Emin Məmmədov: “Məqsədimiz odur ki, “Naxçıvan məhsulları”nı respublikanın qida bazarında brendə çevirək” Ziyafəddin Məmmədov: “Bu gün bizi Bakı bazarında olan istehlakçılar bu bazara çağırıb” Əfqan İsmayılov: “İnanıram ki, yeni alıcılarımız da məhsullarımızdan istifadə etdikdən sonra onlara yüksək qiymət verəcəklər”
Əsrarəngiz Naxçıvan təbiəti insan oğluna bütün ömrünə yetə biləcək min bir nemət bəxş edib desək yanılmarıq. Vətənin dilbər guşələrindən olan Naxçıvanın rəngarəng iqlimi, bənzərsiz coğrafiyası, özünəməxsus landşaftı var. Zəngin flora və faunaya malik olan bu diyar ekoloji cəhətdən təmiz məhsulların yetişdirildiyi bir məkan kimi tanınır. Naxçıvanın torpağından, havasından, suyundan rişələnən hər bir nemət süfrələrimizin bəzəyinə çevrilir.
Sirr deyil ki, bu gün Naxçıvanda istehsal olunan məhsullar istehlakçıların ən çox tələbat hiss etdiyi məhsullar sırasında ön yerləri tutur. Bu gün həm Naxçıvanda fəaliyyət göstərən şirkətlərin istehsal etdiyi məhsullar, həm də fərdi təsərrüfatlarda yetişdirilən nemətlər istehlakçıları özünə cəlb edir.
Son zamanlar paytaxtın ayrı-ayrı yerlərində, pərakəndə və topdansatış mərkəzlərində, mağazalarında “Naxçıvan məhsulları” adı altında çeşidli məhsullar təqdim edilir. Hətta bəzən elə hallar olur ki, bu məhsullara alıcı cəlb etmək məqsədilə “Naxçıvan məhsulları” adından istifadə edilir. Təbii ki, bəzi işbazların əl atdığı bu üsul əsl “Naxçıvan məhsulları”nın bazara daxil olması nəticəsində iflasa uğrayır. Artıq paytaxtımızda “Naxçıvan məhsulları” mağazalarının açılması prosesinə başlanıb. Aprelin 3-də Bakının Nərimanov rayonunda “MM” (Müasir Məkan) Ət və Ət Məhsulları İstehsalı Müəssisəsi və “Savalan S” MMC-nin “Naxçıvan məhsulları” mağazasının açılışı olub. Rayonun Mirzəbala Məmmədzadə 10 ünvanında yerləşən “Naxçıvan məhsulları” mağazasının açılış mərasiminə “Bakı-Xəbər” olaraq biz də dəvət almışdıq. Paytaxtın böyük rayonlarından birində “Naxçıvan məhsulları” mağazasının açılması həqiqətən də alıcıların, istehlakçıların marağını tam təmin edir.
Kiçik, lakin səliqəli, Naxçıvanın çeşidli məhsulları ilə zəngin olan “Naxçıvan məhsulları” mağazasının vitrinlərini bəzəyən Naxçıvanda istehsal olunan məhsulların tez bir zamanda süfrələrimizə bəzək olacağına qətiyyən şübhə etmirik.
“Naxçıvan məhsulları” mağazasının Bakı üzrə nümayəndəsi Emin Məmmədov bizimlə söhbətində bildirdi ki, “MM” (Müasir Məkan) Ət və Ət Məhsulları İstehsalı Müəssisəsi və “Savalan S” MMC-nin birgə açdığı bu mağazada istehlakçılara 112 çeşiddə məhsul təqdim edilir: “Biz 2017-ci ilin avqust ayında Bakının Nizami rayonunda, 8-ci kilometrdə “Naxçıvan məhsulları” adlı birinci dükanımızı açmışıq. Bu gün isə Nərimanov rayonunda ikinci dükanımızı açdıq. Deyim ki, Bakıda “Naxçıvan məhsulları” mağazasının açılması zəruri idi. Çünki istehlakçıların bizim məhsullara tələbatı böyükdür. Bu gün Bakı sakinlərinin, demək olar ki, böyük əksəriyyəti Naxçıvanda istehsal olunan məhsulları əldə etmək istəyir. Bu ondan irəli gəlir ki, insanlar ekoloji cəhətdən təmiz olan məhsullarla qidalanmaq istəyirlər. Bu da tam təbiidir. Məlumdur ki, hər bir insan üçün qida rasionu, sağlam qidalanma amili çox vacibdir. Naxçıvanda da üst keyfiyyətli məhsullar istehsal edilir. “Naxçıvan məhsulları” yeganə dükanlardır ki, bura başqa bölgələrdə istehsal olunan məhsullar daxil olmur, burada ancaq Naxçıvana aid məhsullar satılır. Bakıda çoxlu mağazalar var ki, üzərinə “Naxçıvan məhsulları satılır” sözləri yazılır. Ancaq satdığı məhsulun Naxçıvanla heç bir əlaqəsi olmur. Təəssüf ki, bəzən işbazlar bu üsula da əl atırlar. Bunu ona görə edirlər ki, məhsullarını sata bilsinlər. Bu gün insanlarda belə fikir formalaşıb ki, əgər bu məhsulun üzərinə “Naxçıvan məhsulu” yazılıbsa, o ekoloji cəhətdən təmizdir, keyfiyyətlidir. Bəli, Naxçıvan məhsulları həqiqətən də keyfiyyətli və ekoloji cəhətdən təmizdir. Bizim hər iki mağazamızda, sözün əsl mənasında, təmiz və keyfiyyətli məhsullar təklif edilir. Burada həm Şahbuz, həm Şərur, həm də digər rayonlarda istehsal olunan məhsullar satılır. Naxçıvanda istehsal edilən bütün məhsulları burada tapmaq mümkündür. Məqsədimiz odur ki, “Naxçıvan məhsulları”nı respublikanın qida bazarında brendə çevirək. Bizim mağazada əsasən Naxçıvanın iki böyük şirkətinin - “Savalan S” MMC-nin və “MM” (Müasir Məkan) Ət və Ət Məhsulları İstehsalı Müəssisəsinin istehsal etdiyi məhsullar satılır. Onlarla yanaşı, Naxçıvanın digər şirkətlərinin də istehsal etdiyi məhsulları istehlakçılara təqdim edirik”.
“MM” (Müasir Məkan) Ət və Ət Məhsulları İstehsalı Müəssisəsinin rəhbəri Ziyafəddin Məmmədov da bizimlə söhbətində bildirdi ki, “Naxçıvan məhsulları” mağazasında alıcılara təklif edilən məhsullar sırf Naxçıvana məxsusdur. “Hələlik mağazamız kiçikdir, lakin gələcəkdə genişləndirmək fikrindəyik. Biz Bakının digər rayonlarında da “Naxçıvan məhsulları” mağazası açmaq niyyətindəyik. Sağlıq olsun, yeni mağazalarımız da açılacaq. Hazırda iki müəssisə birləşib bu mağazanı açıb, bəlkə gələcəkdə də bizə qoşulanlar olar” - deyə Z.Məmmədov bildirdi.
Azərbaycanın digər şəhərlərində də “Naxçıvan məhsulları” mağazalarının açılacağını deyən Z.Məmmədovun sözlərinə görə, bu şəhərlərdən biri Gəncədir.
“Savalan S” MMC-nin rəhbəri Əfqan İsmayılovla da həmsöhbət olduq. Ə.İsmayılov bildirdi ki, ekoloji cəhətdən təmiz və keyfiyyətli olan məhsula hər zaman ehtiyac olduğu üçün, “Naxçıvan məhsulları”nın tez bir zamanda istehlakçılar tərəfindən rəğbətlə qarşılanacağına böyük ümid bəsləyir: “Bakıda ikinci mağazamızı açdıq. Gələcəkdə Bakının başqa rayonlarında da “Naxçıvan məhsulları” mağazalarını açacağıq. Müəssisələrimizin istehsal etdiyi məhsullar ekoloji cəhətdən təmiz, keyfiyyətli məhsullardır. Bunu alıcılar da təsdiq edirlər. Biz məhsulları təbiətdən evlərimizə, süfrələrimizə gətiririk. İnanıram ki, yeni alıcılarımız da məhsullarımızdan istifadə etdikdən sonra onlara yüksək qiymət verəcəklər. Burada bizim müəssisələrin istehsal etdiyi məhsullardan başqa digər müəssisələrin də məhsulları var. Hətta alıcılara fərdi təsərrüfatlara aid məhsullar da təklif edirik. Biz nəzərdə tutmuşuq ki, mağazamızda ancaq Naxçıvana aid məhsulların satışı həyata keçirilsin. Biz artıq bazara daxil olmuşuq”.
Söhbətə Ziyafəddin Məmmədov da qoşulur: “Biz mağazalarımızı açmamışdan əvvəl bazara daxil olmuşuq. Çünki mağazalarımızı açmamışdan əvvəl müxtəlif supermarketlərlə, ticarət obyektləri ilə bağladığımız müqavilə əsasında məhsullarımız Bakıda satılıb. Bu gün də müxtəlif mağazalarda məhsullarımız var. Bizim məhsullara tələbat olduğu üçün, birinci mağazanı açdıq. Mağazamız özünü doğruldandan sonra ikinci mağazanı açdıq. Bu gün bazarda rəqabət var, biz rəqabəti təqdim etdiyimiz məhsulların keyfiyyəti ilə aparırıq, başqa heç nə ilə. Bura öz məhsullarımızı gətirmişik və o məhsulların da keyfiyyətinə zəmanət veririk. İnanıram ki, mövcud bazarda məhsullarımız öz yerini tutacaq. Bayaq qeyd etdiyim kimi, bizim məhsullar digər mağazalarda satılır. Özümüz bura ona görə gəlmişik ki, “Naxçıvan məhsulları”nı bir brend kimi tanıdaq. İstəyirik ki, insanlarda bizim müəssisələrin istehsal etdiyi məhsullara inam formalaşsın. Bu gün bizi Bakı bazarında olan istehlakçılar bu bazara çağırıb. “MM” (Müasir Məkan) Ət və Ət Məhsulları 24, “Savalan S” MMC isə 30 çeşiddə məhsul təqdim edir. “Savalan S” MMC su istehsalı ilə məşğuldur. Bu şirkətə məxsus olan “Qızıl su” limonad məhsulları bir neçə qablaşdırma formasında təqdim edilir. Böyrək xəstəliyi üçün olduqca faydalı olan “Böyrək suyu” təbii mineral suyu da mağazamızda var”.
Naxçıvanda sahibkarlığın inkişafına güclü dövlət dəstəyi verildiyini deyən Z.Məmmədovun sözlərinə görə, bu da MR-də yeni istehsal müəssisələrinin yaranmasına, iş yerlərinin açılmasına böyük təkan verib. Naxçıvanda ABAD-ın fəaliyyətindən danışan Z.Məmmədov vurğuladı ki, ailə təsərrütaflarının yaranması Azərbaycan bazarına daha bol çeşidli, keyfiyyətli məhsulların daxil olmasına şərait yaradıb: “Artıq özünüməşğulluq sahəsində böyük irəliləyişlər var. Bu da bazarda çeşidli məhsulların bol olmasına səbəb olur. “MM” (Müasir Məkan) Ət və Ət Məhsulları İstehsalı Müəssisəsi 2004-cü ildə yaradılıb. 2011-ci ildə isə dövlət dəstəyi sayəsində öz işini yenidən qurub. Dövlət tərəfindən müəssisəmizin fəaliyyətinin inkişaf etdirilməsi üçün bir dəfə 260 min, ikinci dəfə isə 190 min manat vəsait ayrılıb. Müəssisəmiz 25 nəfər işçini işlə təmin edib. “Savalan S” MMC-də isə 30-dan artıq işçi çalışr. Bakıda isə 6-7 nəfəri mağazamızda işlə təmin etmişik”.
“Naxçıvan məhsulları” mağazasında çeşidli məhsullarla tanış olarkən Naxçıvan təbiətinə bir daha “əhsən” demək istəyirsən. Mağazada satılan ət və ət məhsullarının çeşidlərinə nəzər saldıqda burada yüksək standartlara cavab verən məhsulların olduğunun şahidi olduq. Vitrinin üzərindəki tabaqda qoyulan dairəvi kiçik çörəklər diqqətimizi cəlb etdi. Çörəklə maraqlandığımızı görən Əfqan müəllim dedi ki, bu çörəyin adına Naxçıvanda dəstana deyilir və sırf Naxçıvana aiddir, təndirdə bişir. Qarabağlar kəndinin təbiətinə məxsus olan kəklikotu da xüsusi qablaşdırmada istehlakçılara təqdim edilir. Burada qoyun və keçi pendirləri, Naxçıvan xaması, ayran, kərə yağı, şəxsi təsərrüfatlardan gətirilən kənd yumurtası, bal, bəhməz, toyuq məhsulları, ət qiyməsi, “MM” (Müasir Məkan) Ət və Ət Məhsulları İstehsalı Müəssisəsinin istehsal etdiyi “Pak sosiska”, “Naxçıvan sosiskası”, “Təndir sosiskası”, “Ovçu sosiskaları”, “Doğma tam sordelka sosiskası”, “Doğma tam kolbasa”, “Doktorskaya kolbasa”, “Əla növ sosiska iveriya”, “Həvəskar kolbasa”, “Közləmə sosiska” növləri istehlakçıların ağız dadına tam uyğundur. Mağazada təqdim edilən “Naxçıvan kolbasası” həm dadına, həm də hazırlanma texnologiyasına görə sırf Naxçıvana aiddir. Ziyafəddin müəllim dedi ki, bu kolbasa köçəri həyat tərzi keçirən ulu babalarımızın vaxtilə hazırladığı ənənəvi üsulla hazırlanıb. Onun sözlərinə görə, bu kolbasanın bənzəri dünyada yoxdur, bu ancaq Naxçıvana aiddir. Bu kolbasanın hazırlanmasında istifadə edilən bütün məhsullar doğma diyarın nemətləridir. Çox az adam tapılar ki, milli mətbəximizdə xüsusi yer tutan qovurmanı sevməsin. Köçəri həyat tərzi keçirən, yayı yaylaqda, qışı qışlaqda keçirən babalarımızdan miras qalan qovurma bu gün Naxçıvan mətbəxində əsas yer tutur. Bizə bildirdilər ki, xüsusi qablaşdırmada təqdim edilən qovurma hansısa bir texniki cihazda qovrulmayıb, ənənəvi üsulla teştlərdə qovrulub və pasterilizə edilərək qablaşdırılıb. “Naxçıvan məhsulları” mağazasında çaşır turşusu, eləcə də Ordubad gülabı alıcıların marağını cəlb edə bilər. Burada diqqətimizi Naxçıvan duzu da cəlb etdi. Mağazadan dedilər ki, bu duz tam yodlaşdırılmış keyfiyyətli duzdur.
Onu da vurğulayaq ki, mağaza vitrinlərində gördüyümüz “Böyrək suyu” “Savalan S” MMC tərəfindən istehsal edilir. Böyrək daşlarının qənimi olan bu su təbii mineral sudur. Müəssisə rəhbəri Əfqan İsmayılov dedi ki, “Böyrək suyu”nun həm Şahbuz, həm də Babək rayonunda istehsal müəssisəsi var. Babək rayonunun Sirab kəndində istehsal edilən suyun ana axarının “Kəlbəağıl”da olduğunu deyən Əfqan müəllim, “Böyrək suyu”nu xəstələr üçün şəfa mənbəyi kimi təqdim etdi.
Nərimanov rayonu Mirzəbala Məmmədzadə küçəsi 10-da açılan “Naxçıvan məhsulları” mağazasında istehlakçılara təqdim edilən məhsulların keyfiyyəti haqqında ən obyektiv sözü təbii ki, istehlakçı deyə bilər. Odur ki, dəyərli müştərilər, “Naxçıvan məhsulları” mağazası sizin yolunuzu gözləyir. İnanırıq ki, buradan aldığınız məhsullar sizin qida rasionunuzun ayrılmaz tərkib hissəsinə çevriləcək.
İradə SARIYEVA
