Kamran Əsədov: “Səbəb də odur ki, yeni test modelləri bütün şəxslər tərəfindən mənimsənilməyib”
Bir neçə gün əvvəl Dövlət İmtahan Mərkəzinin (DİM) Direktorlar Şurasının iclası keçirilib və iclasda monitorinq imtahanları ilə bağlı müzakirə aparılıb.
DİM Direktorlar Şurasının sədri Məleykə Abbaszadə Azərbaycan dili, rus dili, riyaziyyat və ingilis dili fənləri üzrə monitorinq imtahanlarının nəticələrinə dair qısa statistik təhlil təqdim edərək bildirib ki, 2013-cü il ilə müqayisədə 2017-ci ildə Azərbaycan dili və rus dili fənləri üzrə nəticələrdə müsbət dinamika müşahidə olunur, lakin riyaziyyat fənni üzrə müsbət dinamika müşahidə olunmur.
Riyaziyyat fənni üzrə müsbət dinamikanın müşahidə edilməməsi nə ilə bağlıdır?
Tanınmış təhsil eksperti Kamran Əsədov bizimlə söhbətində bildirdi ki, nəticələrin aşağı səviyyədə olması yeni test tapşırığı modellərinin orta məktəblərdə tədris zamanı geniş şəkildə istifadə olunmaması ilə bağlıdır: “İlk növbədə qeyd etmək istəyirəm ki, 2013-cü ildə istər qəbul imtahanlarında, istər sınaq imtahanlarında, istərsə də buraxılış imtahanlarında riyaziyyat fənni üzrə istifadə olunmuş test tapşırıqları ənənəvi formatlı qapalı test tapşırıqlarından ibarət idi. Amma 2017-ci ildə müvafiq mərhələlər üzrə istifadəyə verilən test tapşırıqları IX sinif buraxılış imtahanlarında kurikulum standartlarına uyğun olaraq, digər pillədə isə açıq test tapşırığı modelləri əsasında həyata keçirilib.
İmtahan iştirakçılarının qapalı test tapşırığı ilə müqayisədə kurikulumla tərtib olunmuş test tapşırığına cavab verməsi və ya açıq test tapşırığına cavab verməsi eyniləşdirilə bilməz. Yeni test tapşırıqlarının cavablandırılması aşağı səviyyədədir. Səbəb də odur ki, yeni test modelləri bütün şəxslər tərəfindən mənimsənilməyib.
Məhz nəticələrinin aşağı səviyyədə olması səbəbi yeni test tapşırığı modellərinin geniş şəkildə istifadə olunmaması, orta məktəblərdə tədris zamanı istifadə olunmamasıdır”.
“Kamran müəllim, yəni yeni test tapşırıqları modeli tətbiq olunarsa, bu sahədəki mövcud problem aradan qaldırıla bilər?” - deyə ekspertdən soruşduq. O, sualımıza cavab olaraq bildirdi ki, yeni test tapşırığı modelləri orta məktəblərdə ilk növbədə istifadə olunmalıdır: “İmtahanda iştirak edən şagird hansı formada və modeldə test tapşırığı ilə imtahan verəcəyini bilməlidir. Azərbaycan təhsili 2008-ci ildən kurikulum standartlarına keçib, amma bizim böyük qisim müəllim dərsi ənənəvi formada keçir, KSQ, BSQ və digər qiymətləndirməni köhnə formatda tərtib edir.
Yenilik ilkin olaraq müəllimlərə öyrədilməlidir ki, onlar da şagirdlərə tədrisi bu səpkidə həyata keçirsinlər”.
İradə SARIYEVA
