İlqar Orucov: “Elm tutumlu müəssisələr yeni kəşflər, texnologiyalar tətbiq etməklə vəsaiti özəl sektordan qazana bilərlər”
Xəbər verildiyi kimi, Azərbaycan Milli Elmlər Akademiyasının Yüksək Texnologiyalar Parkının (YTP) "Made in Azerbaijan" brendi ilə hazırlanmış məhsulları olacaq. Bunu Azərbaycan Milli Akademiyasının prezidenti Akif Əlizadə deyib. O qeyd edib ki, YTP elə bir inkişafa nail olmalıdır ki, "Made in Azerbaijan" brendi ilə beynəlxalq aləmə çıxa bilsin.
Akademiya prezidenti əlavə edib ki, YTP-nin özünün infrastrukturu yaradılmaqdadır: "Onun marketinqi, reklamı olmalıdır. İlyarımdır yaranan YTP ilə artıq əməkdaşlıq etmək istəyənlər var. Yerli və xarici biznesmenlər bizə müraciət edirlər. Bizim müdafiə sənayesi istiqamətində yeniliklərimiz olacaq. Başqa biznes sahələri üzrə də yeniliklərin olması nəzərdə tutulub". Mövzu ilə bağlı fikir bildirən fəlsəfə doktoru, Azərbaycan Gənc Alim, Aspirant və Magistrlər Cəmiyyətinin sədri, AMEA Gənclərin İntellektual İnkişaf Mərkəzinin direktoru İlqar Orucov “Bakı-Xəbər”ə açıqlamasında qeyd etdi ki, uzun illərdir əksər ekspertlər tərəfindən Azərbaycan elminə qoyulan sərmayənin səmərəsiz istifadə olunduğu bildirilir: “Bu fikirlərdə görürük ki, böyük həqiqətlər var. Humanitar elmlərə hər zaman dövlət tərəfindən qayğı göstərilib. Bu sahə daim dövlət vəsaiti hesabına yaşamalıdır. Çünki milli dövlətçilik ideologiyasını formalaşdırır. Bu baxımdan humanitar sahə dövlət üçün prioritet sayılır. Ancaq onu da nəzərə almaq lazımdır ki, Azərbaycan neft ölkəsidir. Azərbaycan neft ölkəsi olduğu üçün bu sahə ölkəmizdə xeyli inkişaf edib. Bu istiqamətdə yeni texnologiyaların hazırlanması, sənayedə tətbiq olunmasına nəzarət olunmalıdır. Həmçinin, informasiya texnologiyaları artıq dünyada aparıcı istiqamətlərdən biridir. İqtisadiyyata böyük töhfə verən elmi istiqamətlərdən biri də məhz informasiya texnologiyalarıdır. Təəssüflər olsun ki, biz Azərbaycan elminin bu sahədə geri qaldığının şahidiyik”.
Həmsöhbətimizin sözlərinə görə, ümumdaxili məhsulun 2 faizi elmə aid deyilsə, həmin ölkələrdə elm görüntü xarakteri daşıyır. Azərbaycanda isə elmə ÜDM-in 0,5 faizi töhfə verir: “Azərbaycanla müqayisədə Amerikada elmə 30 dəfə artıq vəsait ayrılır. Ancaq nəzərə almaq lazımdır ki, həmin vəsaiti elm özü qazanır. Elm tutumlu müəssisələr yeni kəşflər, texnologiyalar tətbiq etməklə vəsaiti özəl sektordan qazanırlar. Ancaq Azərbaycan elmi özəl sektordan gəlir əldə etmir. Çünki Azərbaycan elmi özəl sektor üçün maraqlı deyil. Bu səbəbdən də elm büdcədən asılıdır. Qeyd edim ki, son illər Azərbaycan elminə ciddi sərmayələr yatırılıb.Ancaq buna baxmayaraq, nəticə istənilən səviyyədə deyil”.
İ.Orucov hesab edir ki, elmin dövlət büdcəsindən asılılığına son qoyulmalıdır. Elmin özünün müstəqil olaraq maliyyə qazanmaq imkanları olmalıdır: “Azərbaycan elminin inkişafı ilə bağlı Prezident İlham Əliyev tərəfindən Milli Strategiya qəbul olunub. O Strategiya düzgün işlənməli və əməl olunmalıdır”.
Günel CƏLİLOVA
