Adil Cabbarov: “Artıq respublikamız dünyada həm turizm üçün əlverişli məkandır, həm burada sabitlik, sülh və əminamanlıq, dinclik var, həm də…” Aydın Xan Əbilov: “Günü-gündən Bakıda toy edən əcnəbilərin sayının artması olduqca təqdirəlayiq haldır”
Azərbaycan bütün göstəricilərinə görə xarici turistlərin böyük maraq göstərdiyi ölkələrdən biridir. Son zamanlara qədər xarici turistlər respublikamıza gəzməyə, təbiətimizlə, mətbəximizlə, tarixi abidələrimizlə, muzey və teatrlarımızla tanış olmaq üçün gəlirdilər. Bu gün isə müşahidələr göstərir ki, onlar Azərbaycana həm də toy etmək məqsədilə gəlirlər.
Məlumatlara görə, axır zamanlar Azərbaycanda toy edən turistlərin sayı artır. Yəni onlar toylarını daha gözəl, yaddaqalan, təmtəraqlı keçirmək üçün ölkəmizi seçirlər. Sirr deyil ki, bu da turizm sektorunda toy turizmi deyilən yeni bir sahənin əsasını qoyur. Artıq Azərbaycanda toy turizminin özül daşları qoyulmaqdadır.
Mətbuatın yazdığına görə, bu gün daha çox hindistanlılar və iranlılar toy etmək üçün Azərbaycanı seçir və ailələri üçün əlamətdar olan günü ölkəmizdə qeyd edirlər.
Ekspertlər də təsdiqləyirlər ki, Bakıda toy edən turistlərin sayı günü-gündən artmaqdadır.
“Xezerxeber.az”ın yaydığı məlumata görə, turizm şirkətləri son dövrlər xüsusən Hindistan və İrandan olan turistlərdən toy təklifləri alırlar.
Turizm üzrə ekspertin qeyd etdiyinə görə, ölkəmizdə toy etmək istəyən turistlərin müəyyən tələbləri olur. Onlar əsasən toy edilən məkanda öz milli mətbəxlərindən olan yeməklərin bişirilməsini istəyirlər. Ekspertin sözlərinə görə, bu təcrübə Türkiyədə bir neçə il bundan əvvəl tətbiq edilib və turizm sahəsinin inkişafına öz müsbət təsirini göstərib. Xarici turistlərin toy etməklə bağlı təkliflərinin artması ölkə turizminin inkişaf etməsinə kömək edəcək.
Azərbaycanda toy turizminin inkişafının çox önəmli olduğunu deyən turizm üzrə mütəxəssis Adil Cabbarov bizimlə söhbətində bildirdi ki, əcnəbilərin toy etmək üçün Azərbaycanı seçməsi təqdirəlayiqdir. O hesab edir ki, əcnəbilərin toy məkanı kimi seçdiyi otellər, populyar restoran və şadlıq evləri öz fəaliyyətlərində dəyişikliklər etməlidirlər. Ekspert qeyd edir ki, Azərbaycanda toy turizmini inkişaf etdirmək üçün xüsusi işlər görülməlidir: “Əcnəbilərin, xüsusən də Şərq ölkələrindən olan turistlərin Azərbaycanda, Bakıda toy etməsi, onların bu istəkdə olması müsbət haldır. Bu onun göstəricisidir ki, artıq respublikamız dünyada həm turizm üçün əlverişli məkandır, həm burada sabitlik, sülh və əminamanlıq, dinclik var, həm də cəmiyyətimizdə tolerantlıq kimi mühüm bir anlayış mövcuddur. Azərbaycan xalqının qonaqpərvərliyi, çeşidli mətbəxi, milli adət-ənənəsi də turistlərin diqqətini cəlb edir. Bu gün İrandan, Hindistandan, Avropa və Asiya ölkələrindən Azərbaycana gələn turistlər çoxdur və onlar çalışırlar ki, bizim mədəni həyatımıza qaynayıb qarışsınlar. Düşünürəm ki, yerli turizm şirkətləri toy üçün onlara müraciət edən turistlərlə xüsusi olaraq işləməli, onların Azərbaycana cəlb olunması üçün tədbirlər həyata keçirməlidirlər. Yerli otel və restoranlar, şadlıq evləri də öz işlərini daha yüksək səviyyədə qursunlar ki, burada toy edən əcnəbilər bundan razı qalsınlar. Təcrübə göstərir ki, ölkəmizdə, paytaxtımızda toy edən turistlər xidmətdən razıdırlar. Belə olmasaydı, onlar burada toy etməkdə maraqlı olmazdılar”.
Ekspert bildirdi ki, ümumiyyətlə, Türkiyə və digər ölkələr toy turizmi sahəsində böyük təcrübəyə malikdirlər və onlar bundan yüksək məbləğdə gəlir götürürlər. Azərbaycanda toy turizminin gələcəkdə böyük perspektivi olduğunu deyən Adil Cabbarov hesab edir ki, bu sistem elə qurulmalıdır ki, il ərzində ölkəmizdə toy etmək istəyən əcnəbilərin sayı artsın: “Əcnəbilər toy etmək üçün ölkəmizi könüllü olaraq seçirlər. Bu sahədə işlər daha sistemli şəkildə qurulmalıdır ki, əcnəbilər kütləvi şəkildə burada toy etsinlər. Şadlıq evləri, restoranlar və otellər bu toyların daha uyğun qiymətə başa gəlməsinə xüsusi fikir verməlidirlər. Yenə də deyirəm, əsas məsələ turizm şirkətlərinin əcnəbilərlə daha sıx və mütəşəkkil şəkildə işləməsidir. Bu həm toy turizmini inkişaf etdirəcək, həm də ölkə büdcəsinə gəlir gətirəcək”.
Kulturoloq Aydın Xan Əbilovun fikrincə də toy etmək üçün Azərbaycanı, Bakını seçən turistlərin sayının günü-gündən artmasını təqdir edir. Onun sözlərinə görə, bu, ölkəmizin dünyada formalaşan müsbət imici ilə bağlıdır. “Azərbaycan mənəviyyatında, mədəniyyətində toy çox böyük məişət, mədəni, sosial, ictimai hadisədir. Buna görə də bizdə hər zaman toya xüsusi hazırlıqlar gedir. Azərbaycanda toyun mərhələli şəkildə bir sıra mərasimləri var ki, bunlar həm yerli əhali, həm də xaricdən gələn qonaqlar, turistlər tərəfindən çox maraqla qarşılanır. Əcnəbi turistlər bizim toylarda, şənliklərdə, mərasimlərdə bir dəfə iştirak edəndən sonra hər zaman ölkələrində Azərbaycan toyunun pulsuz-parasız təbliğatçısına çevrilirlər. Bu da bizə mədəniyyət, məişət, həyat tərzi baxımından yaxın olan Şərq ölkələrindən olan insanların diqqətini cəlb edir. Hətta Asiyadan, Avropadan olan turistlər də toylarımıza maraq göstərirlər. Vaxtilə Ərəb ölkələrindən, eləcə də Avropadan gəlib Türkiyədə toy edirdilər. Bu gün isə o proses Azərbaycanda baş verir. Əcnəbilər toy etmək üçün ölkəmizi seçirlər. Azərbaycanda turizmlə bağlı həyata keçirilən turizm proqramları nəticəsində ölkəmizdə turizm inkişaf edir. Ölkə başçısı İlham Əliyevin rəhbərliyi ilə tərtib edilən yol xəritəsində turizmin inkişafı ilə bağlı bəndlər də əks olunub. Bu gün Azərbaycan dünyada yüksək turizm potensialı olan ölkəyə çevrilib. Ölkəmiz həm Şərq, həm Qərb mədəniyyətlərini, mətbəxini, incəsənətini özündə birləşdirir. Bu səbəbdən də Hindistan, İran, Türkiyə, İraq, Ərəb ölkələrindən gəlib burada evlənənlər də, gəlib toylarını öz adətlərinə uyğun Bakıda keçirənlər də çoxdur. Günü-gündən Bakıda toy edən əcnəbilərin sayının artması olduqca təqdirəlayiq haldır” - deyə bildirən A.X.Əbilov qeyd etdi ki, on il əvvəl Azərbaycanda daxili turizmin inkişafı üçün bir sıra təkliflər irəli sürüb. O təklif edib ki, bakılı Lənkəranda, lənkəranlı Naxçıvanda, naxçıvanlı Gəncədə toy etsin və bu, bölgələrin büdcəsinə xeyir versin: “Mənim bu təklifim indi xaricilər tərəfindən reallaşdırılıb. Artıq əcnəbilər Bakıda toy edirlər. Bu həm turizmin inkişafına, həm kreativ biznesin tərəqqisinə xidmət edir, həm də büdcəyə əlavə gəlir gətirmək baxımından çox faydalıdır. Bunu dəstəkləmək, təqdir etmək lazımdır. Ola bilsin, gələcəkdə Azərbaycanda toy keçirmək istəyən əcnəbilər üçün ayrıca carter reysləri təşkil olundu. Çünki buna ehtiyac yaranır. Onu da deyim ki, Bakıda toy etmək istəyən əcnəbilərin ölkəmizə daha kütləvi axını üçün onların vətəndaşı olduğu ölkələrlə ya viza rejimi ləğv edilməli, ya da sadələşdirilməlidir. Bunun əhəmiyyəti də böyük olar”.
A.X.Əbilov onu da vurğuladı ki, Azərbaycanda toy turizminin inkişafı həm ölkəmizin xaricdə təbliğinə, həm də büdcəmizə əlavə gəlir gəlməsinə səbəb olacaq.
İradə SARIYEVA
