Kamran Əsədov: “DİM-in hazırladığı vəsaitlərdən sual düşəcəyi bilinsə...”
Məlum olduğu kimi, Dövlət İmtahan Mərkəzində (DİM) yeni təhsil proqramları (kurikulumlar) əsasında Azərbaycan dili, rus dili, ədəbiyyat, ingilis dili, riyaziyyat, fizika, kimya, biologiya, tarix və coğrafiya fənləri üzrə yeni tədris vəsaitləri hazırlanır. Hazırda dərs vəsaitlərinin ayrı-ayrı bölmələrinə aid mövzuların müzakirəsi və təhlilinin yekunlaşmaq üzrə olduğu bildirilir.
Qeyd edək ki, Azərbaycanın orta ümumtəhsil sistemində 10 ildən artıqdır ki, kurikulum tətbiq olunur. İndiyə qədər mövud olan bütün dərsliklərin də bu proqram əsasında hazırlandığı bildirilir. Onu da vurğulayaq ki, indiyə qədər əksər mütəxəssislər bu tədris vəsaitlərinin kurikulum tələblərinə cavab vermədiyini, aidiyyəti qurumlar isə əksini deyirdilər. Kurikulum əsasında yeni dərs vəsaitlərinin nəşrə hazırlanması mütəxəssislərin qənaətini təsdiqləyir. Kurikulum əsasında bütün dərsliklərin yenidən nəşr olunmasına ehtiyac varmı?
Təhsil eksperti Kamran Əsədov “Bakı-Xəbər”ə açıqlamasında qeyd etdi ki, 10 ilə yaxındır ki, orta ümumtəhsil məktəblərində bütün tədris prosesi kurikulum standartları əsasında tərtib olunmağa başlayıb: “Təəssüflər olsun ki, geridə qoyduğumuz 10 il ərzində proqram, sadəcə, sənəd üzərində həyata keçirilib. Bu illər üzrə bütün dərsliklər kurikulum standartları adı altında yenidən nəşr olunsa da, əslində, bu standarta uyğun olmayıb. Nəzərə almaq lazımdır ki, bu sistem inkişaf etmiş ölkələrdə tətbiq olunur və müsbət nəticə əldə edilib. Ancaq Azərbaycanda kurikulumla təhsil almağa başlayan şagirdlər 2017-ci ildə buraxılış imtahanı verən zaman məlum oldu ki, onların nəticələri bu günə kim aparılan imtahanlar arasında ən aşağı nəticədir. İmtahanda iştirak edənlərin 70 faizi riyaziyyat və ana dilindən “2” aldı. Həmin şagirdlər test tapşırığına cavab verə bilmədilər. Bu isə o deməkdir ki, kurikulum standartları orta məktəblərdə reallaşmır. Şagirdlər bir yana, hələ müəllimlər tərəfindən bu standart tam olaraq mənimsənilməyib. Dövlət İmtahan Mərkəzi də ali məktəblərə qəbul proqramını həyata keçirən qurum olduğu üçün, qəbul imtahanına cavab verəcək standartda vəsait hazırlamağa məcburdur. Qeyd edim ki, Azərbaycanda alternativ vəsaitlər yoxdur. Dərslikləri isə yalnız Təhsil Nazirliyi hazırlaya bilər. DİM isə qəbul imtahanında iştirak edənlərə vəsait tərtib edə bilər. Bu da gözləniləndir. Çünki orta məktəblərdə tədris olunan bütün mövzular qəbul imtahanında istifadə oluna bilməz. Bu səbəbdən də DİM tərəfindən kurikulum standartlarına uyğun vəsaitlərin tərtib olunması qəbul imtahanlarına hazırlaşanlara əla vasitədir. Onu da vurğulamaq lazımdır ki, qəbul imtahanına yalnız DİM-in hazırladığı vəsaitlərdən sual düşəcəyi bilinsə, o zaman şagirdlər orta məktəb vəsaitlərini oxumayacaqlar”.
Həmsöhbətimizin sözlərinə görə, DİM tərəfindən nəşr olunacaq vəsait Təhsil Nazirliyinin tərtib etdiyi vəsaitlərin içərisindən çıxarılaraq hazırlanmalıdır: “Hər iki qurumun tərtib etdiyi vəsaitlərdə olan informasiyalar ziddiyyət təşkil etməməlidir”.
Günel CƏLİLOVA
