ADA: “Universitetimiz dünyanın aparıcı ali təhsil ocaqları və xarici siyasət qurumları ilə 60-dan çox anlaşma memorandumu əsasında işləyir” Qabil Hüseynli: “Diplomatiya kimi önəmli sahədəki kadrların hazırlanmasına göstərilən etimad oradakı təhsilin səviyyəsinin yüksək olmasını şərtləndirir”
Azərbaycan Diplomatiya Akademiyasında (ADA) təhsil almaları üçün Azərbaycan hər il Tacikistan vətəndaşlarına beş kvota, eləcə də tacikistanlı diplomatların hazırlanması üçün altı kvota ayıracaq. Əldə etdiyimiz məlumata görə, bununla bağlı saziş aprelin 25-i Tacikistan Xarici İşlər Nazirliyi ilə Azərbaycan Xarici İşlər Nazirliyinin Diplomatiya Akademiyası arasında imzalanıb.
İmzalanma mərasimindən sonra Tacikistanın Azərbaycandakı səfiri Rüstəm Soli ilə Azərbaycan xarici işlər nazirinin müavini, ADA-nın rektoru Hafiz Paşayev arasında görüş baş tutub. Göründüyü kimi, artıq kənar ölkələr də bizim diplomatiya sahəsində ixtisaslaşmış ali təhsil ocağına maraq göstərir və mühüm sahə üzrə kadrlarının məhz ADA-da hazırlanmasını istəyirlər. Bu sahədə beynəlxalq əməkdaşlığı daha da genişləndirmək niyyətlərinin olub-olmamsını aydınlaşdırmaq üçün ADA ilə əlaqə saxladıq. ADA-nın Brendinq və kommunikasiya şöbəsi adından qəzetimizə verilən açıqlamada bildirdilər ki, ADA bu sahədə ciddi uğurlara imza atıb və beynəlxalq əməkdaşlığı daha da genişləndirməyi hədəfləyir: "Azərbaycan Xarici İşlər Nazirliyi nəzdində fəaliyyət göstərən ADA Universiteti bu günlərdə Tacikistan Xarici İşlər Nazirliyi ilə əməkdaşlıq barədə Anlaşma Memorandumu imzalayıb. Memoranduma əsasən, tərəflər tələbə və müəllim mübadiləsi, birgə elmi araşdırmaların həyata keçirilməsi, konfrans və simpoziumların təşkili, mədəni proqramlarda iştirak kimi layihələrdə əməkdaşlıq quracaqlar. Tacikistan XİN əməkdaşları, həmçinin, ADA Universitetinin İxtisasartırma Proqramları tərəfindən həyata keçirilən Xəzər Hövzəsi Araşdırmaları təlim proqramından yararlana biləcəklər. Hazırda ADA Universiteti dünyanın aparıcı ali təhsil ocaqları və xarici siyasət qurumları ilə 60-dan çox anlaşma memorandumu əsasında işləyir. Azərbaycanın yeganə ingilisdilli universitetinin bakalavr və magistr tələbələri bu memorandumlar əsasında beynəlxalq təhsil mübadiləsi proqramlarında iştirak edə bilirlər. Onlar tərəfdaş universitetlərin birində mübadilə semestri keçirmək və ya tərəfdaş qurumlarda tədqiqat, təcrübə imkanlarından bəhrələnirlər. Əldə edilən razılığa görə, ADA tələbələri getdikləri xarici universitetlərdə təhsil haqqı, tibbi sığorta və tələbələrə aid digər rüsumlardan azad edilə bilirlər”.
Politoloq Qabil Hüseynli qəzetimizə bildirdi ki, yeni yaranan universitetin belə möhtəşəm uğura imza atması sevindiricidir: “Hansısa ölkənin bizim ölkəmizdə olan təhsil ocağına bu şəkildə etimad göstərməsi böyük uğur sayıla bilər. Bu artıq sözügedən universitetin beynəlxalq reytinq göstəricisinin yuxarı olmasından xəbər verir. Xüsusilə də diplomatiya kimi önəmli sahədəki kadrların hazırlanmasına göstərilən etimad oradakı təhsilin səviyyəsinin yüksək olmasını şərtləndirir. Ümidvaram ki, bu uğur davamlı olacaq və ADA dünyanın diplomatlar hazırlayan ən prestijli məktəbləri sırasında öndə olacaq”.
Məhəmmədəli QƏRİBLİ
