Seyid Camal Əzimbəyli: “Adıçəkilən dini icma antimüharibə təbliğatı aparır”
Təəssüf ki, “Yehovanın şahidləri” dini icması yaradılan şəraitdən sui-istifadə etməyə çalışır. Bunu mətbuata açıqlamasında Dini Qurumlarla İş üzrə Dövlət Komitəsinin (DQİDK) sədr müavini Səyavuş Heydərov deyib.
Onun sözlərinə görə, ABŞ-ın Beynəlxalq Dini Azadlıq üzrə Komissiyasının hesabatında “Yehovanın şahidləri” dini icmasının heç bir hüquqi statusu olmaması və onun ardıcıllarının daim təzyiqlərlə üzləşməsi iddiasının əsassızlığı dəfələrlə sübut olunsa da, həmin iddia hər il sözbəsöz təkrar olunur: “Yehovanın şahidləri” dini icması 2002-ci ildə DQİDK-da dövlət qeydiyyatına alınıb və həmin icmanın qeydiyyatı bu günə qədər hüquqi qüvvəsini qoruyur. Yəni “Yehovanın şahidləri” dini icmasının hüquqi statusunun olmaması barədə iddia tamamilə uydurmadır”.
Dövlət Komitəsinin sədr müavini onu da bildirib ki, DQİDK-nın razılığı əsasında ölkəyə ən çox dini ədəbiyyat idxal edən məhz “Yehovanın şahidləri” dini icmasıdır: “Lakin təəssüf ki, “Yehovanın şahidləri” dini icması yaradılan şəraitdən sui-istifadə etməyə çalışır, qanunvericiliyin tələblərini müntəzəm pozaraq hüquqi ünvandan kənarda, respublikamızın müxtəlif bölgələrində qanunsuz dini yığıncaqlar keçirməyə çalışır. Təbii ki, bütün bu qanunsuz əməllərin qarşısı alınaraq inzibati tədbirlər görülür. DQİDK-da həmin dini icmanın yerli liderləri və xaricdəki rəhbərləri ilə dəfələrlə görüş keçirilib, mövcud problemlər müzakirə olunub və onlara öz dini fəaliyyətlərini qanunauyğun şəkildə tənzimləmək tövsiyə edilib. Buna baxmayaraq, hələ də bu icmanın fəaliyyətində neqativ hallar müşahidə olunur”.
Təbii ki, sözügedən dini icmanın qanundan kənara çıxması qəbuledilməzdir. Kimin nə deməsindən asılı olmayaraq, belə halların qarşısı alınmalıdır. Bütün bunların fonunda, “Yehovanın şahidləri”nin yaradılan şəraitdən sui-istifadə edərək müxtəlif bölgələrdə qanunsuz dini yığıncaqlar keçirməyə çalışması cəmiyyətə hansı ziyanlar vurur?
Məsələyə münasibət bildirən şərqşünas Seyid Camal Əzimbəylinin sözlərinə görə, belə dini icmaların qanunsuz fəaliyyəti ümumən cəmiyyətin mənəvi dəyərlərinə zərər vurur: “O baxımdan Dini Qurumlarla İş üzrə Dövlət Komitəsi tərəfindən görülən tədbirlər təqdirəlayiqdir. Qurum çox haqlı olaraq bununla bağlı məsələləri gündəmə gətirir. Çünki Azərbaycanda münbit tolerant dini şəraitdən bəzi dini icmalar, o cümlədən “Yehovanın şahidləri” dini icması sui-istifadə edirlər. Bu da əlbəttə ki, qəbuledilməzdir. Bəzən küçədə gedəndə görürük ki, rahat bir şəkildə Vətənimizin, dövlətimizin milli mənafelərinə zidd bukletlər, vərəqələr paylayırlar. Bu da Azərbaycanın milli mənafeyi üçün zərərlidir. Azərbaycanın Qarabağ boyda dərdi var və torpaqlarımız işğal altındadır. Biz, əvvəl-axır, torpaqlarımızı işğaldan azad edəcəyik. Ancaq adıçəkilən dini icma antimüharibə təbliğatı aparır. Belə hallar Azərbaycan dövlətçiliyi, milli təhlükəsizliyi üçün ideoloji baxımdan heç bir halda qəbulolunmazdır. Ona görə də Azərbaycan dövlətinin bütövlüyü üçün, din-dövlət münasibətlərini tarazlayan qurum olaraq DQİDK-nin belə məsələlərin üzərinə getməsi təqdirəlayiqdir. Ancaq nə edək ki, beynəlxalq qurumlar, özünü demokratiyanın keşiyində duran tərəf kimi təqdim edən ölkələrin hesabatlarında onlara bu xoş təsir bağışlamır. Hesab edirəm ki, bu cür zərərli təriqətlərin, din adı altında Azərbaycanda fəaliyyət göstərən, amma ölkənin birbaşa milli təhlükəsizliyi üçün ideoloji baxımdan təhlükə yaradan dini icmaların fəaliyyəti məhdudlaşdırılmalıdır. Bununla bağlı həyata keçirilən nələr varsa, dərhal onların zərərsizləşdirilməsi üçün tədbirlər görülməlidir”.
Vidadi ORDAHALLI
