiqi həssas yanaşma tələb edir. Bizə müraciət edirlər. Görürsən ki, iflic keçirmiş adamdır və gözünün biri böyük, o biri isə kiçikdir, yaxud ağzı əyilib və s. Botoks onu qaydaya salır. Hədsiz dərəcədə tərləyən insanlar var ki, onların tərləməsinin çarəsi botoksdadır. Botoksda hələ heç bir əks göstərici sübut olunmayıb. Təbii ki, söhbət peşəkarın gördüyü işdən gedir. Yəni botoks edən həkimdirsə, o, dozaları düzgün təyin edir və nəticə də müsbət olur. Bir də ki, bəzən görürsən, sintetik gellərlə də botoksu qarışdırırlar. Beləliklə, üzdə hər hansı bir fəsad görəndə onu botoksla əlaqələndirirlər. Əslində isə elə deyil. Botoks əsasən qırış açmaq, əzələni qaldırmaq məqsədilə istifadə edilir. Botoks hər nahiyədə istifadə edilə bilər, lakin daha çox gözətrafı qırışların açılmasında istifadə olunur”.
A.Həsənova qeyd etdi ki, son illər botoksa müraciət edən kişilərin də sayında artım müşahidə edilir. “Avropanı bir kənara qoyaq, bizim özümüzdə də botoks etdirən kişilər çoxdur. Onlar üçün bu prosedur çox rahatdır. Onlar qırışların dərinliyini hamarladıb daha rahat olurlar. Kişilər üçün hər gün kosmetoloqa gəlməyə ehtiyac yoxdur. Bilirsiniz, botoksu bir dəfə vurmaq o demək deyil ki, hansısa bir fəsad yaranacaq, xeyr, belə deyil. Botoks 4 aydan 6 aya qədər öz təsirini saxlayır. Sonra yoxa çıxır. Hətta belə bir deyim də var ki, bu sonradan asılılıq yaradır. Deyim ki, heç bir asılılıq yaratmır. Elə olur ki, mənim yanıma bir dəfə botoks etdiyim şəxs 8 aydan, iki ildən sonra gəlir, onda da heç bir fəsad olmur” - deyə müsahibimiz bildirdi.
Botoksun fəsadlarına gəlincə, A.Həsənova qeyd etdi ki, bəzi insanlara botoks tövsiyə olunmur: “Hamilə qadınların botoks etdirməsi düzgün deyil. Hamiləlik dövründə hər hansı prosedurlardan uzaq olmaq lazımdır. Onkoloji xəstələr də botoksdan uzaq olmalıdırlar. Gözündə katarakta və digər xəstəliklər olan insanlara da botoks məsləhət görülmür. Bilirsiniz, hansısa bir insanın xəstəliyi varsa və müayinə nəticəsində o xəstəliklər təsdiq olunarsa, onlara botoks edilməməlidir”.
İradə SARIYEVA
