Əliməmməd Nuriyev: “İnzibati Xətalar Məcəlləsinə təklif olunan yeni dəyişikliklərə görə, idarə, müəssisə və təşkilatlarda tətil və digər üsullarla fəaliyyətin dayandırılması ilə bağlı yeni cəzaların müəyyənləşdirilməsi…”
Azərbaycanda idarə, müəssisə və təşkilatlarda tətil və digər üsullarla fəaliyyətin dayandırılması ilə bağlı yeni cəzalar müəyyənləşdirilir. Bununla bağlı Azərbaycan Prezidenti tərəfindən Milli Məclisə İnzibati Xətalar Məcəlləsinə yeni 517-2.12 maddəsinin əlavə edilməsi təklif olunub.
Layihəyə görə, mülkiyyət və təşkilati-hüquqi formasından asılı olmayaraq, idarə, müəssisə və təşkilatların fəaliyyətinin tətil və ya digər üsullarla dayandırılmasının qadağan edilməsi ilə bağlı tələbin pozulmasına görə fiziki şəxslərə 200 manatdan 350 manatadək cərimə və ya işin halları, pozuntu törədənin şəxsiyyəti nəzərə alınmaqla 15 günədək müddətdə inzibati həbs tətbiq olunur. Vəzifəli şəxslər 500 manatdan 700 manata qədər cərimə, hüquqi şəxslər isə 3 000 manatdan 4 500 manata qədər cərimə oluna bilərlər.
“Konstitusiya” Araşdırmalar Fondunun rəhbəri Əliməmməd Nuriyev “Bakı-Xəbər”ə açıqlamasında qeyd etdi ki, İnzibati Xətalar Məcəlləsinə edilən dəyişikliyə əsasən idarə, müəssisə və təşkilatlarda tətil üsulü ilə fəaliyyətin dayandırılması ilə bağlı cəzalar müəyyənləşib: “Nəzərə almaq lazımdır ki, qanunvericiliyə əsasən, hər kəsin təkbaşına və ya başqaları ilə birlikdə tətil etmək hüququ var. Əmək müqaviləsi əsasında işləyənlərin bu hüququ yalnız qanunla nəzərdə tutulmuş hallarda məhdudlaşdırıla bilər. Azərbaycan Respublikasının Silahlı Qüvvələrində xidmət edən hərbi qulluqçular və mülki şəxslər tətil edə bilməzlər. Həmçinin, Əmək Məcəlləsinin 281-ci maddəsində göstərilir ki, insanların sağlamlığı və təhlükəsizliyi üçün həyati əhəmiyyət kəsb edən bəzi xidmət sahələrində tətillərin keçirilməsi qadağan olunur”.
Həmsöhbətimizin sözlərinə görə, əmək qanunvericiliyində nəzərdə tutulan qaydalar pozularsa, o zaman müəssisə və təşkilatların tətilinin həyata keçirilməsi ilə iş dayandırılarsa, fiziki şəxslər cəzalandırılır: “Fiziki şəxslər 200-350 manat, həmçinin, şəxsiyyəti nəzərə alınmaqla 15 gün həbs cəzası da nəzərdə tutulub. Vəzifəli şəxslər 500-700 manat dəyərində cərimə olunurlar. Hüquqi şəxslər isə daha yüksək məbləğdə cərimə olunurlar. Bu sahə üzrə qanunvericilikdə boşluq var idi. Tətilin hansıl yollarla qarşısının alınması göstərilmirdi. İnzibati Xətalar Məcəlləsinə təklif olunan yeni dəyişikliklərə görə, idarə, müəssisə və təşkilatlarda tətil və digər üsullarla fəaliyyətin dayandırılması ilə bağlı yeni cəzaların müəyyənləşdirilməsi müsbətdir”.
Günel CƏLİLOVA
