Ruslan Quliyev: “Bizim əsas məqsədimiz fəaliyyət dönəmi müddətində ölkəyə xarici ekspertlərin dəvət edilməsi, dünya təcrübəsinin öyrənilməsi, Azərbaycan sağlıq turizminin dünyaya çatdırılmasıdır”
Məlum olduğu kimi, Sağlamlıq və Termal Turizmə Dəstək Assosiasiyasının sədri Ruslan Quliyev Ümumdünya Sağlamlıq Turizmi Təşkilatının (ÜSTT) prezidenti seçilib. Assosiasiyanın sədrinin ÜSTT prezidenti seçilməsi münasibətilə və təşkilatın fəaliyyət istiqamətlərini öyrənmək məqsədilə Ruslan Quliyevlə söhbətləşdik.
- Ruslan bəy, öncə sizi ÜSTT prezidenti seçilməniz münasibətilə təbrik edirik. ÜSTT-yə seçki nə zaman olub?
- Azərbaycan nümayəndə heyəti ilə cari ilin 4-8 aprel tarixlərində Türkiyə Respublikasının Antalya vilayətində II "Hestourex” sammiti və sərgisində iştirak etdi. 165-ə yaxın ölkədən təxminən 5000-dən artıq şəxsin iştirakı ilə sərgi keçirildi. 7 aprel tarixində 4-cü Ümumdünya Sağlamlıq Turizmi Təşkilatı Baş Assembleyasının iclası keçirildi, bir sıra məsələlər müzakirə olundu. Sonda isə bu təşkilata seçki həyata keçirildi. Seçkinin nəticələrinə görə, Azərbaycan bir il müddətinə bu təşkilata rəhbər seçildi. Məlumat üçün bildirim ki, təşkilatın ilk prezidenti Türkiyə Sağlıq Turizmi Konseyi başkanı Emin Çakmak olub.
Onu da qeyd edim ki, Ümumdünya Sağlamlıq Turizmi Təşkilatı Türkiyənin təşəbbüsü ilə 23 mart 2013-cü ildə Monakoda “İNTERNATİONAL MEDİCAL TRAVEL Exhibition and Conference İMETEC 2013” sərgisi zamanı 14 ölkədən 21 nümayəndənin iştirakı ilə yaradılıb.
Keçən ilki forumda Azərbaycan vitse-prezidentlik postunda idi. O zaman biz vitse-prezident olaraq seçilmişdik. 2017-ci il 27 fevral tarixində Ümumdünya Sağlamlıq Turizmi Təşkilatı Baş Assembleyasının Alman deklorasiyasi qəbul olundu. Bununla da sağlıq turizminə 8 alt seqmenti müəyyən olundu.
- Ümumiyyətlə, ÜSTT-nin fəaliyyət istiqaməti nədən ibarətdir?
- Təşkilatın əsas şüarı “hamı üçün sağlamlıq”dır. ÜSTT bu sektorun səsi olmaq missiyasını daşıyır. Təşkilat yerli və milli səviyyədə icrası çətin olan layihə və fəaliyyətlərə yardım edir. Bu sektora liderlik edərək üzv ölkələrin əlaqədar strukturlarına daim yardım göstərir.
Ümumdünya Sağlamlıq Turizmi Təşkilatında Amman və Dubay deklorasiyası qəbul olunub. Əsas fəaliyyət istiqaməti bütün ölkələrin analoji təşkilatlarını birləşdirmək və işbirliyi yaratmaqdır. Həmçinin, dövlət institutları ilə sıx əməkdaşlıq etmək, yeni innovativ sistemlərin ölkəyə gətirilməsi və Azərbaycan sağlıq turizm modelinin daha da mükəmməlləşdirilməsidir.
- Ruslan bəy, sizin bu təşkilata prezident seçilməniz Azərbaycanın dünya turizminə inteqrasiyasına necə fayda verəcək?
- Təbii ki, bu hal Azərbaycan turizminin inkişafına müsbət təsir göstərəcək. Məlum olduğu kimi, Dünya sağlıq turizmində bu il “Azərbaycan ili” elan olunub. Bu il ərzində biz qarşılıqlı səfərləri artıracağıq, dünya ölkələrindən Azərbaycanın bölgələrinə infoturlar təşkil olunacaq. Həmçinin, simpozium və konqreslərlə də bu il yadda qalacaq. Finalda isə təşkilatın 5-ci prezidentinin seçilməsi də böyük bir tarixi hadisə olacaq.
- ÜSTT Azərbaycan sağlamlıq turizminə nə kimi töhfə verəcək?
- Azərbaycan qeyd olunan ali quruma üzv seçilməklə bütün dünyanın sağlıq turizmi institutları, təşkilatları, mütəxəssislərinin diqqətini özünə cəlb edib. Bu müddət ərzində Azərbaycan yeni bir konsepsiya və model irəli qoymalı və əməkdaşlığın yeni konturlarını müəyyən etməlidir. Bizim əsas məqsədimiz fəaliyyət dönəmində ölkəyə xarici ekspertlərin dəvət edilməsi, dünya təcrübəsinin öyrənilməsi, Azərbaycan sağlıq turizminin dünyaya çatdırılmasıdır. Əsas məqsəd Naftalan, Duzdağ, İstisu, Qalaaltı kimi məkanlarımızın daha professional şəkildə təqdim olunması, ölkəyə bu sahədə gələcək turist axınına böyük təsir göstərməkdir. 2019-cu ilin 21-24 fevral tarixlərində Beynəlxalq Sağlamlıq Turizm Forumunun Azərbaycanda keçirilməsi ölkənin təqdimatına töhfə verəcək və xarici sağlamlıq mütəxəssislərinin qatılması ilə biz “beyin fırtınası” yaradaraq, mövcud problemlər haqqında fikirlər bildirəcəyik. Əsas məqsəd Azərbaycanı mükəmməl şəkildə təqdim etməkdir.
- Bəllidir ki, Azərbaycanda sağlamlıq turizmi ilə bağlı mütəxəssis problemi yaşanır. Bu problem necə həll olunacaq?
- Qeyd edim ki, sağlıq və tibbi turizm olduqca spesifik sahədir. Bu sahədə çalışanlar xüsusi bir proqram üzrə fəaliyyət göstərməlidirlər. Təəssüflər olsun ki, sağlıq turizmi sahəsində kadr çatışmazlığı hiss olunur. Ali təhsil müəssisələrində peşə standartlarının daha mükəmməl şəkildə tətbiq olunması, aktual ixtisaslara üstünlük verilməsi nəzərdə tutulub. Bəllidir ki, əvvəllər Azərbaycan Turizm və Menecment Universitetində müalicə işi fakültəsi var idi. Bu ixtisasın yenidən bərpa olunması aidiyyəti şəxslər tərəfindən təklif olunub. Bu məsələ Turizm Şurasının da diqqətindədir.
Günel CƏLİLOVA
