Daxili İşlər Nazirliyi Sumqayıtda 24 saylı orta məktəbin qarşısında uşaq oğurluğu ilə bağlı sosial şəbəkədə yayılan videogörüntüyə münasibət bildirib.
Nazirliyin Mətbuat Xidmətinin rəis müavini, polis polkovniki Orxan Mansurzadə Trend-ə açıqlamasında yayılan məlumatın tam əsassız olduğunu bildirib: "Bu cür məlumatlar əhali arasında panika yaymaq məqsədi güdür. Nəinki Sumqayıtda, respublikanın heç bir bölgəsində orta məktəblərdə, heç bir yerdə adam oğurluğu qeydə alınmayıb. Görüntülərin ictimailəşməsindən sonra videonun çəkildiyi ehtimal edilən həmin orta məktəbin direktoru Sumqayıt Polis İdarəsinə dəvət olunub. Direktor izahatında bildirib ki, rəhbərlik etdiyi məktəbdə belə bir hal olmayıb, yayılan məlumatlar şayiədir. Vətəndaşlar bu cür təxribatlara uymamalıdır. Vətəndaşlar qarşılaşdıqları qanun pozuntusu, kriminal hadisə barədə Daxili İşlər Nazirliyinin “102 Zəng Mərkəzi” Xidmətinə, eləcə də aidiyyatı üzrə polis orqanlarına məlumat versinlər”.
Hadisə ilə bağlı adı hallanan Sumqayıt şəhər 24 saylı orta məktəbin rəhbərliyindən Trend-ə bildirilib ki, məktəb ərazisi hasarlıdır və bu ərazidə uşaqların oğurlanması halları baş verməyib və ərazidə heç bir şübhəli şəxs görülməyib: “Bu videonu hamıya telefonla göndərirlər. Bizə də deyiblər ki, həmin şəxs guya yaxınlıqdakı uşaq bağçasının ətrafında və yeni salınan yaşayış massivində videoya düşüb”.
Adının hallanmasını istəməyən yaxınlıqdakı özəl bağçadan isə Trend-ə bildirilib ki, onların binaları hər tərəfdən videomüşahidələr aparır: “İndiyədək videoya belə şübhəli şəxs düşməyib. Əgər belə bir şəxs olsaydı, ilk növbədə biz hadisənin araşdırılması üçün hüquq-mühafizə orqanlarına müraciət edərdik. Bu video Sumqayıtda demək olar ki, əksər valideynlərin telefonuna göndərilib".
Xatırladaq ki, sosial şəbəkələrdə Sumqayıt şəhər 24 saylı orta məktəbin qarşısında bir nəfərin uşaqları oğurlaması barədə səs yazıları və videokadrlar yayılıb.
Təhsil Nazirliyi məsələ ilə bağlı araşdırmalara başlayıb.
