Şahin Camalov: “İctimai məsuliyyətini dərk etməyən sürücü və piyadalar hələ də çoxdur”
Son vaxtlar istər paytaxtda, istərsə də respublikanın digər bölgələrində yol qəzalarının sayında artım qeydə alınıb. Açıqlanan statistik rəqəmlər də yol qəzalarının sayında artımın baş verməsini təsdiq edir.
Avtoqəzaların artmasının əsas səbəblərindən biri kimi sürücülərin yol hərəkəti qaydalarına əməl etməməsi bildirilir. Bu günlərdə Baş Dövlət Yol Polisi İdarəsinin təşəbbüsü ilə Lənkəran və Masallı rayonlarında yol hərəkətinin tənzimlənməsi və hərəkətin təhlükəsizliyinin təmini məqsədilə maarifləndirici tədbir keçirilib. Tədbirdə çıxış edənlər yollarda ciddi qayda pozuntularının sayında artımın müşahidə edildiyini vurğulayıblar. Qeyd olunub ki, Masallı rayonunda ötən ilin birinci rübündə sərxoş vəziyyətdə avtomobil idarə edən sürücülərin sayı 89 idisə, bu ilin müvafiq dövründə isə 93 nəfər olub. Lənkəranda isə göstərilən müddət ərzində 82 sərxoş sürücü müəyyən edilib. Eyni zamanda ötmə qaydalarının, işıqforun qırmızı işığının tələbini və digər qaydaları pozan sürücülərin sayında da artım müşahidə olunur.
Avtoqəzaların sayının artması barədə fikir bildirən nəqliyyat sahəsi üzrə ekspert Şahin Camalov bizimlə söhbətində qeyd etdi ki, sürücülərin bir qismi yol hərəkəti qaydalarına riayət etmir: “Bəzi sürücülər müəyyən olummuş sürət çərçivəsində nəqliyyat vasitələrini idarə etmirlər. Onlar hansı təhlükə ilə üzləşəcəklərini hesablamırlar. Yollarda yarana biləcək fors-major halları dəyərləndirmirlər. Nəticə etibarilə çox ağır faciələrə səbəb olan yol qəzaları baş verir”.
Həmsöhbətimiz təəssüf hissi ilə onu da vurğuladı ki, intizamsız, ictimai məsuliyyətini dərk etməyən sürücü və piyadalar hələ də çoxdur: “Bəzi yol hərəkəti qayda pozuntuları kütləvi xarakter daşıyır və onlara qarşı mübarizə zəifdir. Bu gün bir sıra ölkələrdə yol hərəkətinin təhlükəsizliyi naminə maarifləndirmə və profilaktika aksiyaları keçirilir. Bu tip maarifləndirici aksiya və ya təlimlərin ölkəmizdə də keçirilməsinə bizdə də ehtiyac var”.
Ş.Camalovun sözlərinə görə, sürücülər səriştəli olmaları üçün yaxşı təhsil almalıdırlar: “Savadlı sürücü nə qaydanı pozacaq, nə də qəza törədəcək. Yollarda təhlükəsizliklə bağlı cəmiyyətin təfəkküründə dəyişiklik etmək lazımdır. Sürücülərə anlatmaq lazımdır ki, yol hərəkəti qaydasını pozmaq, sükan arxasına sərxoş vəziyyətdə əyləşmək, qoyulan normadan artıq sürətlə avtomobili idarə etmək hansı fəsadlara gətirib çıxara bilər. Piyadalara da təhlükəsizliyin vacibliyini, yolu necə keçmək lazım olduğunu öyrətmək lazımdır. İnsanlara bunun necə həyati əhəmiyyətə malik olduğunu təbliğ etməyə gərək var. Söhbət ondan gedir ki, kütləvi tədbirlər vasitəsilə təhlükəsizliyin mahiyyətini sadə dillə vətəndaşlara aşılamaq lazımdır. Mahiyyəti anlatdıqdan sonra vətəndaş özündə məsuliyyətini artırır, əvvəl etdiyi qanunsuzluqların təkrarlanmamasına çalışır”.
Günel CƏLİLOVA
