Ceyhun Əliyev: “Bölgələrdə müasir standartlara cavab verən yeni istirahət mərkəzlərinin açılması xarici turistlərin sayına təsir göstərir”
Müasir dünyada turizm hər bir ölkə üçün iqtisadiyyatın dinamik inkişaf edən sahələrindən biri sayılır. Ölkəmizdə bu sahənin inkişafına maraq ildən-ilə artmaqdadır. Son illər Azərbaycanın sosial-iqtisadi inkişafı və beynəlxalq əlaqələrinin genişlənməsi istiqamətində görülən işlər xarici ölkə vətəndaşlarında ölkəmizə marağın artmasına səbəb olub. Burada son illər Azərbaycanda intensiv şəkildə keçirilən beynəlxalq forum və tədbirlərin, eləcə də böyük idman yarışlarının da rolunu xüsusi vurğulamaq vacibdir.
Cari ilin yanvar-fevral ayları ərzində Azərbaycana dünyanın 139 ölkəsindən 352,5 min və ya ötən ilin müvafiq dövrü ilə müqayisədə 12,1% çox əcnəbi və vətəndaşlığı olmayan şəxs gəlib.
Dövlət Statistika Komitəsinin yaydığı məlumata əsasən, ölkəyə gələnlərin 29,3%-i Rusiya, 24,9%-i Gürcüstan, 13,8%-i Türkiyə, 8,0%-i İran, 3,7%-i Birləşmiş Ərəb Əmirlikləri, 2,1%-i Ukrayna, 2,0%-i İraq, 16,1%-i digər ölkələrin vətəndaşları, 0,1%-i isə vətəndaşlığı olmayan şəxslər olub. Gələnlərin 71%-ini kişilər, 29%-ini isə qadınlar təşkil edib. Əcnəbi və vətəndaşlığı olmayan şəxslərin 52,8%-i yanvar, 47,2%-i fevral ayında ölkəyə gəlib.
İran istisna olunmaqla, Körfəz ölkələrindən gələnlərin sayında daha çox artım müşahidə edilib. Ötən ilin yanvar-fevral ayları ilə müqayisədə ölkəmizə gələn Küveyt vətəndaşlarının sayı 6 dəfə, Qətər vətəndaşlarının sayı 2,6 dəfə, Bəhreyn vətəndaşlarının sayı 2,5 dəfə, Səudiyyə Ərəbistanı vətəndaşlarının sayı 2,5 dəfə, Oman vətəndaşlarının sayı 1,8 dəfə, İraq vətəndaşlarının sayı 1,7 dəfə, Birləşmiş Ərəb Əmirlikləri vətəndaşlarının sayı 1,3 dəfə artıb. İrandan gələnlərin sayında 26,7% azalma müşahidə edilib.
Qeyd edək ki, bu ilin yanvar-fevral aylarında Avropa İttifaqına üzv ölkələrdən gələnlərin sayı ötən ilin yanvar-fevral aylarında gələnlərin sayına bərabər olmaqla 11,3 min nəfər, MDB ölkələrindən gələnlərin sayı 4,6% artaraq 123 min nəfər olub.
Bu dövrdə ölkəmizə gələn əcnəbilər və vətəndaşlığı olmayan şəxslərin 62,8%-i dəmir yolu və avtomobil, 36,3%-i hava, 0,9%-i su nəqliyyatından istifadə ediblər.
Azərbaycana gələn turistlərin sayının artması barədə danışan turizm sahəsi üzrə ekspert Ceyhun Əliyev bizimlə söhbətində qeyd etdi ki, istirahət üçün Azərbaycanı seçən xarici ölkə vətəndaşlarının sayı gündən-günə artır: “Statistikaya nəzər salsaq görərik ki, hazırda Azərbaycana ən çox Rusiyadan, İrandan axın var. Həmçinin, son illər ərəb ölkələrindən turist axını müşahidə olunmaqdadır. Ərəblərin Azərbaycana gəlməsi müsbət amillərdən biridir, çünki bu ölkələr güclü iqtisadiyyata malikdir. Ərəb turistlər Azərbaycana gəldikdə istirahət edərək pul xərcləyirlər və bu vəsait Azərbaycan büdcəsinə daxil olur”.
Həmsöhbətimizin sözlərinə görə, cari ilin iki ayı ərzində ölkəyə gələn turistlərin sayının artması səbəblərindən biri də qış turizminin inkişaf etməsidir: “Danılmaz faktdır ki, Azərbaycanda qış turizmi də Şahdağ, Qəbələ və Qusar regionlarında çox gözəl şəkildə inkişaf etdirilir. Bununla yanaşı, biz yay turizminin inkişafına diqqət yetirməliyik. Həmin regionlarda yay turizmi üçün də işlər görmək lazımdır ki, qış aylarından çıxdıqdan sonra gözləmə mövqeyində qalmasınlar. Qışda Quba və Qusarda olan istirahət mərkəzlərimizi hansısa formada yay turizminə də hazırlamalıyıq ki, yayda da ora Azərbaycan vətəndaşları və xarici vətəndaşlar cəlb olunsunlar”.
Həmsöhbətimizin sözlərinə görə, bölgələrdə müasir səviyyədə otellər tikilib. Xüsusilə bölgələrdə bir neçə beşulduzlu otel istifadəyə verilməsi yerli vətəndaşlarla yanaşı, əcnəbilərin də marağına səbəb olub: “Bölgələrdə yeni turizm mərkəzləri açılır. Görülən işlər nəticəsində ölkəmizə gələn xarici turistlərin sayı ilbəil artmaqda davam edir”.
Günel CƏLİLOVA
