Bahadur Bilalov: “Fermerlər üçün kəndə gələn turistlər potensial alıcı rolunu oynayacaq”
Turizm dünyanın əksər ölkələrinin iqtisadiyyatında getdikcə daha böyük əhəmiyyət kəsb edir. Müxtəlif ölkələr bu sahədə mövcud imkanlardan maksimum yararlanmağa çalışırlar. Kənd yaşıl turizmi də səyahət həvəskarları arasında populyarlıq qazanmaqdadır.
Təbii-coğrafi potensial və tarixi-mədəni obyektlərlə yanaşı, kənd yaşayış məntəqələrinin imkanlarından istifadə edilməsi əsasında bu turizm növü geniş yayılır. Bu sahə kəndlərin və kənd təsərrüfatının inkişafına, sosial-mədəni xidmət sahələrinin yaradılmasına, əhalinin məşğulluğunun təmin edilməsinə və gəlirlərinin artmasına da müsbət təsir göstərir.
Böyük şəhərlərdən gələn insanlarda adi kənd evində yaşayıb istirahət etmək arzusu olur. Buna “kənd turizmi” və ya “aqroturizm” də deyilir.
Azərbaycanda aqroturizmin necə inkişaf etməsi barədə turizm sahəsi üzrə ekspert Bahadur Bilalovun fikirlərini öyrəndik. O, “Bakı-Xəbər”ə açıqlamasında qeyd etdi ki, Azərbaycanda “Kənd Yaşıl Turizminin İnkişafına Dəstək Assosiasiyası” təsis edilib və fəaliyyət göstərir. Bu assosiasiya sırf şəhər mühitində yaşayan insanların kənd evlərində yaşamasını, ekoloji cəhətdən təmiz qidalanmasını nəzərdə tutan turizm növüdür: “Aqrar turizm də buna bənzəyir. Aqrar turizm də kənddə baş verir, ancaq fərqi ondan ibarətdir ki, turist kənd təsərrüfatında baş verən prosesləri canlı şəkildə izləyə bilir, istəsə nəsə iş də görə bilər. Aqrar turizm həm istirahət, həm dərketmə, həm də nəyisə öyrənmək üçün sərfəlidir. Məlumat üçün bildirirəm ki, Avropa İttifaqının maliyyə dəstəyi ilə Azərbaycanda da aqrar turizmin inkişafına dəstək layihəsi həyata keçirilir. Bu layihə təxminən 2020-ci ilə qədər nəzərdə tutulub. Hesab edirəm ki, bu layihənin həyata keçirilməsi son zamanlar Avropa ölkələrində sürətlə genişlənən aqrar turizmin inkişafına səbəb olacaq”.
Həmsöhbətimizin sözlərinə görə, aqrar turizmin inkişafı yeni iş yerlərinin açılmasına səbəb olur: “Bəllidir ki, bu gün kənd yerlərində iş yeri tapmaq müşkül məsələdir. Aqrar turizmin inkişafı ölkə iqtisadiyyatı üçün mühümdur. Fermerlər üçün kənd yerinə gələn turistlər potensial alıcı rolunu oynayacaq. Zənnimcə, aqrar turizmin inkişafı Azərbaycan turizminin gələcəyi üçün önəmlidir”.
Günel CƏLİLOVA
