Rəsul Cahangirli: “Nəzərə almaq lazımdır ki, hər iki ölkənin turizmlə bağlı böyük və zəngin potensialı var”
İran və Azərbaycan turizm üzrə birgə texniki komitənin yaradılması istiqamətində iş aparırlar. Yaradılacaq müştərək komitə iki dövlət arasındakı turizm əlaqələrinin inkişafına böyük təkan verəcək. Bu fikri İranın mədəni irs və turizm təşkilatının sədr müavini Məhəmməd Mühib Xudayi bildirib.
Onun sözlərinə görə, müştərək komitə iki ölkə arasında turizm əlaqələrini inkişaf etdirmək məqsədilə təşkil olunur: “Müştərək komitə İranin Mədəni İrs və Turizm Təşkilati ilə Azərbaycanın Mədəniyyət Nazirliyi arasında turizm sahəsini inkişaf etdirmək məqsədilə təşkil olunub. İki ölkə arasında bunun üçün geniş potensial var”.
M.M.Xudayi nəzərə çatdırıb ki, İran turizm sahəsində Azərbaycanla əməkdaşlığa dair proqram hazırlayıb. Bu proqram turizm, dini abidələrin ziyarəti və müalicə məqsədilə qarşılıqlı səfərlərin təşkilini nəzərdə tutur. O deyib ki, iki ölkənin sərhəd zonalarında yerləşən bölgələri mədəni və tarixi baxımdan bir-birinə çox yaxındırlar. İlin soyuq fəsillərində azərbaycanlı turistlərin İranın isti cənub bölgəsinə turlarının təşkili məsələsi haqqında danışıqların aparılması nəzərdə tutulub. Yaradılacaq komitə bu kimi səfərləri təşkil edəcək ki, bu da tərəflər üçün faydalıdır.
Əlverişli coğrafi mövqeyə malik Azərbaycan son illər dünya turistlərinin daha çox üz tutduqları ölkələr sırasında yer almaqdadır və demək olar ki, bu istiqamətdə nəzərəçarpacaq uğurlar da əldə edilir. Bu gün ölkədə turizm infrastrukturunun müasirləşdirilməsi və mövcud potensialın səmərəli şəkildə realizəsi sahəsində ardıcıl tədbirlər həyata keçirilir. Aparılan islahatların əsas məqsədi respublikada turizm mədəniyyətinin formalaşdırılması və xidmət səviyyəsinin davamlı şəkildə yüksəldilməsidir. O cümlədən, qonşu ölkələrlə turizm sahəsində əlaqələr genişləndirilir. Belə ölkələrdən biri də İrandır. Ümumilikdə, iki ölkə arasında turizm üzrə birgə texniki komitənin yaradılması bu sahədə əlaqələrin inkişafına nə verəcək?
Məsələyə münasibət bildirən ekspert Rəsul Cahangirlinin sözlərinə görə, Azərbaycanla İran arasında texniki komitə yaradılsa, bu, mövcud olan potensialdan daha səmərəli istifadə olunmasına imkan verəcək: “Nəzərə almaq lazımdır ki, hər iki ölkənin turizmlə bağlı böyük və zəngin potensialı var. Qonşu ölkə olan İranda turizm baxımından maraqlı və cəlbedici yerlər çoxdur. İranın müxtəlif bölgələrinə getdiyiniz zaman əsrarəngiz təbiət mənzərələri, göz oxşayan islami əsərlər, möhtəşəm tarixi abidələrlə qarşılaşmaq və İran mətbəxinin ləziz təamlarından dadmaq mümkündür. İran tarixi, dini və təbiət baxımından zəngin ölkə olsa da, turizm sahəsində görüləsi işlər hələ çoxdur. O mənada ki, İran indiyədək dünya turizm bazarında ciddi nailiyyət əldə edə bilməyib. Dünya turizm bazarına inteqrasiya olunmayıb. Bunun bir sıra obyektiv və subyektiv səbəbləri var. Hesab edirəm ki, Azərbaycan bu işdə İran üçün mühüm körpü rolunu oynaya bilər. Azərbaycan vasitəsilə İranın turizm potensialı regionda tanına bilər. Digər tərəfdən hesab edirəm ki, birgə texniki komitə yaradılsa, bu, iki ölkə arasında qarşılıqlı turist əlaqələrinin daha da genişlənməsində mühüm rol oynayacaq. Azərbaycandan İrana, o cümlədən qonşu ölkədən bizə çoxsaylı turistin gediş-gəlişinə şərait yaranacaq. Müşahidələr göstərir ki, son illər İrandan Azərbaycana gələn turistlərin sayı artır”.
Vidadi ORDAHALLI
