Ötən gün Beynəlxalq Mətbuat Mərkəzində Sağlamlıq və Termal Turizmə Dəstək Assosiasiyasının sədri Ruslan Quliyevin Ümumdünya Sağlamlıq Turizmi Təşkilatının (ÜSTT) prezidenti seçilməsi münasibətilə mətbuat konfransı keçirilib. Media nümayəndələrinin və turizm ictimaiyyətinin iştirak etdiyi tədbirdə çıxış edən Ruslan Quliyev rəhbərlik etdiyi təşkilat haqqında geniş məlumat verib. O, eyni zamanda, Azərbaycan Sağlamlıq və Termal Turizminə Dəstək İctimai Birliyi haqqında da danışıb.
R.Quliyev çıxış edərək bildirib ki, təşkilat yarandığı gündən dövlətin yürütdüyü turizm siyasətini dəstəkləyir və Azərbaycanda sağlamlıq turizminin daha da inkişaf etdirilməsi naminə öz töhfəsini vermək istiqamətində mütəşəkkil fəaliyyət prinsiplərini hər zaman rəhbər tutur: “Bildiyiniz kimi, Azərbaycan səsvermə yolu ilə 2019-cu il Ümumdünya Sağlamlıq Turizmi Təşkilatına rəhbər seçildim. Çalışacağıq ki, bu dövrdə Azərbaycanın daha çox dividend qazanmasına və ölkəyə turist axınına nail olaq. Məlumat üçün bildirim ki, Azərbaycan 2013-cü ildən Ümumdünya Sağlamlıq Turizmi Təşkilatında (Global Helathcare Travel Council - GHTC) təmsil olunur. 2014-cü ildən isə təşkilatın idarə heyətində fəaliyyət göstərir. Təşkilatın ilk prezidenti Türkiyə Sağlıq Turizmi Konseyi başkanı Emin Çakmak olub. O hazırda qurumun fəxri prezidentidir. Məqsədimiz GHTC-nin geniş imkanlarından istifadə edərək, ölkəyə turist axınına səbəb ola biləcək fəaliyyətləri gücləndirmək, ekspert xidmətləri və investisiya imkanlarını dəyərləndirməkdən ibarətdir”.
R.Quliyevin dediyinə görə, Ümumdünya Sağlamlıq Turizmi Təşkilatı Türkiyənin təşəbbüsü ilə 23 mart 2013-cü ildə Monakoda “İNTERNATİONAL MEDİCAL TRAVEL Exhibition and Conference İMETEC 2013” sərgisi zamanı 14 ölkədən 21 nümayəndənin iştirakı ilə yaradılıb: “Global Healthcare Travel Council”in idarə heyətinə və rəhbərliyinə yeni seçkilər 04-08 aprel 2018-ci il tarixlərində Türkiyə Respublikasının Antalya vilayətində II HESTOUREX SAMMİTİ və sərgisi çərçivəsində həyata keçirilib. “Azərbaycan Sağlamlıq və Termal Turizminə Dəstək Assosiasiyası da bu tədbirdə təmsil olunub. Bu seçim Azərbaycanda sağlamlıq turizminin inkişafına yeni töhfə verəcək və ölkə turizminin bu istiqamət üzrə tanıdılmasına geniş imkanlar yaradacaq. Bu təşkilatda fəal üzvlüyümüz Azərbaycan Mədəniyyət və Turizm Nazirliyinin dəstəyi ilə reallaşıb. Ötən beş ildə ölkəmizin turizm potensialının tanınmasına böyük əmək sərf olunub. Biz çalışacağıq ki, rəhbərliyimiz dövründə də bu istiqamətdə işlərimizi davam etdirək. 22 ölkədən 48 nümayəndənin qatıldığı belə bir möhtəşəm tədbirdə Azərbaycanın Ümumdünya Sağlamlıq Turizmi Təşkilatına səsvermə yolu ilə rəhbər seçilməsi bir daha ölkəmizin dünyada artan nüfuzundan xəbər verir. Toplantının nəticələrinə görə, 2019-cu ildə Beynəlxalq Sağlamlıq Turizmi Forumu Azərbaycanda keçiriləcək. Bu da ölkəmizdə turizmin daha da genişlənməsinə təkan verəcək”.
R.Quliyev onu da vurğulayıb ki, yaxın vaxtlarda ölkəmizdə vahid turizm reyestri yaradılacaq: “Həmçinin, Azərbaycanın sağlamlıq turizmi xəritəsi hazırlanır. Ölkəmizdə turizm qeyri-neft sektorunun prioritet istiqamətlərindən biri olmaqla, Azərbaycan Respublikasının milli iqtisadiyyat perspektivi üzrə Strateji Yol Xəritəsində mühüm yer tutur”.
Assosiasiya sədrinin sözlərinə görə, yaxın zamanlarda Azərbaycanda 2018-2020-ci illər üçün “Sağlamlıq turizminin inkişafı üzrə fəaliyyət planı” təqdim olunacaq: “Bu plan əsasən brendinq və beynəlxalq sertifikatların alınması məsələlərini əhatə edəcək”.
Sonda tədbir iştirakçıları Dünya Sağlamlıq Turizmi Təşkilatının son seçkisini əks etdirən videoçarxa baxıblar.
Günel CƏLİLOVA
