Ceyhun Əliyev: “Vətəndaşlarımız artıq xarici ölkələrdə deyil, bölgələrimizdə istirahət etməyə üstünlük verir, bunun da səbəbi…”
“Xaricə səfər edən Azərbaycan vətəndaşlarının sayı azalmaqdadır”. Bunu mədəniyyət və turizm naziri Əbülfəs Qarayev media nümayəndələrinə açıqlamasında bildirib.
Nazir qeyd edib ki, Azərbaycanda daxili turizmin inkişafı çox önəmli istiqamət kimi qəbul olunmalıdır: “Diqqət cəlb edən məqam ondan ibarətdir ki, kartlarla, bank yolu ilə xaricilərin Azərbaycanda turizm məqsədilə xərclədiyi pul azərbaycanlıların xaricdə xərclədiyi puldan çox olub. Bu da o deməkdir ki, Azərbaycan vətəndaşları ölkəmizdə asudə vaxtının təşkilinə, ölkədaxili turizm məqsədilə səfərlər etməsinə daha çox maraq göstərirlər. Bu tendensiya ölkədə yeni otel şəbəkələrinin formalaşdırılmasına təkan verəcək".
Ekspertlərin fikrincə, xaricə səfər edən Azərbaycan vətəndaşlarının sayının azalması daxili turizmin inkişafından xəbər verir.
Turizm sahəsi üzrə ekspert Ceyhun Əliyev bizimlə söhbətində qeyd etdi ki, turizmin inkişafı istiqamətində görülən işlər artıq öz nəticəsini göstərir. Həm yerli, həm də xarici turistlər Azərbaycan turizminə maraq göstərirlər: “Daxili turizmin inkişafı ölkəyə daha çox pul gətirir. Daxili turizmi daha da inkişaf etdirmək lazımdır. Bunun üçün ilk növbədə qiymət siyasəti düzgün qurulmalı və xidmət yüksək səviyyədə olmalıdır. Belə olarsa, əhali artıq Gürcüstana və digər ölkələrə getməz”.
Həmsöhbətimizin sözlərinə görə,“Turizm haqqında” yeni qanun layihəsi daxili turizmin inkişafına xidmət edir. Qiymət siyasəti hər bir vətəndaşın yay və ya qış aylarında istədiyi zaman özünə uyğun şəkildə turizm obyektlərində istirahət edə bilməsi imkanına uyğun olmalıdır: “Bu səbəbdən Prezident İlham Əliyev beşulduzlu otellərlə yanaşı, iki və üçulduzlu otellərin də tikilməsi və bu şəbəkənin də inkişaf etdirilməsi barədə göstəriş verdi. Bu sahədə də işlər görülür. əvvəlki illərlə müqayisədə Azərbaycanda daxili turizm inkişaf edir və statistik göstəricilər müsbətdir".
C.Əliyev hesab edir ki, daxili turizmin inkişafı dedikdə kənd turizminin inkişafına ciddi fikir verilməlidir: "Hər bir kənddə turizm obyekti tikməyə ehtiyac da yoxdur. Sadəcə, əhaliyə müəyyən treninqlər keçirilməlidir. Ola bilsin, onlara aşağı faizli kreditlər verilsə, evlərinin bir hissəsini turizm obyekti kimi hazırlayaraq turistləri cəlb edə bilərlər. Bu həm də kənd əhalisinin istehsal etdiyi məhsulların satılmasına da müsbət təsir edə bilər. İnsanlar bununla həm də ucuz qiymətə dincəlmək fürsəti əldə etmiş olarlar".
Ekspert onu da vurğuladı ki, yerli vətəndaşlar artıq əvvəlki dövrlərlə müqayisədə istirahət üçün xaricə daha çox üz tutmurlar: “Əvvəllər vətəndaşlar daha çox Türkiyə, Gürcüstan, Avropa ölkələrinə üz tuturdular. Ancaq son zamanlar bu sahədə vəziyyət dəyişir. Vətəndaşlarımız artıq xarici ölkələrdə deyil, bölgələrimizdə istirahət etməyə üstünlük verirlər. Bunun da səbəbi bölgələrdə müasir standartlara cavab verən istirahət mərkəzlərinin istifadəyə verilməsidir”.
Günel CƏLİLOVA
