Zeynəb Nəbiyeva: “Bu gün kiçik yaşlı qız uşaqlarının saçına daha çox tələbat var” Ülviyyə Qənbərova: “Bu gün Azərbaycanda saçın 1 kiloqramının qiyməti 400-600 dollar arasında dəyişir”
Saç qızın, qadının gözəlliyidir. Belə olmasaydı, qədim dövrlərdən indiyə qədər xanımlar uzun, gözəl, parlaq saçlara sahib olmaq üçün əllərindən gələni etməzdilər. Dünən də, bu gün də qadın və qızların gözəlliyini şərtləndirən amillərdən biri gözəl saçlardır. Sirr deyil ki, illər əvvəl qızlar, qadınlar heç bir müdaxilə olmadan, müxtəlif şampun, təbii və kimyəvi saç maskalarından istifadə etməməklə də gözəl saçlara sahib olurdular. Ancaq son illər müəyyən səbəblər üzündən qızlar, qadınlar saçlarını istədikləri səviyyədə qorumaqda çətinlik çəkirlər. O da gizlin deyil ki, qalın və parlaq saça malik olmayan qadınlar müxtəlif üsullardan istifadə etmək yolu ilə problemlərini aradan qaldırmaq istəyirlər.
Bu gün dünyanın hər yerində olduğu kimi, Azərbaycanda da saç satışı bazarı mövcuddur. Qadın və qızların bir qismi saç əkdirməklə problemdən yaxa qurtarmağa çalışırlarsa, bir qismi şinyondan, qaynaqdan istifadə etmək məcburiyyətində qalırlar. Əvvəlki dövrlərdə xanımlar daha çox süni saçlardan yararlanırdılarsa, son illər təbii saçlardan istifadə edirlər. Yəni onların şinyonları, saç qaynaqları, parikləri təbii saçdan hazırlanır.
Məlum olduğu kimi, hazırda istənilən gözəllik salonunda təbii saça rast gəlinir və o saçlar müştərinin marağına, zövqünə uyğun olaraq onun qısa saçlarına əlavə edilir. Bu gün təbii saç qaynağından istifadə edənlərin sayında xeyli dərəcədə artım müşahidə edilir.
Ekspertlər bildirirlər ki, son illər saç alıcılarının sayı artdığından, artıq bu sahədə bazar da formalaşıb. Hazırda xüsusi insanlar var ki, onlar sırf saç satışı ilə məşğul olurlar. Verilən məlumata görə, müştəriyə təklif edilən saçlar heç zaman rənglənməməli, sağlam və parlaq olmalıdır. Hazırda əsasən azyaşlı qızların saçlarına daha çox tələbat olduğunu deyən ekspertlər bildirirlər ki, o saçlar daha baha qiymətə satılır. Bundan başqa, oğlanlar arasında da saç bazarına işləyənlərin olduğunu vurğulayan ekspertlər qeyd edirlər ki, bugünkü uzun saçlı oğlanların bir qismi öz saçlarını satanlardır. Müştərilərə öz saçlarını təklif edən oğlanlar da saçlarına qazanc mənbəyi kimi baxırlar.
Bakıda bir neçə gözəllik salonunun sahibi olan Zeynəb Nəbiyevanın sözlərinə görə, bu gün saç bazarında böyük canlanma var. O bildirdi ki, saç satışının qiyməti hər yerdə eyni deyil. “Salonlar saçı kiloqramla alır. Bizə müştərinin təklif etdiyi saçı santimetrlə almaq sərf etmir. Ona görə də saçı kiloqramla alırıq. Saçın kiloqramının qiyməti illərə görə dəyişir. 2010-2011-ci illərdə Azərbaycanda saçın kiloqramı 300-400 dollar idisə, bu gün qiymət 400-500 arasında dəyişir. Elə saç var ki, çox keyfiyyətli olduğu üçün onu daha baha qiymətə alırsan. Təbii, sonra da həmin saçı müştəriyə də baha qiymətə satırıq. Deyim ki, salonların çoxunda saçın 10 santimetri təxminən 100-150 manat arasındadır. Bizim xüsusi müştərilərimiz var ki, onlar dəbi sevən xanımlar olduqları üçün, vaxtaşırı saçlarını dəyişirlər. Bəzən isə aldıqları saçları müxtəlif rənglərdə boyadıb yenidən istifadə edirlər. Bu gün kiçik yaşlı qız uşaqlarının saçına daha çox tələbat var. Təbii, bu saçların qiyməti artıq fərqli olur. Demək olar ki, bəzi analar qızlarının saçlarını uzadaraq salonlara satırlar. Dediyim kimi, salon qiymətləri ilə fərdi şəxslərin təyin etdiyi qiymətlər fərqlidir. Yəni elə olur ki, xanım, bəy özü müştəri tapıb saçını satır. Bu halda, onlar qiymətlə bağlı özləri razılığa gəlirlər. Müştəri onlardan saçı kiloqramla almır, santimetrlə alır. Saç satana saçını santimetrlə satmaq daha çox sərf edir, nəinki kiloqramla”.
Z.Nəbiyevanın sözlərinə görə, əvvəllər Azərbaycanda təbii saç satanlar nadir olduğu üçün, daha çox Çindən və başqa ölkələrdən saç alınırdı, bu gün isə başa ölkələrdən saç idxalına o qədər də ehtiyac yoxdur.
Z.Nəbiyevanın dediyinə görə, hazırda bazarda qadın, qız, oğlan saçları ilə yanaşı, at quyruğu da satışdadır. Onun bildirdiyinə görə, şinyon və qaynaq kimi at quyruğundan da istifadə edən müştərilər var. At quyruğunun daha ucuz qiymətə olduğunu deyən Z.Nəbiyeva onun kilosunun qiymətinin 20-50 manat arasında dəyişdiyini qeyd etdi. “Olur ki, rayonlardan at quyruğu da gətirib satırlar. Bəzi salonlar at quyruğu da alıb müştəriyə təklif edirlər. Elə müştəri var ki, ucuz başa gəlsin deyə, saçına at quyruğu əlavə edilməsini istəyir. Bu halda, müştərinin istəyi yerinə yetirilir. Bilirsiniz ki, at quyruğu da təmizdir. Atın insanlara vəfalı dost olduğunu nəzərə alsaq, at quyruğundan bu məsələdə istifadə edilməsinə pis baxmaq olmaz. O hər baxımdan süni saçlardan yaxşı və keyfiyyətlidir. Başda təbii görünür. Süni saç belədir ki, nə qədər boyasan da, düzüm versən də, yenə süniliyi üzə çıxır” - deyə müsahibimiz bildirdi.
Paytaxtda fəaliyyət göstərən “Fidan” gözəllik salonunda çalışan saç ustası Ülviyyə Qənbərovanın sözlərinə görə də bu gün saça gəlir mənbəyi kimi baxan xanımların sayında artım var. Ü.Qənbərovanın dediyinə görə, çox zaman onlar özləri uzun saça malik olan müştərilərindən saçlarını satmasını xahiş edirlər.
O qeyd etdi ki, xanımlar gözəl görünmək və kişilərin diqqətini cəlb etmək üçün gözəllik salonlarına daha çox müraciət edirlər. “Son illərə qədər onlar daha çox süni saç elementlərindən istifadə edirdilər. Bu gün isə təbii saçlara sahib olmaq üçün salonlara müraciət edirlər. Salonlar onların saçlarına təbii saç əlavə edərək onları daha da gözəlləşdirirlər. Bilirsiniz ki, saçlarını qısa zamanda uzatmaq istəyən xanımlar bu arzularını gözəllik salonlarında gerçəkləşdirirlər. Onlar salonlarda saçlarına uzun saç qaynaq etdirməklə istəklərinə nail olurlar. Qaynaq olunan saçlar isə təbii insan saçı olmalıdır. Bu gün Azərbaycanda saçın 1 kiloqramı 400-600 dollar arasında dəyişir. Bəzən deyirlər ki, dünyada saçın qiyməti çox ucuz olsa da, Azərbaycanda çox bahadır. Əvvəllər hər bir insanın saçı ayrı-ayrı alınsa da, amma hazırda kilo ilə alınır. Burada oğlan və qız saçı olmasının fərqi yoxdur. Əsas odur ki, saç uzun olsun. Satılan saçın uzunluğu ən azı 50 santimetr olmalıdır. Saç heç vaxt rənglənməmiş olmalıdır. Saçını satan şəxsin yaşının neçə olması əsas deyil. Bəzən Azərbaycana Çindən də saçlar gətirilir ki, bunun da heç bir fərqi yoxdur” - deyə qeyd edən Ü.Qənbərova nəzərə çatdırdı ki, bu gün saça maddi gəlir mənbəyi kimi baxanlar çoxalıb. Burada heç bir mənfi halın olmadığını deyən gözəllik salonu əməkdaşı hesab edir ki, saç insanın özünə aiddir və onu sata bilər.
İradə SARIYEVA
