Kamran Əsədov: “2019-cu ildə buraxılış imtahanı 2008-ci ildən təsdiq olunan kurrikulum standartları əsasında keçiriləcək, belə olan halda, əvvəlki illərin məzunları üçün çoxlu sayda sıxıntı yaranacaq”
2019-cu ildə ali məktəblərə qəbul olunmaq istəyən əvvəlki illərin məzunları da, cari ilin məzunları kimi, ikimərhələli imtahanda - buraxılış və qəbul imtahanlarında iştirak etməli olacaqlar. Bunu Dövlət İmtahan Mərkəzinin Direktorlar Şurasının sədri Məleykə Abbaszadə deyib.
Onun sözlərinə görə, ümumilikdə, hər il qəbul imtahanlarında iştirak edənlər əsasən cari ilin məzunları olurlar: “Əgər əvvəlki illərin məzunları ali məktəbə orta məktəbi bitirdikləri ildə deyil, bir neçə ildən sonra qəbul üçün imtahanda iştirak etmək istəyirlərsə, öz biliklərini təkmilləşdirməli və müasirləşdirməlidirlər. Əvvəlki illərin məzunları hansı ildə qəbul imtahanlarında iştirak edəcəklərsə, həmin ilin tədris proqramları ilə tanış olmalıdırlar. Hazırda 9-cu sinif bazasından kolleclərə qəbul buraxılış imtahanları əsasında aparılır. Ona görə də 9-cu sinfi bitirə bilməyən şagirdlər üçün ayrıca buraxılış imtahanı təşkil olunur. Əvvəlki illərin məzunları da belə imtahana ayrı bir gündə qatılırlar. 1 il əvvəldən deyə bilmərəm ki, 2019-cu ilin buraxılış imtahanlarının cədvəli necə olacaq. Lakin həmin ildə əvvəlki illərin məzunları da cari ilin məzunları kimi ali məktəblərə qəbul üçün ikimərhələli - buraxılış və qəbul imtahanlarında iştirak etməlidirlər".
Əvvəlki illərin məzunlarının buraxılış imtahanında iştirakı nə dərəcədə düzgün dür? Bu sualla ekspertə müraciət etdik. Təhsil ekspert Kamran Əsədov “Bakı-Xəbər”ə açıqlamasında qeyd etdi ki, 2019-cu ildən etibarən ali məktəblərə və orta ixtisas təhsil müəssisələrinə qəbul imtahanları yeni formatda həyata keçiriləcək: “Buna qədər ali məktəblərə qəbul imtahanı abituriyentlərin seçdiyi 4 ixtisas qrupundan birində topladığı balla birbaşa həyata keçirilirdi. Ancaq 2019-cu ildən etibarən qəbul imtahanı 2 mərhələli şəkildə həyata keçiriləcək. Qeyd edim ki, buna qədər qəbul imtahanının nəticəsi maksimum 700 bal idi. Gələn ildən etibarən isə 700 bal ikimərhələli şəkildə toplanacaq. İlk mərhələdə həmin ildə oxuyan abituriyentlər Azərbaycan dili, riyaziyyat və xarici dildən buraxılış imtahanı verəcəklər. Qəbul imtahanında maksimum bal 400 olacaq. Hər iki imtahanın ümumi nəticəsi yenə 700 bal olacaq. Sadəcə, imtahan ikimərhələli şəkildə keçiriləcək. Nəticəyə uyğun olaraq abituriyentlər ixtisas seçiminə buraxılacaq”.
Həmsöhbətimizin sözlərinə görə, əvvəlki illərin məzunları buraxılış imtahanında iştirak edəcəklər. Sadəcə, o məzunlar ümumi fənn bloku altında 2 mərhələli imtahan verəcəklər. Yekun balla ixtisas seçiminə buraxılacaqlar: “Məlumdur ki, indiyə qədər orta ümumtəhsil məktəblərinin nəticələrinin ali məktəbə qəbulda nəzərə alınmaması şagirdlərin dərsə davamiyyətinə təsir göstərir, onların dərsi önəmsəməməsi ilə nəticələnirdi. Şagirdlər üçün buraxılış imtahanının nəticələrinin yüksək olub-olmaması maraqlı deyildi. Artıq şagirdlər buraxılış imtahanı fənlərini oxuyacaqlar. Onlar həm attestat əldə etmək üçün çalışacaqlar, həm də ali məktəbə qəbulda imtahanın nəticələri onların ixtisas seçiminə təsir edəcək. Kimsə buraxılış imtahanından 200 bal toplayacaq, qəbul imtahanında isə 300 bal. Beləliklə, həmin məzun nəticədə 500 balla ixtisas seçiminə buraxılacaq”.
K.Əsədovun fikrincə, şagirdlərin orta ümumtəhsil məktəblərinə marağını, dərsə davamiyyətini artırmaq, qiymətinin yaxşı olması üçün yeni qaydanın tətbiq olunması müsbət haldır.
Təhsil eksperti onu da əlavə etdi ki, 2019-cu ildə buraxılış imtahanı 2008-ci ildən təsdiq olunan kurrikulum standartları əsasında keçiriləcək. Belə olan halda, əvvəlki illərin məzunları üçün çoxlu sayda sıxıntı yaranacaq: “Çünki o məzunlar tədris aldığı müddətdə kurrikulum vəsaitlərini əldə etməyiblər və o tədris resurslarını mənimsəməyiblər. Bu səbəbdən də əvvəlki illərin məzunları üçün ortaya çıxacaq yeganə problem mövzuların mənimsənilməsi olacaq”.
Günel CƏLİLOVA
