Zoya Zeynalova: “Cüssəli bədənə sahib olmaq istəyənlər süni preparatlar qəbul etməklə deyil, mütəmadi idman etməklə istəklərinə nail ola bilərlər”
Düzgün bədən quruluşuna sahib olmaq hər kişinin xəyalıdır. Elə qadınların kişilərdə diqqətini çəkən əsas məqamlardan biri də ideal bədən quruluşudur. İdeal bədən quruluşuna sahib olmaq istəyən bəylərin bir qismi bunu gerçəkləşdirmək üçün idmanla məşğul olur. Bəziləri isə süni vasitələrə əl atır. Əsasən həmin şəxslər süni əzələ şişirdən preparatlardan istifadə etməklə cüssəli görünüşə sahib olurlar.
Xatırladaq ki, ötən il Rusiyada yaşayan gənc oğlan bədənini şişirdərək, özünü idmançılara bənzətmək istəyib. Onun bu istəyi həmin gəncin həyatını təhlükəyə atıb. Rus gənc qollarının arxa və ön hissəsinə xüsusi əzələ şişirdən maddə yeridib. O, 10 gün müddətinə bu iynədən istifadə edərək, qollarını inanılmaz şəkildə şişirdib.
Həmin gənc “İnstagram” səhifəsində açdığı profildə özünün şəkillərini paylaşıb. Bir müddət sonra onun qolları get-gedə qızarıb və göyərməyə başlayıb. Həmin ərəfədə bəzi mütəxəssislər süni şəkildə qol əzələlərini böyüdən gəncin qolunun kəsiləcəyini bildirmişlər.
Tək yerli mütəxəssislər deyil, xarici alimlər də süni əzələ şişirdən kimyəvi maddələrin insan orqanizmi üçün təhlükəli olduğunu bildirirlər.
Həkim-ekspert Zoya Zeynalova bizimlə söhbətində qeyd etdi ki, bədən kütləsini şişirtmək üçün istifadə edilən süni qida həbləri insan orqanizminə müxtəlif formada təsir edir: “Bu tip dərmanların metobalizmi qara ciyərdə getdiyi üçün, toksiki təsir nəticəsində qara ciyər, böyrəklər artıq yüklənir. Protein tozları da qida əlavəsidir. Qidadan fərqi budur ki, həddən artıq çox qəbul etdikdə qara ciyəri, böyrəkləri yükləyir, bədənin su balansına təsir edir”.
Həmsöhbətimiz hesab edir ki, gənclərin protein tərkibli preparatlardan istifadə etməklə əzələ kütləsini şişirdib cüssəli görünməsi də mümkündür. Lakin onların bu istəyi bəzən sağlamlıqlarına mənfi təsir göstərir: "Əzələ kütləsini artıran, fiziki gücü çoxaldan protein növləri oğlanlar arasında daha populyardır, lakin əksər hallarda özbaşına qəbul edilən protein tərkibli preparatlar insan sağlamlığına ziyan vurur. Bu preparatlar qara ciyərdə yağlanma, böyrəkdə daş əmələ gətirir, cinsi zəiflik yaradır. Bu tip proteinləri əsasən peşəkar idmanla məşğul olanlar qəbul edirlər. İdmançılar qəbul etdikləri proteinlərin tərkibinin nədən ibarət olduğunu və zərərli olmamasından xəbərdar olurlar. Ancaq sıradan bir şəxsin bədəni möhkəmləndirmək üçün bu tip həblərdən istifadəsi doğru deyil. Çünki onlar ilk olaraq bu preparatlarla tanış olmurlar. Ən əsası, onların orqanizmi qəfil bu tip həb qəbul edəndə sağlamlıqlarını risq altında qoyurlar”.
Z.Zeynalovanın sözlərinə görə, belə preparatlar ilkin dövrdə orqanizmi gücləndirir, sonra isə çox ciddi fəsadlar ortaya çıxır: “Süni əzələ şişirdən həblər cinsi zəifliyə də səbəb olur”.
Həkim onu da əlavə etdi ki, cüssəli bədənə sahib olmaq istəyənlər süni preparatlar qəbul etməklə deyil, mütəmadi idman etməklə istəklərinə nail ola bilərlər: “Bunun üçün bəylər trenajor zallarına getməlidirlər. Məşqçilər bəylərə hansı idman hərəkətini etməklə istədikləri bədən formasına sahib ola biləcəklərini öyrədəcəklər”.
Günel CƏLİLOVA
