Adil Qeybulla: “Televiziyalarda ayrı-ayrı şəxslərin dərmanları reklam etməsi yalnız xüsusi təmənnaya xidmət edir”
Azərbaycanda dərman vasitələrinin reklamının qadağan olunması təklif olunur. Belə bir təkliflə Milli Məclisin (MM) Səhiyyə komitəsinin sədri Əhliman Əmiraslanov parlamentin ötən iclasında çıxış edib.
O qeyd edib ki, dərmanların reklamı siqareti və spirtli içkilərin reklamından da qat-qat təhlükəli və zərərlidir: “Dünyanın bir çox yerlərində dərman vasitələrinin reklamı qadağan olunub. Ona görə hesab edirəm ki, gələcəkdə bu məsələyə mütləq qayıdılmalıdır. Yəni dərman vasitələrinin reklamı qadağan edilməlidir. Buna yol vermək olmaz”.
Ekspertlər də dərman vasitələrinin reklamının qadağan edilməsinin vacib olduğunu bildirirlər. Onların fikrincə, bu gün telekanallarda müxtəlif adda dərmanlar reklam olunur. Reklamlarda həmin dərmanların müxtəlif xəstəliklərin çarəsi olduğu göstərilir. Ancaq onlar unudurlar ki, həmin reklamla insanların da sağlamlığı təhlükə altına düşür. O reklama inanıb, həmin dərman preparatından alıb istifadə edən şəxsin səhhəti daha da pisləşə bilər. Bu səbəbdən dərman vasitələrinin reklamının qadağan olunması təklifi ictimaiyyət tərəfindən müsbət qarşılanır.
Məsələ ilə bağlı fikir bildirən professor, həkim-ekspert Adil Qeybulla bizimlə söhbətində qeyd etdi ki, dərman vasitələri müəyyən laboratoriyalarda yoxlanır, tərkibi haqqında rəy verildikdən sonra qeydiyyata alınırlar: “Qeydiyyat, ən azından, təhlükəsizlik üçün zəmanətdir. Ölkəyə daxil olan hər hansı dərman preparatı təhlükəli də ola bilər. Dərman təhlükəsizliyi konsepsiyası milli təhlükəsizlik konsepsiyasının tərkib hissəsidir. Xüsusi dərmanlarla ölkədə təxribat da yarada bilərlər. Ona görə bu məsələ diqqətdə saxlanmalıdır”.
Həmsöhbətimiz hesab edir ki, dərman vasitələrinin reklamı dayandırılmalıdır: “Televiziyalarda ayrı-ayrı şəxslərin dərmanları reklam etməsi yalnız xüsusi təmənnaya xidmət edir. Dərman reklamı da, həkim reklamı da yolverilməzdir”.
A.Qeybulla onu da vurğuladı ki, dərman vasitələri ayrı-ayrı verilişlərin aparıcıları tərəfindən reklam olunur: “Bunlar tamamilə yolverilməzdir. Dərman preparatı reklam oluna bilməz. Dərman həkim tərəfindən yazılır və onun nəzarəti altında qəbul edilməlidir. Dərmanların sosial şəbəkələrdə reklamı da qadağandır və bu dərmanlara etibar etmək doğru deyil. İnsanlar bu məsələdə diqqətli olmalıdırlar”.
Günel CƏLİLOVA
