Səfayət Əhmədova: “Köhnə təcili tibbi yardım maşınlarından xəstə çağırışlarında, xəstə daşınmasında istifadə olunmur” Bakı Şəhər Təcili və Təxirəsalınmaz Tibbi Yardım Stansiyası isə bütün təcili tibbi yardım maşınlarının müasir tipli olduğunu deyir Rasif Bağırov: “Ola bilsin ki, köhnə maşınlardan bəzi texniki vasitələrin, dərman preparatlarının daşınması məqsədilə istifadə olunur”
Bir vaxtlar daha çox sənaye şəhəri kimi tanınan paytaxt Bakı bu gün mədəniyyət, gözəlliklər, elm, sənət, tərəqqi məkanı kimi özünə şöhrət qazanıb. Şəhərimiz yeniliyə, müasirliyə qucaq açsa da, bəzi hallarda şəhərimizin küçələrində “köhnə dünya”nın bəzi qalıqları ilə də rastlaşırıq. Uzağa getməyək, elə bu günlərdə paytaxtda gediş-gəlişin gur olan küçələrindən birində Sovet dövründən qalma köhnə “QAZ-24” markalı təcili tibbi yardım maşını ilə qarşılaşdıq.
Açığı, hələ də təcili və təxirəsalınmaz tibbi yardım sistemində “QAZ-24” markalı maşından istifadə edilməsi faktı bizdə təəccüb doğurdu. Əvvəlcə elə bildik ki, hansısa bir filmin, klipin kadrları çəkilir, köhnə təcili yardım maşınından da həmin məqsəd üçün istifadə edilir. Bu maşınlarla rastlaşarkən, istər-istəməz, adamın ağlına ilk gələn bu fikir olur. Çünki bu təchizatda köhnə maşınların olması həqiqətən də gözlənilməz bir haldır.
Respublikanın təcili və təxirəsalınmaz tibbi yardım sisteminin inkişafına böyük dövlət qayğısının olduğu, son illər müasir tipli təcili yardım maşınlarının alınaraq ölkəyə gətirildiyi bir dövrdə “QAZ-24” markalı təcili yardım maşınının bu təchizatda olması müxtəlif suallar yaradır.
Yerli səhiyyə müasir standartlara cavab verən təcili tibbi yardım maşınları ilə təmin olunduğu halda köhnə tipli təcili yardım maşınlarının hələ də bu sistemdə qalmasına nə ehtiyac var?
Səhiyyə Nazirliyinin Mətbuat xidmətinin əməkdaşı Səfayət Əhmədova “Bakı-Xəbər”ə açıqlamasında bildirdi ki, bu təchizatda az sayda da olsa köhnə markalı tibbi yardım maşınları var, ancaq onlar xəstə çağırışlarına göndərilmir, başqa məqsədlər üçün istifadə edilir: “Köhnə tipli bir neçə təcili tibbi yardım maşını var və onlar barmaqla sayılacaq qədərdir. Onlar da sanitar-texniki məqsədlər üçün saxlanır. Köhnə təcili tibbi yardım maşınlarından xəstə çağırışlarında, xəstə daşınmasında istifadə olunmur. Bu gün xəstə çağırışlarında ancaq gördüyünüz “Mersedes” markalı müasir təcili tibbi yardım maşınlarından istifadə olunur”.
Bakı Şəhər Təcili və Təxirəsalınmaz Tibbi Yardım Stansiyasından isə verilən məlumata görə, Prezidentin sərəncamı ilə müasir tipli təcili yardım maşınları alınıb. Məlumatlara görə, müasir təcili yardım maşınları lazımi avadanlıqlarla təchiz olunub. Bu qurumdan da bildirdilər ki, hazırda Sovet dövründən qalma təcili tibbi yardım maşınlarından xəstə çağırışlarında və xəstə daşınmasında istifadə edilmir.
Məlumata görə, təkcə 2016-cı ildə ölkəyə alman istehsalı olan 100 ədəd təcili tibbi yardım avtomobili gətirilib. Bu avtomobillər müasir avadanlıqlarla yanaşı, lazımi dərman preparatları ilə təchiz olunub. Sonrakı dövrlərdə də müasir tipli təcili yardım maşınları alındığı və respublikanın paytaxtında və bölgələrdə xəstələrin istifadəsinə verildiyi qeyd edilir.
Səhiyyə sahəsi üzrə ekspert, həkim Rasif Bağırov da “Bakı-Xəbər”ə açıqlamasında qeyd etdi ki, hazırda təcili tibbi yardım sistemində “QAZ-24” və digər köhnə tipli təcili yardım maşınlarından xəstə çağırışlarında və xəstə daşınmasında istifadə edilmir. Şəhərdə müşahidə etdiyimiz mənzərəyə gəlincə, ekspert bildirdi ki, bizim gördüyümüz köhnə “QAZ-24” markalı təcili tibbi yardım maşını texniki məsələlər üçün istifadə edilir: “Bildirim ki, köhnə tipli təcili tibbi yardım maşınları Bakı şəhərinin təcili yardım sistemində yoxdur. Artıq onlardan istifadə olunmur. Onlar təcili tibbi yardım sistemindən çıxarılıblar. Ola bilsin ki, köhnə maşınlardan bəzi texniki vasitələrin, dərman preparatlarının daşınmasında istifadə olunur. Görünür, bu maşında harasa yük, avadanlıq aparırlarmış. Ancaq bu maşınlardan xəstə çağırışlarında, yaxud xəstə daşınmasında istifadə edilmir”.
Qeyd edək ki, bəzi məlumatlara görə, Sovet dövründən qalan təcili tibbi yardım maşınlarından bəzi bölgələrdə də istifadə edilir. Bu məsələyə aydınlıq gətirən ekspert dedi ki, ola bilsin, bu maşınlardan ucqar rayonlarda istifadə edilir: “Ola bilsin, hansısa ucqar yerlərdə bu avtomobillərdən istifadə edilsin. Rayonların özündə də təcili tibbi yardım maşınları dəyişdirilib, orada da müasir tipli təcili tibbi yardım maşınlarından istifadə edilir. Rayonlarda da “Mersedes” maşınlara keçiblər. Deyərdim ki, bu sistemdə hətta dağ yerləri üçün istifadə edilən “QAZEL” maşını da yoxdur. Artıq hamısı yığışdırılıb”.
Təcili və təxirəsalınmaz tibbi yardım sistemində yeniliklərlə yanaşı, bəzi texniki problemlərin də qaldığını deyən R.Bağırovun sözlərinə görə, hazırda bu sahədə mərkəzləşdirilmiş sistemə keçilib. Onun bildirdiyinə görə, mərkəzləşdirilmiş sistemə keçid müsbət hal olsa da, xəstələrlə bağlı müəyyən problemlər yaranmasına səbəb olur: “Düzdür, bu, xəstələr tərəfindən edilən müraciətləri asanlaşdırır. Ancaq mərkəzləşdirilmiş sistemə keçilməsinə baxmayaraq, bu proses tam olaraq yerinə oturuşmayıb. Nə mənada? Bu sistemdə həkim çatışmazlığı var, çağırışların ötürülməsində gecikmələr, ləngimələr olur, bir işçiyə iki rayon tapşırılır. İşçi bir rayonun çağırışlarını paylayıb, sonra ikinci rayonun çağırışlarını paylamağa başlayır. Bu da gecikməyə səbəb olur. O gecikmə isə artıq xəstənin vaxtından gedir. Demək istəyirəm ki, hələ belə texniki qüsurlar var. Güman edirəm ki, gələcəkdə bu texniki qüsurlar aradan qalxacaq və hər şey normal olar. Amma hələ ki, bu problemlərlə üzləşirik. Təcili yardıma problem yaradan bir əsas məsələ var, onu da qeyd etmək istəyirəm. Bir çox hallarda binaların üzərində ünvan qeyd edilən lövhə olmur və bu da həkimlərin ünvanları müəyyənləşdirməsində ciddi problemlər yaradır. Bakı Şəhər İcra Hakimiyyəti binalara ünvan yerləşdirilməsini təmin etməlidir. Bu yoxdursa, heç olmasa binaların üzərinə ünvan tabaşirlə yazılmalıdır ki, həkimlər çətinlik çəkməsin. Bəzən ünvanın tapılması üçün böyük vaxt itkisinə yol verilir”.
İradə SARIYEVA
