Fatimə Hacıbəyli: “Əsasən həyat yoldaşından boşanan, ailə həyatı qurmayan qadınlar bu risq qrupuna daxildirlər, həmçinin, yüngül həyat tərzi keçirənlər də spirtli içki qəbul edirlər”
Son vaxtlar restoranlarda əlində qədəh spirtli içki qəbul edən, küçədə belə alkoqol qoxuyan qadınlara rast gəlinir. Qadınların spirtli içkilərdən istifadəsi isə, zamandan asılı olmayaraq, cəmiyyətdə heç vaxt birmənalı qarşılanmır. Bəlkə də illər öncə hansısa qadının sükan arxasında sərxoş vəziyyətdə saxlandığını eşidəndə təəccübdən "gözlərimiz kəlləmizə çıxırdısa", artıq "sərxoş qadın sürücülər" ifadəsi də adi qəbul olunur. Sərxoş sürücü qadınların sayının artmasını açıqlanan statistik rəqəmlər də təsdiqləyir.
Açıqlanan statistik rəqəmlərə əsasən, 2017-ci il üzrə ölkədəki 21.364 alkoqolikin 834 nəfəri qadındır. Bu rəqəm 2015-ci ildə 859, 2014-cü ildə isə 901, 2013-cü ildə 891, 2012-ci ildə 873 olub. Ötən il yeni qeydiyyata alınan 618 alkoqolikin 8-i (2015-ci ildə 10-u, 2014-cü ildə 10-u) qadın olub. Məlumat üçün bildirək ki, qadın alkoqoliklər arasında 30-39 yaşlılar üstünlük təşkil edir.
30-39 yaş arasında qadınların nə səbəbdən alkoqola meyl etməsini öyrənmək məqsədilə “Vəfa” Sosial İctimai Birliyinin rəhbəri Fatimə Hacıbəyliyə müraciət etdik. O, “Bakı-Xəbər”ə açıqlamasında qeyd etdi ki, təəssüf ki, cəmiyyətimizdə, yaşından asılı olmayaraq, spirtli içki qəbul edən xanımların sayı artır: “Bu hal istənilən yaş dövründə olan qadınlarda özünü göstərir. Acınacaqlı hal Azərbaycanda spirtli içki qəbul edən qadınların arasında gənc qızların olmasıdır. Gənc qızlar gələcəyin anasıdır. Onlar yalnız sağlam ana kimi cəmiyyətə sağlam vətəndaş verə bilərlər. Amma təəssüf ki, gənc qızların çoxu Avropaya inteqrasiyanın mənfi tərəfini mənimsəyiblər. Gecə klublarında spirtli içki qəbul edənlərin çoxu elə gənc qızlardır. Onlar özləri də fərqinə varmadan gələcəklərini korlayırlar”.
Həmsöhbətimiz onu da vurğuladı ki, 30-39 yaş arasında qadınların spirtli içki qəbul etməsinin səbəbi müxtəlifdir: “Bəziləri bildirirlər ki, onların alkoqola meyl etməsinin səbəbi sosial sıxıntılarla bağlıdır. Əsasən həyat yoldaşından boşanan, yenidən ailə həyatı qurmayan qadınlar bu risq qrupunda daxildirlər. Bundan əlavə, yüngül həyat tərzi keçirənlər də spirtli içki qəbul edirlər”.
F.Hacıbəylinin sözlərinə görə, qadınların spirtli içki və nikotindən istifadə etməsi onların görkəminə və səhhətinə mənfi və digər tərəfdən psixoloji təsir göstərir: “Bu aludəlik zamanla qadında davranış və şəxsiyyət problemi yaradır. Nəticədə ailəlidirsə, ailə münasibətlərində problemlər, subaydırsa, zaman keçdikcə, ailə məsuliyyətindən qaçmaq kimi problemlə üz-üzə qalırlar. Ona görə də bu məsələ ilə bağlı müəyyən maarifləndirmə işləri aparılmalıdır. Onu da qeyd edim ki, alkoqollu içkilər qadın orqanizminə daha tez təsir edərək sıradan çıxarır”.
Günel CƏLİLOVA
