İnsan alverinə qarşı mübarizənin gücləndirilməsi və qarşısının alınması məqsədilə vətəndaş cəmiyyəti tərəfindən həyata keçirilən maarifləndirmə tədbirləri davam edir. Qeyd etdiyimiz kimi, mövcud profilaktik və xəbərdarlıq tədbirləri Azərbaycan Respublikasının Prezidenti tərəfindən təsdiq edilmiş Milli Fəaliyyət Planının tələblərinin yerinə yetirilməsi məqsədini daşıyır.
Növbəti tədbir Azərbaycan Respublikası Prezidentinin yanında QHT-lərə Dövlət Dəstəyi Şurasının maliyyə dəstəyi ilə 20 aprel 2018-ci il saat 11:00-da Lənkəran Dövlət Universitetində pedaqoji və tələbə kollektivinin, KİV nümayəndələrinin, Lənkəran Rayon Polis Şöbəsi rəisinin şəxsi heyət üzrə köməkçisi Elsevər Məmmədovun və müvafiq xidmət sahələri üzrə polis əməkdaşlarının, rayon ictimai fəallarının, Səhiyyə, Təhsil, Gənclər və İdman, Mədəniyyət və Turizm nazirliklərinin yerli struktur bölmələrinin nümayəndələrinin iştirakı ilə həyata keçirilib.
Tədbiri giriş sözü ilə Universitetin prorektoru, dosent Kamran Kazımov açaraq, sözü “Polisə Dəstək” İctimai Birliyinin sədri, Mətbuat Şurasının icraçı katibi Şəmsəddin Əliyevə verib.
Şəmsəddin Əliyev insan alverini doğuran səbəb və şərait, onun aradan qaldırılması, əhalinin, daha çox gənc nəslin maarifləndirilməsi və bu sahədə polis orqanlarına ictimaiyyətin dəstəyini təmin etməklə bağlı geniş məlumat verib.
O, çıxışını insan alveri ilə mübarizənin əsas məqsədi, insanların köləyə çevrilməsinin qarşısını almaq, cəmiyyəti təhlükəsiz, ədalətli və vahid vətəndaş cəmiyyətinə çevirmək, belə cinayətlərlə mübarizədə ictimai fəallığın artırılmasına nail olmaq, cəzanın labüdlüyü və məqsədi istiqamətində davam etdirərək, cəmiyyətdə şəxsiyyətin inkişaf səviyyəsinin təhsillə, vətəndaş mövqeyi və fərdin siyasi düşüncəsi (həm də sosial) ilə bilavasitə əlaqədar olduğunu diqqətə çatdırıb, insan alveri cinayətləri, vətəndaşların iradə azadlığı barədə məlumatı olmayan şəxslərin maarifləndirilməsi və ictimai münasibətlərə zidd halların qarşısının alınmasında əhəmiyyətini vurğulayıb. “Savadsızlıq və məlumatsızlıq insan alveri cinayətlərinə zəmin yaradan amillərdəndir”-deyə Ş.Əliyev çıxışına yekun vurub.
Tədbirdə Lənkəran Şəhər Polis Şöbəsinin rəis köməkçisi Elsevər Məmmədov ŞPŞ-nin cinayətkarlıqla mübarizəsinin vəziyyəti barədə məlumat verib.
Sonda “İnsan Alveri ilə Mübarizə” haqqında videoçarx nümayiş etdirilib və tədbir iştirakçıları tərəfindən maraqla qarşılanıb.
Layihə ərtafında maarifləndirmə tədbirləri 30 aprel 2018-ci il Sumqayıt Dövlət Universitetində, 02 iyun 2018-ci il Nərimanov RPİ-də, 23 iyun 2018-ci il Sabunçu RPİ-də davam etdiriləcək.
Baki-xeber.com
