Azərbaycan Respublikası Vəkillər Kollegiyasının 3 saylı Hüquq Məsləhətxanasının kollektivi Prezidenti İlham Əliyevə müraciət ünvanlayıb.
Məsləhətxanadan “Bakı-Xəbər”ə verilən məlumata görə, müraciətdə deyilir:
“Ölkəmizdə geniş vüsət almış çoxşaxəli pozitiv dəyişikliklər xalqımız tərəfindən rəğbətlə qarşılandığı kimi, dünyanın mütərəqqi kəsiminin də diqqət və təqdirini qazanmışdır. Yüksək iqtisadi inkişafa hesablanmış islahatlar toplusu dövlətimizin sosial-iqtisadi gücünü təmin etməklə ölkəmizin siyasi sabitliyinin də etibarlı təminat vasitəsidir.
Hüquqi dövlət quruculuğunun aktual mövzusu olan insan və vətəndaş hüquqlarının ən yüksək səviyyədə təmin olunması, bununla bağlı müdafiə institutlarının inkişaf etdirilməsi, məhkəmə hüquq sisteminin təkmilləşdirilməsi, eyni zamanda bu sahədə mövcud olan neqativ hallara qarşı barışmaz mövqe tutulması tərəfinizdən həyata keçirilən uzaqgörən və ardıcıl siyasətin prioritet istiqamətlərindəndir. Dövlətin ali məqsədini təşkil edən insan və vətəndaş hüquqlarının təminatı ilk növbədə hər kəsin yüksək keyfiyyətli hüquqi yardım almaq kimi konstitusion hüququnda ifadə olunur. Bu hüququn təminatı olaraq qəbul olunmuş “Vəkillər və vəkillik fəaliyyəti haqqında” Azərbaycan Respublikasının Qanunu daim mütərəqqi normalarla yenilənənməklə hüquq və azadlıqların müdafiəsində böyük imkanlar yaradır.
Heç şübhəsiz, hüquqi yardımın yüksək peşəkarlıqla reallaşdırılması hüquq-müdafiə təsisatlarının inkişafını zəruri şərtə çevirir. Bu mənada “Azərbaycan Respublikasında vəkilliyin inkişafı ilə bağlı əlavə tədbirlər haqqında” 22 fevral 2018-ci il tarixli Sərəncamınız respublikamızın hüquq ictimaiyyətinə, xüsusən də bu fəaliyyəti həyata keçirən vəkillərə böyük diqqətin ifadəsi kimi qəbul olunur. Bu sənəd eyni zamanda konstitusiyada nəzərdə tutulmuş insan və vətəndaş hüquqlarına dair normaların deklarativ xarakter daşımadığını, gerçək əməli iradəyə əsaslandığını təsdiqləyir.
Sərəncama əsasən Vəkillər Kollegiyasının və onun müvafiq qurumlarının binalarla təmin olunması, dövlət hesabına göstərilən hüquqi yardıma görə müəyyən edilmiş məbləğin 3 dəfə artırılması və Kollegiyanın maddi-texniki təminatı ilə bağlı digər tədbirlərin görülməsi biz vəkilləri öz işimizə daha peşəkar yanaşmağa, daha mübariz və məsuliyyətli olmağa çağırır.
Möhtərəm cənab Prezident, Biz vəkillərə göstərdiyiniz diqqət və qayğıya görə Sizə dərin ehtiram və minnətdarlığımızı bildiririk. Sizi əmin edirik ki, Sərəncamdan irəli gələn vəzifələrimizi yüksək səviyyədə, peşəkarcasına həyata keçirəcək, hüquqi dövlət və vətəndaş cəmiyyəti quruculuğu prosesinin daha da dərinləşməsi istiqamətindəki fəaliyyətimizlə etimadınızı hər zaman doğruldacağıq”.
Baki-xeber.com
