Şahin Camalov: “Hesab edirəm ki, yol polisi tərəfindən uşaq bağçalarında və məktəblərdə həyata keçirilən maarifləndirici görüşlərin çox müsbət nəticələri olacaq” Şəmsəddin Əliyev: “Uşaqların bu sahədə maarifləndirilməsi yol hərəkəti ilə bağlı cinayət xarakterli halların qarşısının alınmasında mühüm rol oynayacaq”
Yol hərəkəti qaydalarını uşaqdan böyüyə hər kəsin bilməsi vacibdir. Son dövrlər bu sahədə həyata keçirilən maarifləndirmə tədbirlərinin miqyası günü-gündən genişlənir. Belə ki, artıq maarifləndirmə işi məktəbəqədər təhsil müəssisələrində və orta məktəblərdə də həyata keçirilir. Dövlət Yol Polisi (DYP) əməkdaşları tərəfindən yol hərəkəti qaydalarına əməl etməklə bağlı orta məktəblərdə və uşaq bağçalarında keçirilən görüşlər uşaqların bu sahədə məlumatlanmasına səbəb olur.
DİN Mətbuat Xidmətinin əməkdaşı Natiq Cavadovun qeyd etdiyinə görə, bu ilin ötən 3 ayında da yol polisi əməkdaşları tərəfindən orta məktəblərdə, uşaq bağçalarında yüzlərlə belə görüş keçirilib. Görüşlərdə şagirdlərə yol hərəkəti qaydalarına əməl etmək və piyada keçidlərindən düzgün istifadə etmək barədə tövsiyələr verilib, bu mövzuda hazırlanmış videoçarxlar nümayiş etdirilərək hər biri ətraflı izah edilib. Bağçalarda uşaqlara yolu təhlükəsiz keçmə üsulları əyani olaraq göstərilib, piyadanın vəzifələri barədə ilkin təsəvvür yaradılıb, onların başa düşəcəyi formada yol hərəkəti qaydaları haqqında ətraflı məlumat verilib, indidən onlarda küçə, yol, səki, işıqfor barəsində ilkin anlayışlar formalaşdırılıb.
Dövlət Yol Polisi tərəfindən orta məktəblərdə və uşaq bağçalarında həyata keçirilən maarifçilik tədbirlərinin böyük effekt verəcəyini qeyd edən ekspertlərin sözlərinə görə, yol hərəkəti qaydalarına riayət etməyi uşaqlara kiçik yaşlarından öyrətmək olduqca müsbətdir.
“Təhlükəsiz Yol” Alyansının koordinatoru Şahin Camalov Bakı-Xəbər”ə bildirdi ki, uşaq bağçalarında və orta məktəblərdə DYP xətti ilə keçirilən bu kimi tədbirlərin böyük əhəmiyyəti var: “Ümumiyyətlə, yol hərəkəti qaydaları ilə bağlı məsələlərə birtərəfli yanaşmaq olmaz. Yəni yol hərəkəti ilə bağlı qanunları sərtləşdirmək, yol polisi əməkdaşlarının sayını artırmaq kifayət deyil. Düzdür, bunlar vacibdir, ancaq onlarla paralel olaraq maarifləndirmə işinin həyata keçirilməsi də gərəklidir. Bu sahədə maarifləndirmə tədbirləri həyata keçirilir və daha da gücləndirilməlidir. Mən bağçalarda və orta məktəblərdə yol hərəkəti qaydaları ilə bağlı maarifləndirmə işini müsbət qiymətləndirirəm. Hesab edirəm ki, uşaqlar erkən dövrdən yol hərəkəti qaydaları ilə bağlı maarifləndirilməlidir. Yol təhlükəsizliyi ilə bağlı əsas problemlərdən biri vətəndaşlarımızın uşaq vaxtlarında, yaxud keçid yaş dövründə yol hərəkəti qaydaları ilə bağlı maarifləndirilməməsidir. Yəni vaxtilə onların maarifləndirilməməsi bu sahədə mövcud problemin ortaya çıxmasına səbəb olub”.
Ş.Camalov vurğuladı ki, müasir bağça və məktəb uşaqları həm piyada, həm də gələcəyin sürücüsü kimi indidən yol hərəkəti qaydalarını mənimsəməlidirlər: “Bakıda piyadaların vurulması ilə nəticələnən qəzaların əksəriyyəti piyadaların yol hərəkəti qaydalarına düzgün riayət etməmələri ilə bağlı olur. Yəni piyadalar yolun onlar üçün nəzərdə tutulan hissələrindən keçmədikləri üçün faciə ilə üzləşirlər. Uşaqların 3-5 yaşından yol hərəkəti nişanlarını bilməsi, ümumiyyətlə, bu sahə ilə bağlı bilgi əldə etməsinin effektiv nəticələri olacaq. Burada iki müsbət tərəf var. Yol polisinin uşaq bağçalarında, məktəblərdə keçirdikləri görüş həm onların yol hərəkəti qaydaları haqqında məlumat almasına, həm də uşaqlarda elə bu yaşdan polis əməkdaşlarına inam yaranmasına və polislərin müsbət imicinin formalaşmasına səbəb olacaq. Hesab edirəm ki, yol polisi tərəfindən uşaq bağçalarında və məktəblərdə həyata keçirilən maarifləndirici görüşlərin çox müsbət nəticələri olacaq”.
“Polisə Dəstək” İctimai Birliyinin rəhbəri Şəmsəddin Əliyev də bizimlə söhbətində bu görüşlərin effektiv nəticələr verəcəyini qeyd etdi. Ş.Əliyevin sözlərinə görə, uşaqlar, mütləq mənada, yol hərəkəti qaydalarını bilməlidirlər ki, qəzalarla üzləşməsinlər: “Düşünürəm ki, kiçik yaşlardan uşaqlara yol hərəkəti qaydaları haqqında məlumat verilməsi, yol təhlükəsizliyi ilə bağlı məsələlərin aşılanması çox müsbət haldır. Bu maarifləndirmə işi yol hərəkəti qaydaları ilə bağlı qəza hadisələrinin qarşısının alınmasına təkan olar. Eyni zamanda da uşaqların maarifləndirilməsi yol hərəkəti ilə bağlı cinayət xarakterli halların qarşısının alınmasında mühüm rol oynayacaq. Bu baxımdan, hesab edirəm ki, Daxili İşlər Nazirliyinin və vətəndaş cəmiyyətinin birgə keçirdikləri bu sayaq tədbirlər, mütləq mənada, həm profilaktik, həm maarifləndirmə, həm də xəbərdarlıq nöqteyi-nəzərindən piyadaların yol hərəkət qaydalarını pozması hallarının qarşısını ala bilər. Mən bu maarifləndirmə işini alqışlayıram”.
Ş.Əliyev qeyd etdi ki, yol polisi əməkdaşlarının uşaq bağçalarında və məktəblərdə görüşlər keçirməsi təsadüfi deyil. Onun sözlərinə görə, uşaqların təhlükəsizliyi Azərbaycan polisinin diqqət mərkəzindədir. Müsahibimiz qeyd etdi ki, məktəblərdə və bağçalarda bu cür tədbirlərin həyata keçirilməsinin əsas səbəblərindən biri də yol hərəkəti qaydalarını mükəmməl bilən və qəzasız dünyaya qədəm qoyan bir nəsil yetişdirməkdir. “Bilirsiniz ki, məktəblərin əksəriyyəti intensiv hərəkət olan yolların kənarındadır. Fasilə zamanı və dərsdən sonra o yollara axının qarşısının alınması bəzən mümkünsüz olur. Görüsən ki, şagirdlər heç nəyə məhəl qoymadan, tələsgənlik edib yolu keçirlər. Bu da, əlbəttə, uşaqlar üçün böyük təhlükə yaradır. Deyək ki, Azərbaycan Respublikasının Prezidenti yanında Qeyri-Hökumət Təşkilatlarına Dəstək Şurasına ayrılan vəsaitin də müəyyən bir hissəsi bağçalarda, məktəblərdə uşaqların və müəllimlərin yol hərəkəti qaydaları ilə bağlı maariflənməsinə yönəldilir” - deyə bildirən Ş.Əliyev qeyd etdi ki, uşaqların bu sahədə maariflənməsi nəticəsində gələcəkdə daha az sayda piyada vurulması hallarına rast gəlinə bilər. Onun sözlərinə görə, maariflənmiş uşaq, yeniyetmə, gənc yol hərəkəti qaydalarını bildiyi üçün özünü təhlükəyə atmayacaq.
İradə SARIYEVA
