Bahadur Bilalov: “Astara-Rəşt dəmir yolunun tikintisi sayəsində İrandan Azərbaycana turist axını baş verəcək”
Son illər qonşu ölkə İrandan Azərbaycana gələn turistlərin sayı artır. İrandan ölkəmizə gələn turistlərin sayının artması faktını Prezident İlham Əliyev də təsdiqləyib.
Prezident İlham Əliyev iranlı həmkarı Həsən Ruhani ilə mətbuata birgə bəyanatı zamanı qeyd edib ki, hər il Azərbaycandan da 100 minlərlə insan İrana səfər edir: “İrandan Azərbaycana gələn turistlərin sayı artır. Əgər 2016-cı ildə 240 min İran vətəndaşı gəlmişdisə, keçən il bu rəqəm 360 minə çatıb. İki həftə bundan əvvəl Azərbaycanda qəbul edilmiş qərara əsasən, İran vətəndaşları Azərbaycanda vizaları aeroportlarda alacaqlar. Artıq bu proses başlanıb, yəni sadələşdirilmiş viza rejimi həm bizim dostluğumuzu əks etdirir, eyni zamanda, turistlərin axınını şərtləndirir. Hər il Azərbaycandan 100 minlərlə insan İrana səfər edir və şadam ki, son müddət ərzində İrandan Azərbaycana da gələn turistlərin sayı artır. Yəni burada əlbəttə ki, bir çox amillər rol oynayır. İlk növbədə, İran-Azərbaycan dostluq, qardaşlıq münasibətləri, bizim çox güclü tarixi əlaqələrimiz, siyasi əlaqələrimiz və bu gün biz dünyada çox müsbət qonşuluq nümunəsi göstəririk. Bu amillər rol oynayır, eyni zamanda, sərbəst gediş-gəliş rejimi turistlərin axınını şərtləndirir”.
Ekspertlərin fikrincə, qarşıdakı illərdə İrandan Azərbaycana gələcək turistlərin sayı daha da artacaq.
Turizm sahəsi ezrə ekspert Bahadur Bilalov “Bakı-Xəbər”ə açıqlamasında qeyd etdi ki, yaxın müddət ərzində İrandan Azərbaycana gələcək turistlərin sayında artım müşahidə olunacaq: “Astara-Rəşt dəmir yolunun tikintisi sayəsində İrandan Azərbaycana turist axını baş verəcək. Astara-Rəşt dəmir yolu yeni bir nəqliyyat qovşağı olacaq. Qeyd olunan dəmir yolu vasitəsilə iranlı turistlər sərbəst şəkildə Azərbaycana gələ biləcəklər. Xatırladım ki, Sovet dönəmində Moskva-Tehran qatarı var idi. Həmin qatar Azərbaycandan keçirdi. İranlı turistlər nəinki avtobus, təyyarə ilə, eyni zamanda dəmir yolu ilə ölkəmizə gələ biləcəklər”.
Həmsöhbətimizin sözlərinə görə, Novruz bayramı ərəfəsində iranlı turistlərə beynəlxalq hava limanında viza ala bilmələri üçün icazə verildi: “Hesab edirəm ki, iranlı turistlərə viza verilməsi prosedurunun bütün sərhəd- keçid məntəqələrində rəsmiləşdirilməsi təmin olunarsa, ölkəyə gələcək iranlı turistlərin sayı daha kəskin artacaq”
Günel CƏLİLOVA
