Çingiz İsmayılov: “Asiya ölkələrindən gələn turistlərin sayını daha da artırmaq üçün turizm təşkilatlarının üzərinə böyük iş düşür”
Turizmin inkişafı istiqamətində görülən işlər artıq öz bəhrəsini verir. Şəhərin istənilən ərazisində istirahət üçün ölkəmizi seçən turistlə rastlaşmaq mümkündür. Ölkəmizə gələn turistlərin sayı ildən-ilə artır. Bu artım hər ay özünü böyük fərqlə göstərir.
Açıqlanan statistik rəqəmlərə əsasən, Azərbaycana Hindistan, Pakistan və Çindən gələn turistlərin sayı çoxalıb. Azərbaycan Turizm Assosiasiyasının (AzTA) sədri Nahid Bağırov media nümayəndələrinə açıqlamasında qeyd edib ki, həmin ölkələrdən turist axını müşahidə olunmaqdadır: “Hindistanla birbaşa uçuşlarımız olmasa da, bu ölkədən Azərbaycana gələn turistlərin sayı artır. Artıq paytaxt küçələrində də hindistanlı turistləri daha çox görürük".
Mədəniyyət və Turizm Nazirliyinin yaydığı məlumatda qeyd olunur ki, bu ilin yanvar-fevral aylarında Azərbaycana Hindistandan 3434, Pakistandan 3136, Çindən 1237 nəfər gəlib. 2017-ci ildə Azərbaycana Pakistandan 17 558, 2016-cı ildə 3998, 2015-ci ildə 2193, 2014-cü ildə 1817 nəfər turist gəlib. 2017-ci ildə Hindistandan Azərbaycana 14 173, 2016-ci ildə 6012, 2015-cı ildə 5584, 2014-cü ildə 4853 nəfər turist səyahət edib. 2017-ci ildə Çindən ölkəmizə 10 258, 2016-cı ildə 7363, 2015-ci ildə 5094, 2014-cü ildə 5930 nəfər əcnəbi gəlib.
Turizm sahəsi üzrə ekspert Çingiz İsmayılov qəzetimizə açıqlamasında qeyd etdi ki, ölkəmizə gələn turistlərin sayının artması təbii ki, xoşdur. Amma bu hələ gözlənilən və istənilən səviyyədə deyil: “Pakistan, Çin və Hindistandan gələn turistlərin sayının artması gözləniləndir. Qeyd olunan ölkələrdən gələn turistlərin sayının artması səbəblərindən biri Avropa ölkələrində miqrantlara qarşı münasibətin kəskinləşməsidir. Avropa ölkələrində Pakistan, Çin, Hindistan və digər ölkələrdən gələn turistləri o dərəcədə də sevmirlər. Avropada Asiya ölkələrindən olan turistlərə münasibətin dəyişməsi nəticəsində onlar istirahət üçün yeni yer axtarırlar. Belə məqamda Azərbaycanın turizm məkanı kimi cəlbedici olması Asiya ölkələrindən olan turistlərin marağına səbəb olur. Beləliklə, adıçəkilən ölkələrin vətəndaşları istirahət üçün Azərbaycanı seçirlər”.
Həmsöhbətimiz onu da bildirdi ki, Asiya ölkələrindən gələn turistlərin sayını daha da artırmaq lazımdır: “Bunun üçün əsas iş bizim üzərimizə düşür. Turizm təşkilatları turist sayını artırmaq üçün işləməlidirlər. Həmçinin, Azərbaycanda fəaliyyət göstərən xarici təşkilatlar Azərbaycanı gözəl təbliğ etməklə əcnəbilərin ölkəmizə axınını gücləndirə bilərlər”.
Günel CƏLİLOVA
